Read Khoekhoegowab 2 Timoteub 3 Bible Online

2 Timoteub 3 - Khoekhoegowab bible

2 Timoteub 3

¹Îts ǂan nēsa, ǀuni tsēdi ǃnâ gu ǃgom ǁaega nîra hā ǃkhaisa.

²Khoen nîra ǁîǀnamsenxa, mariǃgunuxa, anxa, ǃgurixa, ǃkhāǃkhāxa, ǁgûna ǁnâuǀnamoǃnâ, ganganoǃnâ, ǃanuoǃnâ,

³ǀnamoǃnâ, ǂkhîbaguoǃnâ, ǀhoexa, ǀgauoǃnâ, ǃkhausa, ǃgâina ǃoa ǀnamoǃnâ,

⁴ǀapexūxa, ǂgapaǂgaoxa, khūkhūsenxa, turaba Elob ǃgâ-ai ra ǀnamna;

⁵eloǃaoǃgâxasib di īsiga ūhâ, xawe ǀgaib âba ra ǀoana. Nēti īna xu ǂgō!

⁶Nēn din ge omdi ǃnâ ra ǀkhuriǂgâna, tsî tararodi ǁoren ǀkha ǃnaohe hâdi tsî ǃkharaga tura-aigu xa ra doeǁgamahede ra ǃkhōna;

⁷ǁîdi hugaǀgui ra ǁkhāǁkhāsen tsî tātsē amab di ǂans tawa a sī ǁoade.

⁸Tsî Janeb tsî Jambreb tsîkha ge Moseba mâǃoa khami, ǁnās ǁkhās khamin ge ǁkhāti nēna amaba ra mâǃoa; ǁgao hâ ǂâis â-i tsî ǂgom ǁoa khoen ge ǁîna;

⁹xawen ge ǃaruǀî sī tide; ǁîn di ǁnâuǃāosib ge hoana nîra ǂhaisaba xui-ao, naukha dib ǀkha i ge ī khami.

¹⁰Xawets ge satsa ge sao ti ǁkhāǁkhās, tsî ti tanisens, tsî ti ǂâibasens, tsî ti ǂgoms, tsî ti ǃnūǃnâxasib, tsî ti ǀnammi, tsî ti sâsasib,

¹¹tsî ti ǃgôaǃgondi, tsî ti tsūǀkhāgu, Antioxias tsî Ikoniums tsî Listras tawa tita ge hāǂamgu khami īga; nē ǃgôaǃgonde ta ge ge tani, tsî hoade xub ge ǃKhūba ge ore te.

¹²Tsî Xristub Jesub ǃnâ ǃaoǃgâxase ra ûi ǂgaon hoan ge nîra ǃgôaǃgonhe;

¹³xawe ǂkhaba khoen tsî ǂgaeǂhapu-aon ge ǃaruǀîǀgui nî tsū, ǁîn ra ǂgaeǂhapu tsîn ra ǂgaeǂhapuhe.

¹⁴Xawe satsa hâhâ re ǁî-i ǃnâts ǁkhāǁkhāhe tsî ǀgaiǀgaihe hâ-i ǃnâ, tari-e xuts gere ǁkhāǁkhāhe ǃkhaisats a ǂan xuige;

¹⁵tsî ǀgôasisa xuts ǃanu xoade a ǂan xuige, ǃgâiǃōsib ǃoa ǁgau tsi ǁkhāde, Xristub Jesub ǃnâ ǂgomsa xu.

¹⁶Xoas hoas ge Elob xa ǃgomǂgāǃnâhe hâ, tsî a harebe ǁkhāǁkhās ǃoa, tsî ǂgōǀaus ǃoa, tsî ǀkharaǀkharas ǃoa, tsî ǂhanu-aisib ǃnâ kaikais ǃoa;

¹⁷Elob khoe-i nî dīǀoaǀoasaga, î-i mâ ǃgâi sîsenni hoab ǃoa ǁkhā.