Read Khoekhoegowab Titub 1 Bible Online

Titub 1 - Khoekhoegowab bible

Titub 1

¹Pauluta, Elob di ǃgāta tsî Jesub Xristub di apostelta, Elob ǃkhōǂuibasensan di ǂgoms ǃoa, tsî eloǃaoǃgâxasib ǃoa hâ ǂans amab dis ǃoa,

²ǀamo ûib di ǃâubasens ǃoa, ǁnā Elob, ǂhumi ǁoab ge ǀamo ǁaegu aiǃâ mîmâis ǃoa,

³ǁîb di ǁaeb aib ge ǂhaiǂhaisa ǁîb di mîsa xu, tsî Elob sada ǃGâiǃōdī-aob di mîmās ǃoa ta ǂgomǃgâbahe hâ aoǁnâsa xu: Titub ti ǂhauǃnâ ǀgôaba ǃoa hoan di ǂgoms ǃnâ:

⁴ǀKhommi tsî ǀkhomxaǂgaosib tsî ǂkhîb tsîga a gu Elob ǁGûb tsî Xristub Jesub sada ǃGâiǃōdī-aoba xu hâǀkhā tsi!

⁵ǁÎ ǃkhais ǃaroma ta ge Kretas tawa ǃgoro kai tsi, gorose tôasi hâna aiǃâb ǃoa dī-unu, tsîts nî mâ ǃās hoas ǃnâ ǂnomdomga ǂnûiǂgāsa, mîmā tsi ta ge khami,

⁶Khoeb ga ūose īo, tsîb ga ǀgui taras di ao-o, tsîb ga ǂgomsa ǀgôana ūhâo, supuǂâixa ûib xa ǀanaǃgâhe ǁoan tsî ǁnâuǀnamoǃnâ tamana.

⁷Mûǂamaob ge nî ūose ī Elob ommi di ǂhûiǂui-aose, îb tā ǁîǂâibe, îb tā ǁaixa, îb tā ā-ao, îb tā ǃkhamao, îb tā taotaosa hōbasen-e ôabasen;

⁸îb ǃhaokhoena sâu ǂgao, îb ǃgâina ǀnam, îb ǃûisen, îb ǂhanu-ai, îb ǃanu, îb îǂhôa;

⁹îb ǁkhāǁkhās ǃoa hâ ǂgomǂgomsa mîs ai ǃkhōǀgaipe, ǁkhāb nîga, ǂuru ǁkhāǁkhās ǀkha ǁnamasa tsî ǃhoaǃoa rana mîdansa.

¹⁰ǂGuin a ǁgauoǃnâ tsî ǁau ǃhoa-ao tsî ǂgaeǂhapu-ao xui-ao, ǀō-ai ǃgaos din,

¹¹ams ânan nî ǂganbahesa anu hân, hoaraga omga ra dawaǃkhunin, tsî taotaosa hōbasen-i ǃaroma anu tamana ra ǁkhāǁkhāna.

¹²ǀGuib ân, ǁîn di kēbo-ao ge īb gere mî: Kretaǁîn ge hugaǀgui a ǂhumi-ao tsî ǁaixa ǀguru tsî ǀopesa ǃnā.

¹³Nē ǃkhō-ams ge a ama. ǁNā-amaga ǁîna ǂgōǀau, în ǂgoms ǃnâ ǂuru,

¹⁴în tā Jodeǁî ǁau ǃhoaban tsî khoen di mîmādi, amaba xu ra oan dide dī.

¹⁵Hoa xūn ge a ǃanuna ǃanuba, xawe ǂnaoǂnaohe hân tsî ǂgomoǃnâna i ge xū-i xare-e ǃanuba tama hâ; tsî ǁîn di ǁnâuǃāb tsî ǂâis tsîra ge ǂnaoǂnaohe hâ.

¹⁶Eloban a ǂan, tin ra ǁkhoase mî, xawen ra dīgu ǀkha ǀū bi; ǁgaiǁgaisa tsî ǁnâuǀnamoǃnâ tsî mâ ǃgâi dī-i hoa-i anuba tama khoen a ǁî amaga.