Read Khoekhoegowab Titub 3 Bible Online

Titub 3 - Khoekhoegowab bible

Titub 3

¹ǁÎna ǂâiǂâiǃnâ re, în ǂamkhoegu tsî ǀgaisagu tsîga ǃnaga hâba, în ǁnâuǀnam, în mâ ǃgâi sîsenni hoab ǃoa ǂhomisen hâ,

²în tā khoe-e ǃkhāǃkhā, în tā ǂkhabaxa, în khoexaǃnâ, în tsamtsiǃnâsib hoaba ǁgau khoen hoan ǃoa.

³Sada on kom aibe gâre tsî ǁnâuoǃnâ tsî ǁhapu rase ī ge io, ǂguiǃnâgu tura-aigu tsî ǃgâiǃgâisen-aiga ra ǃoabaǃâ, ǁaixasib tsî surib ǃnâ ra ûise, ǃhuigu hâse, tsî nē-i nau-e ra ǁkhanse.

⁴Xawe ǀkhomxaǂgaosib tsî khoeǀnamxasib Elob sada ǃGâiǃōdī-aob dib ge ǂhaio,

⁵ob ge ge ǃgâiǃō kai da, sada ga dī hâ sîsengu ǂhanu-aisib diga xu tama i, tsî ǁîb di ǀkhomxaǂgaosiba xu, khōǁgams ǁkhawaǃnaes dis tsî ǀasa kaisis ǃAnu Gagab dis ǀkha,

⁶ǁîb ge sada ǂama ǃnāǂamsase ǁhōǂuiba Jesub Xristub sada ǃGâiǃōdī-aoba xu;

⁷ǁîb di ǀkhomma xu da nî ǂhanuǂhanuhe hâǃâ ǀumi-ao kaiga ǀamo ûib ǃâubasensa ǃoa.

⁸Nēs ge amase a ama mî; o ta nēsa ǂgao hâ, nēnats nî ǀgaisase ǁkhāǁkhāsa, în Elob ǃnâ ra ǂgomna ǂhansen, ǃgâi sîsengan nî aimâbasa. Nēn ge khoena ǃgâi tsî harebeba hâna.

⁹Xawe ǂkhā re ǂnoagu-aidi tsî suriǂnaudi, tsî ǁhaiǃāgudi, tsî ǂhanub ǂama ra hā ǂnoagudi tsîde; harebeo tsî di a ǁau xuige.

¹⁰ǀGorasa ra dī khoeba ǂgōxū ǂguro tsî ǀgamǁî ǁnamas khaoǃgâ;

¹¹î ǂan nēti īb a ǂkhaba tsîb ra ǁore ǃkhaisa; ob ge ǁî-aitsama ra ǀgoraǃgâsen.

¹²Artemab tamas ka io, Tixikuba ta ga sîo, o ǃhaeǃhaesen î Nikopolis tawa tita ǁga hā; ǁnāpa ta nî saoba hâǂuise ta ǂâibasen hâ xuige.

¹³Senab ǂhanuǂansabeb tsî Apolob tsîkha ǃgâise huiǃgûǃgû, î kha xū-e tā tôasi.

¹⁴În ǁkhāti sada dina ǁkhāǁkhāsen, ǃgâi sîsenga aimâbasa, ǂhâbasa i hâ khami, în tā ǂûoǃnâse hâ.

¹⁵Tita ǀkha hân hoan ra tawede tsi. ǂGoms ǃnâ a ǀnam gena tawedeba te. ǀKhomma ab sadu hoadu ǀkha hâ. Amen.