Read Khoekhoegowab Filemonni 1 Bible Online

Filemonni 1 - Khoekhoegowab bible

Filemonni 1

¹Pauluta, Xristub Jesub di ǃkhōsata, tsî sada ǃgâsab, Timoteub tsîkhom, Filemonni ǀnamǀnamsab tsî sikhom ǀhaoǃoabasabeba ǃoa,

²tsî ǃgâsas Apias ǃoa tsî Arxipub sikhom di ǀhaoǂnoagu-aob tsî sa oms ǃnâ hâ ǀhaohâb ǃoa:

³ǀKhomma ab hâǀkhā du tsî ǂkhîba, Elob sada ǁGûb tsî ǃKhūb Jesub Xristuba xu!

⁴Mâ ǁaeb hoaba ta ti Eloba ra gangan, ti ǀgoredi ǃnâ ta sats xa ra ǂâio;

⁵sa ǀnammi tsî ǂgoms tsîra, ǃKhūb Jesub tsî ǃanun hoan ǃoats ūhâra xa ta ge ǁnâuo;

⁶îs amǃnâxasis sa ǂgoms disa ǀgaisa, ǃgâib hoab Xristub Jesub ǃnâ da ūhâb di ǂans ǃnâ;

⁷kai ǃgâiaǂgaob tsî ǁkhaeǂgaob tsîkha khom sa ǀnammi ǂama ūhâ, ǃanun di ǂgaogu ge satsa xu khoakhoahe amaga, ǃgâsatse.

⁸ǁNā-amaga kai ǁkhoaǂgaosiba ta Xristub ǃnâ ūhâ, anu hâ-e ta nî mîmā tsi ǃkhaisa,

⁹xawe ta ǁîs di amǃnâs ǃnâ ǀnammi ǃaroma ǀkhoma ǂgao hâ, nēti ī ta amaga, kaira hâ Pauluta, tsî nēsi ǁkhāti Xristub Jesub ǃkhōsata.

¹⁰O ta ra ǀkhoma tsi, ti ôab Onesimub, ti ǃgae-ūdan ǃnâ ta ge ǁîb di î kaib ǃaroma,

¹¹aibe ge harebeba tsi tama hâ ib, xawe nēsi sats tsî tita tsîkhoma kaise harebeba hâb, sî-oa ta geba.

¹²Îts satsa ǁîb, ǁnāb ge ti ǂgaob ǂûba ǃkhōǃoa.

¹³Tita tawa ta go ūhâ bi ǂgao hâ i, sa soas ǃnâb nî ǃgâiǂhôas di ǃgae-ūdan ǃnâ ǃoaba tega;

¹⁴xawe sa mā-ams ose xū-e dīsa ta ǂgao tama go hâ i, îs sa ǃgâidīsa tā ǁgaris ase ī, îs māsenxase ī.

¹⁵ǀNîsib ge ǂkhari ǁaeroba ǀgoraxū tsi hâ i, ǀamosets nî ǁkhawa ūhâ biga,

¹⁶ǃaruǀî ǃgāse tama, xawe ǃgāb xa ǃnāsase, ǀnam ǃgâsab ase; ǀō-aib ge tita ībase, matikō ǃnāǂamseb nî satsa ǁnāti ība ǁgans ǃnâ tsî ǃKhūb ǃnâ.

¹⁷O titats ga horesase ūhâo, tita ǁkhā ta axase ǁnâi ǃkhōǃoa bi.

¹⁸Tsî ǂkhôa-eb ga dī tsi hâo, xū-eb ga surude tsio, ǁî-e tita ǃgôaba re.

¹⁹Tita Pauluta ge ti ǃommi ǂûb ǀkha go xoa: Tita ge ǁî-e nî matare. Î ta tā mî, ǁkhātits sa-aitsama tita surude hâ ǃkhaisa.

²⁰Ā, ǃgâsatse, a ta satsa hōbasen-i ase ūhâ ǃKhūb ǃnâ; ti ǂgaoba ǃKhūb ǃnâ khoakhoaba te.

²¹Sa ǁnâuǀnamxasib ai mûmâinǃgâ hâse ta goro xoa, mî ta gos xats nî ǃnāsase dī ǃkhaisa ǂan tsî.

²²Îts ǁkhā ǁaeb ai hâǃnâ ta nî ǃkhaisa ǂhomiba te re; sadu ǀgorede xu ta nî sado ǀkhaehe ǃkhaisa ta ǃâubasen hâ xuige.

²³Epafrab ra tawede tsi, tita ǀkha ǀguiba ǃkhō-oms ǃnâ ǂnôaba Xristub Jesub ǃnâ;

²⁴tsî Markub, tsî Aristarxub, tsî Demab, tsî Lukab, ti ǀhaoǃoabasabegu tsîga.

²⁵Sada ǃKhūb Jesub Xristub di ǀkhomma ab sadu gagas ǀkha hâ! Amen.