Read Khoekhoegowab Hebreǁîn 10 Bible Online

Hebreǁîn 10 - Khoekhoegowab bible

Hebreǁîn 10

¹ǂHanub ga ǃgoaxa xūn di somma ūhâo tsî xūn di ǀguiti-ība tama, ob kom tātsē kurikorobe ǁkhā ǁguibadi, hugaǀgui ra ǁguibahedi ǀkha ǃgûsī rana a dītoa ǁoao.

²ǁNāti ga ī tama io, o di ga ǁguibade ǀû hâ, ǁnān eloǃoabasa ra dīn ga ǀguitsē ǃanuǃanuhe hân ase ǁoren di ǂâisa ūhâ tama i hâ xui-ao.

³Xawe ǁîdi ǀkhas ra kurikorobe ǁoren di ǂâiǂâisensa dīhe.

⁴Ī ǁoa i kom ao, ǁgōgu tsî pirigu di ǀaob ǀkhan nî ǁorena ūbēhesa.

⁵ǁNā-amagab ra ǃhūbaib aib ra hā hîa mî: ǁGuibadi tsî hōdi tsînats ge ǂgao tama hâ, xawets ge sorosa ge ǂhomiba te.

⁶Khauǁguibadi tsî ǁoreǁguibadi ǃnâts ge ǃgâiǃgâibasen-e ūhâ tama hâ i.

⁷O ta ge tita ge mî: Mû, ǃgoaxa ta a (ǂkhanis di tsoatsoas ǃnâ tita xa xoamâihe hâ), sa ǂâisa ta nî dīse, o Elotse.

⁸ǂGurob ge mîo: ǁGuibadi tsî hōdi tsî khauǁguibadi tsî ǁoreǁguibadi tsînats ge ǂgao tama hâ, tsîts ge ǁîdi ǃnâ ǃgâiǃgâibasen-e ūhâ tama hâ (ǂhanub ǃoa ra ǁguibahede),

⁹ob ge nēsi ra mî: Mû, ǃgoaxa ta a, o Elotse, sa ǂâisa ta nî dīse. ǂGurosab ra ǁaudī, ǀgamǁîsab nî ǂnûiǂgāse.

¹⁰ǁÎb di ǂâis ǃnâ da ǀgui ǃnās ama ǃanuǃanuhe hâ Jesub Xristub soros di ǁguibas ǀkha.

¹¹Tsî mâ pristeri hoab ge tsēkorobe mâ tsî eloǃoabasa gere dī, ǁkhā ǁguibadi, ǁorena tātsē ūbē ǁkhā tamade ǂgui ǃnāde ra ǁguibaǃâ;

¹²xawe nēb, ǀgui ǂāǁguibasab ge ǁoren ǃaroma ǁguibas khaoǃgâb ge Elob amǀkhāb ǁôab ai ǀamos kōse ge ǂnû;

¹³tsî ǃaruǀî ra ǃâu, ǁîb di khākhoen nî ǁîb ǂaira di ǂaimâi-aidas ase ǁguihes kōse;

¹⁴ǀgui ǁguibas ǀkhab ge ǀamos kōse ǃanuǃanuhe rana dītoa xui-ao.

¹⁵Tsî ǃAnu Gagab ra ǁkhāti ǁkhā-e ǀhûǀguitimîba da.

¹⁶Aibeb ge: “Nēs ge ǃgaeǀhaos, nē tsēdi khaoǃgâ ta nî ǁîn ǀkha dīsa,” ti mîs khaoǃgâb ge ǃKhūba ra mî: Ti ǂhanuga ta ǁîn di ǂgaogu ǃnâ nîra mā, tsî ta ǁîga ǂâidi ân ǃnâ nîra xoaǂgā.

¹⁷Tsî ǁîn di ǁoren tsî ǁîn di ǂhanuoǃnâsigu xa ta ǃaruǀî ǂâi tide.

¹⁸Tsî ǁîn di ǀûbas hâpa, ǁnāpa i ǃaruǀî ǁguiba-e hâ tama ǁoren ǂama.

¹⁹O ǂgomǃgâsa da ūhâ amaga, ǃgâsado, Jesub di ǀaoba xu da nî ǃanusib ǃnâ ǂgâsa,

²⁰ǁîbab ge sada ǀasa tsî ûitsama daose khaibaba ǂgāmâisas, ǁnās ge ǁîb di ǁgansa xu,

²¹tsî kai pristera da Elob ommi ǂamai ūhâ amaga,

²²a da ǃgûsī ama ǂgaob ǀkha, tsî ǂgoms di ǁaposasib ǀkha, tsî ǂgaogu ǀgapi-ais ǀkha, ǂkhaba ǂâisa xu orehe hâse, tsî soros tawa ǃanu ǁgam-i ǀkha ǁāhe hâse;

²³î da ǁnopeǁoasa ǁguiǁnâs ǃâubasens disa ǃkhōǀgaipe; ǁîsa ge mîmâib a ǂgomǂgomsa xuige;

²⁴î da kōǃgâ ǀnammi tsî ǃgâi sîsengu hōhōǃnâgu ǃoa;

²⁵î da tā sada ǀhûsa ǀûǀkhā, ǀnîn ǁnaetiba ūhâ khami, î da ǁnamagu, î da ǁîsa ǃnāsase dī, tsēs ra ǀgū ǃkhaisa du ra mû xuige.

²⁶ǂAnapega da ga ǁoreo, amab di ǂansa da ge hōs khaoǃgâ, o i kom ǀnî ǁguiba-e ǃgau tamao ǁoreb ǂama;

²⁷xawe ǃhuriǃhurisa ǃâubasens ǀgoraǃgâs dis, tsî ǀaes di ǁhabub, mâǃoasabena nîra hapuba.

²⁸Khoe-i ga Moseb di ǂhanuba ǃûǂamo, o i ge ǀgam tsî ǃnona ǀhûǀguitimî-aon ǃnâ ǀkhomxaǂgaosib ose ra ǁō;

²⁹o matikō ǃnā hâ ǃgom ǁkharaba anu hâse i ǁnā-e nîra ǃgôahe, ti du ǂâi hâ, Elob Ôaba ǂaira ǃnâ dāǂgā tsî ǃgaeǀhaos di ǀaob, ǁîb ǀkha i ǃanuǃanuhe hâba ǃanu tamase ǃgôa, tsî ǀkhommi di Gagaba ra ǃkhāǃkhā-e?

³⁰ǂAn da kom ao ǁîb, nēti ge mîba: “Tis ge ǀkhaosa, tita ge nîra dīdawa-am.” Tsî ǁkhawa: “ǃKhūb ge ǁîb di ǁaesa nîra ǀgoraǃgâ.”

³¹ǃAoǃaosa i ge a, ûitsama Elob di ǃomǁae ǁnāsa.

³²ǂÂiǂâisen re aibekam tsēdi xa, ǁîdi ǃnâ du ge ǃnâǃnâhe hâse ǂgui tsūǀkhāgu di ǃgauguba tanide;

³³o du ge ǀgui ǀkhāb ai ǃkhāǃkhāhedi tsî ǁgâiǀāga xu khoen di ǃgapaǀîxū kai; o du ge nau ǀkhāb ai ǁnān, sadu ǀkha i ge ī i khami īn ǀkha ge amǃnâxa;

³⁴ǃkhōsaben ona du ge ǀkhom xui-ao, tsî du ge ǁkhāti sadu xūn di ūsa ǃgâiaǂgaob ǀkha ge tani, ǂan raǃâ, ǁnās ǃgâ-ai ǃgâi tsî hâhâ ra xū-e du ǀhommi ǃnâ ūhâsa.

³⁵Tā ǁnâi sadu ǁkhoaǂgaosiba aoxū, kai mādawa-am-e ūhâba.

³⁶Taniǀnamxasiba du ǂhâba hâ, Elob ǂâisa dī tsî du nî mîmâisa hōga.

³⁷Gorose ǂkhari ǁaerob ǀguib, ob ge ǃgoaxa aba nîra hā tsîb ge ǀhape tide;

³⁸tsî ǂhanu-ai-i ge ǂgomsa xu nîra ûi; tsî ǂkhabuǂâi i kao, os ge ti ǀomsa ǁî-i ǃnâ ǃgâiǃgâibasen-e ūhâ tama hâ.

³⁹Xawe da ge sada ǂkhabuǂâi tsî ra kāǁōn di tama hâ; tsî da ge ǂgom tsî ǀomsa ra sâun di.