Read Khoekhoegowab 2 Timoteub 2 Bible Online

2 Timoteub 2 - Khoekhoegowab bible

2 Timoteub 2

¹Satsa ǁnâi, ti ôa, Xristub Jesub ǃnâ hâ ǀkhommi ǃnâ ǀgai.

²Tsî ǂgui ǀhûǀguitimî-aon aiǃâts ge tita xu ǁnâun, ǁîna ǂgomǂgomsa khoena ǂgomǃgâba, naunan nî ǁkhāǁkhāsa a ǁkhāna.

³Satsa ǁnâi Xristub Jesub di ǃgâi ǃkhamaose ǁgâiǀāna tani.

⁴Torob ǃnâ ra ǃoaba-i xare-i ge ûib di ǂhansendi ǀkha ǁae tama hâ, toroǃoabas ǃoa ǁî-e ge ǃgaeba-i nî ǃgâiǃgâibase.

⁵Tsî khoe-i ga ǃkham xawe i ge krons ǀkha ǀgapahe tide, ǂhanuse i ga ǃkham tama io.

⁶Sîsen ra ǃhanakuru-ao-i nî ǂguro ǂûn xa ǂû.

⁷Mî ta ra-e ǃgaoǃgâ re; îb ǃKhūba hoa xūn ǃnâ ǁnâuǃāba mā tsi!

⁸ǂÂis ǃnâ ūhâ re, Jesub Xristub ge ǁō hâna xu ǂkhaiǂkhaihe ǃkhaisa, Davib suriba xu hâba ti ǃgâiǂhôasa ǃoa;

⁹ǁîs ǃaroma ta tsūdī-aose ǃgae-ūdan kōse ǁgâiǀāna ra tsâsa; xawe mîs ge ǃgaehe tama hâsa.

¹⁰ǁNā-amaga ta hoana ra tani ǃkhōǂuibasensan ǃaroma, ǁîn nî ǁkhāti Xristub Jesub ǃnâ hâ ǃgâiǃōsiba hōga ǀamo ǂkhaisib ǀkha.

¹¹ǂGomǂgomsa mî-i ge nē-e: ǁŌǀhao da ga ǁîb ǀkhao, o da ǁkhāti ǁîb ǀkha nîra ûi;

¹²sâsase da ga hâo, o da nîra gaoǀhao; ǀoa bi da kao, ob nîra ǁkhāti ǀoa da;

¹³ǂgomǂgomsa tama da ga io, ob ge ǁîba ǂgomǂgomsase hâ, ǁî-aitsamab a ǀoasen ǁoa xui-ao.

¹⁴Nēna ǁîna ǂâiǂâiǃnâ re, î ǃKhūb aiǃâ ǁîna ǀhûǀguitimîba, mîdi ǃaroman ǂnoagu tidesa, xū-i xare-es harebeba tama xui-ao, ǁnâu rana kāǁō kais ǀguis.

¹⁵Ôasase dī, îts ǁî-aitsama Eloba ǃâitsâhe hâse mâi-aiǃâsen, taotaohe tide sîsenaose, amab di mîsa ǂhanuse ra ǀgoraǃāse;

¹⁶xawe gagaoǃnâ ǁau ǃhoa-aina ǂkhā; ǃaruǀîǀguin nî eloxoresasib ǃnâ ǃnā xuige;

¹⁷tsî ǁîn di mîs ra ǃnumis khami ǂûǃganu; ǁîn ǃnâ kha Himeneub tsî Filetub tsîkha hâ,

¹⁸amaba xu ge ǂgōkha, tsî khâis ge ǀnai ī ti ra mîkha, tsî ǀnîn di ǂgomsa ge dawaǃkhunikha.

¹⁹Xawe ǃgaoǃgaos Elob dis ge mâǁapo hâ, tsîs ge nē ǂganǀgaiǀgaisa ūhâ: ǃKhūb ge ǁîb dina a ǂan; tsî: Xristub ǀonsa ra ǂgai-i hoa-e a-i ǂhanuoǃnâsiba xu ǀgora.

²⁰Tsî kai om-i ǃnân ge ǃhuniǀurisoan tsî ǀhaiǀurisoan ǀguina hâ tama hâ, xawe ǁkhāti haixapan tsî ǃhūxapan tsîna; tsî ǀnîna ǃgôasib ǃoa tsîn nauna ǃgôaoǃnâsib ǃoa hâ.

²¹Khoe-i ga ǁî-aitsama nēn xa ǃanuǃanuseno, ǁnā-i ge ǃgôasib ǃoa hâ soa-e, oms ǀhonkhoeba khaibahe tsî harebeba hâ-e, mâ ǃgâi sîsenni hoab ǃoa ǁāǁāhe hâ-e.

²²ǂKhamkhoesis di turaga ǁhâxū; î sauruǃgon ǂhanu-aisib, tsî ǂgoms, tsî ǀnammi tsî ǂkhîb tsîna, ǃKhūba ǃanu ǂgaoba xu ra ǂgaiǀîn ǀkha.

²³Î gâre tsî ǁkhoaoǃnâ ǂnoagu-aide aoxū; ǃkhams ǀguisa di ra ūǀkhī ǃkhaisats a ǂan xuige.

²⁴Tsî ǃKhūb ǃgā-i ge ǃkhamxa tide, tsî i ge nî khoexasi mâ khoe-i hoa-i ǃoa, tsî i ge nî ǁkhāǁkhāxa tsî ǂkhabana taniǀnamxa,

²⁵tsî i ge nî mâǃoa rana tsauraǃnâsib ǀkha ǁgau, Elob ǁîna ǀnîsi ǃhobasensa mā tidesa, amaban nî mûǂanse,

²⁶isen ǀnîsi ǁgâuab di ǁnoaba xu ǃnoaǂkhai tidesa, ǁîb ǃnân ǃkhōhe hâba ǁîb di ǂâis ǃoa.