Read Khoekhoegowab Titub 2 Bible Online

Titub 2 - Khoekhoegowab bible

Titub 2

¹Satsa ǂuru ǁkhāǁkhāsa anuba hâna ǃhoa re:

²Î gu kairaga ǁnâuǃāxa, ǃgôahesa-anusa, tanisen, î gu ǂgoms tsî ǀnammi tsî sâsasib ǃnâ ǂuru;

³î di kaira tarade ǁnās ǁkhās xase ǁîdi tanisens hoas ǃnâ ǃanuna anuba hâ khami ī, î di tā ǀhoe-aose ī, î di tā ǂauxûi-ā-aose ī, î di ǃgâi ǁkhāǁkhā-aose ī,

⁴î di ǂkham tarade ǁkhāǁkhā ǂuruǂâixase hâsa, ǁîdi aoga ǀnamsa tsî ǀgôana ǀnamsa,

⁵tanisensa, îǂhôase hâsa, omdi âde ǀnamsa, ǃgâixase hâsa, ǁîdi aoga ǃnaga hâbasa, Elob mîs ǃkhāǃkhāhe tidese.

⁶Î ǂkham khoega ǁnās ǁkhās xase ǁnama, ǀgause gu nî hâsa.

⁷Î xūn hoan ǃnâ ǁî-aitsama ǃgâi sîsengu di aiǁgause ǁgausen, î ǁkhāǁkhās ǃnâ ǃūmûsib tsî ǃgôa-anusib tsî ǂhauǃnâsib tsîna ǁgau,

⁸î mîsa ǂuruse tsî ǂnoaǃoahe ǁoasase ǁkhāǁkhā mâǃoa ra-i nî taotaohese, tsî tsū xū-e i sadu xa mî ǁoase.

⁹ǃGāna ǁnama în ǁîn di ǀhonkhoena ǃnaga hâba, în hoa xūn ǃnâ ǃgâiǃgâiba, în tā ǃhoaǃoa,

¹⁰în tā ǃnaribasen, în ǃgâi ǂgomǂgomsasib hoaba ǁgau, în Elob sada ǃGâiǃōdī-aob di ǁkhāǁkhāsa hoa xūn ǃnâ anan.

¹¹ǃGâiǃō kai ra ǀkhommi Elob dib ge khoen hoana ǂhaiǂhaisenba amaga;

¹²tsîb ra ǂgōǀau da, eloxoresasib tsî ǃhūbaib di turagu tsîna ǀūxū, tsî da nî tanisen tsî ǂhanu-aise tsî eloǃaoǃgâxase nē ǃhūbaib ai ûi ǃkhaisa;

¹³tsî da ra ǃâubasen ǃgâiǃō ǃâubasens tsî ǂhaiǂhaisens kai Elob tsî sada ǃGâiǃōdī-aob Jesub Xristub ǂkhaisib disa;

¹⁴ǁî-aitsama ge sada ǃaroma māsenna, ǂhanuoǃnâsib hoaba xub nî xore dase, tsîb nî ǁîb di ǁaes ǂhanis ase ǃanuǃanu dase, ǃgâi sîsengu ǃoa a ôasasa.

¹⁵Nēna ǃhoa, î ǁnama, î ǂgōǀau ǁkhōsib hoab ǀkha. Khoe-i xare-e a-i tā ǃharaxū tsi.