Read Khoekhoegowab 2 Timoteub 4 Bible Online

2 Timoteub 4 - Khoekhoegowab bible

2 Timoteub 4

¹Tsî ta ge tita ra ǃkhō-am Elob tsî Xristub Jesub aiǃâ, ûitsaman tsî ǁō hân tsîna ǁîb di ǂhaiǂhaisens tsî gaosib ǃnâ nîra ǀgoraǃgâba:

²Mîsa aoǁnâ re; hâhâ ǁîs ǀkha ǁaeb ai, ǁae tamab ai; ǂgōǀau, ǁgoa î ǁnama hoa ǃnūǃnâxasib tsî ǁkhāǁkhās tsîra ǀkha.

³ǁAeb nîra hā xuige, ǁîb ain ǂuru ǁkhāǁkhāsa tani tideba; on ge ǁî-aitsama ǁîn di turagu ǃoa ǁkhāǁkhā-aoga nîra ǀhaoǀhaobasen, ǁnâus xan nî ǀkhonaǂgao khami;

⁴on ge ǂgaede amaba xu ǂgōbē tsî nî ǁîde ǁau ǃhoaban ǃoa unu.

⁵Xawe satsa ǀkhaiǃnâse hâ xūn hoan ǃnâ, î ǁgâiǀāna tani, î ǃgâiǂhôa-aob di sîsenna dī, sa ǃoabasa dīǀoaǀoa.

⁶Tita ǀnai ǂnâǁguibase ra ǁguibahe xui-ao, tsî orehe ta nîra ǁaeb ge a ǀgū.

⁷ǃGâi ǃkhamma ta ge ǃkham, ǃgûsa ta ge ǀkhâu, ǂgomsa ta ge sâubasen;

⁸o ta ǃaruǀî ǁguibēbahe hâ ǂhanu-aisib di krons, ǃKhūb, ǂhanu-ai ǂhanuǂhanu-aob nîra ǁnā tsēs ai mā tesa; tsî tita ǀgui ta tama, xawe ǁîb di ǂhaiǂhaisensa ǀnam hân hoana.

⁹ǃHaeǃhaesen, î ǃnoesase tita ǃoa hā.

¹⁰Demab ge tita ge ǁnāxū, nē ǃhūbaibab ǀnamhō hâ amaga, tsîb ge Tesalonikas ǃoa ge dāǁnâ; tsî Kreskenni Galatiab ǃoa, tsî Titub Dalmatiab ǃoa.

¹¹Lukab ǀguib ge tita ǀkha hâ. Markuba ūǃgû, îb sats ǀkha hā; ǃoabas tawab harebeba te hâ xuige.

¹²Tixikuba ta ge Efesus ǃoa ge sî.

¹³Anaǂamxūb, Karpub tawa ta ge Troas ǃnâ ǁnāxūba ūhā, hāts kao, tsî ǂkhanidi tsîna, ǀō-ai perkamende.

¹⁴Aleksanderi ǂaiǂnau-aob ge ǂgui tsū xūna ge dī-ū te. Ab ǃKhūba ǁîba dīdawa-am ǁîb di sîsengu ǃoa.

¹⁵Îts satsa ǁkhāti ǁîb xa ǃûisen; kaiseb sige mîde gere mâǃoa xuige.

¹⁶Tsî ǂguro ǃereambasens ǃnâ i ge khoe-i xare-e hâǀkhā te tama hâ i, tsîn ge hoana ge ǁnāxū te. Tān ǃgôabahe!

¹⁷Xaweb ge ǃKhūba mâǃgâ tsî ge ǀgaiǀgai te, tita xus nî aoǁnâsa ǀoaǀoahese, tsîn nî ǀūben hoana ǁîsa ǁnâuse. Tsî ta ge xammi di amǃnâba xu ge orehe.

¹⁸Tsîb ge ǃKhūba ǂkhabadīb hoaba xu ore tsî nîra ǁîb di ǀhomsi gaosib ǃoa sâu te; ǁîba ab ǀamosib hoab kōse ǂkhaisiba ūhâ! Amen.

¹⁹Priskas tsî Akwilab tsîra tawede, tsî Onesiforub di omma.

²⁰Erastub ge Korintes tawa ge hâ, tsî Trofimuba ta ge Miletos tawa ǀaesen hâse ge ǁnāxū.

²¹ǃHaeǃhaesen î saob aiǃâ hā. Eubulub tsî Pudenni tsî Linub tsî Klaudias tsî ǃgâsagu hoagu ra tawede tsi.

²²ǃKhūb Jesub Xristuba ab sa gagas ǀkha hâ! ǀKhomma ab sadu ǀkha hâ! Amen.