Read Khoekhoegowab Hebreǁîn 11 Bible Online

Hebreǁîn 11 - Khoekhoegowab bible

Hebreǁîn 11

¹Tsî ǂgoms ge khoe-i ra ǃâubasen xūn di ǁaposa mûmâinǃgâsa, tsî khoe-i mû tama xūn di ǂanǁaposisa.

²ǁÎsa xu gu ge kaiga ǃkhō-am-e hō xui-ao.

³ǂGomsa xu da ra mûǂan, ǃhūbaib Elob mîs ǀkha ǁāǁāhe hâsa, on ge mû da rana mûhe rana xu ǀkhī tama hâ.

⁴ǂGomsa xub ge Abela Kainni dis ǃgâ-ai ǃgâi ǁguibasa Eloba ge ǁguiba, ǁîsa xub ge ǃkhō-am-e ge hō, ǂhanu-aib a ǃkhaisa, Elob ge ǁîb di hōs xa ǃkhō-am ǃnubai; tsî ǂgomsa xub ra ganupe ǃhoa ǁōb ge xawe.

⁵ǂGomsa xub ge Henoxa ge ūbēhe, ǁōbab mû tidese, tsîb ge hōhe tama ge i, Elob ge ūbē bi amaga; ǁîb di ūbēhes aiǃâb ge ǀnai ǃkhō-amsa ge hō, Elobab ge ǃgâiba isa.

⁶Xawe ǂgoms ose Eloba ǃgâiǃgâibas ge a ī ǁoa; Elob tawa ra sī-i nî ǂgom amaga, hâb a ǃkhaisa, tsîb a ǁîba ra ôan di dīdawa-amao ǃkhaisa.

⁷ǂGomsa xub ge Noaxa, ganupe mûheǁoa xūn ǂamab ge elosi mîmā-e hō ǃnubai ǃaoǃgâsib ǀkha arka ge ǁāǁā ǁîb oms din di sâuhes ǃoa; ǁîs ǀkhab ge ǃhūbaiba ǀgoraǃgâ, tsî ǂgomsa xu ra ǀkhī ǂhanu-aisib di ǀumi-ao kai.

⁸ǂGomsa xub ge Abrahamma ge ǁnâuǀnam, ǂgaiheb geo, ǁnā ǃkhais, ǀumis aseb nî hōs ǃoab nî ǃgûǂoasa; ob ge mapab nî sīsab a ǀūse ge doeǂoa.

⁹ǂGomsa xub ge mîmâis di ǃhūb ǃnâ ǁanǂgā-aose ge hâ, ǃhao ǃhū-i ǃnâs khami, Isaki tsî Jakob tsîkha, ǀhaoǀumi-ao ge ikha ǁhao-omdi ǃnâ ra ǁanse.

¹⁰ǃĀs, ǃgaoǃgaoba ūhâsab ge ǃâubasen xui-ao, ǁîs di om- tsî kuru-aob ge Eloba.

¹¹ǂGomsa xus ge ǁkhāti Sarasa ǀgaiba ge hō, ǃhao-es nî ǃgaoǃgaose, tsî kairas hâ xawes nî ǁorase; ǁîsa ge mîmâibas ge ǂgomǂgomsase ūhâ i amaga.

¹²ǁNā-amagan ge nētikō ǂguina nē ǀguib, ǁō hâ khami ība xu ge hā, ǀhommi ai hâ ǀgamiron tsî hurib ammi ai ǁgoe ǀgopagu di ǃgôaheǁoasa ǀgaus kōse.

¹³Nēn hoan ge ǂgoms ǃnâ ge ǁō, tsî mîmâisa hō tama ge i, tsîn ge ǃnūseba xu mû tsî ǂgom tsî ǃgâiaǂgaoxase ge ǃkhōǃoa si, ǃhūbaib ain ge a ǃhaokhoe tsî ǁaerob ǀguib di ǁanǂgā-ao ǃkhaisa ǂan tsî.

¹⁴Nēna ra mîn ge ǂhaisase ra ǁgauǂui, ǁgûxan ǃhū-en ra ôa ǃkhaisa.

¹⁵Tsî amase naub, ǁîba xun ge ǂoa ǃhūb xan ga ǂâi hâo, on ga ǁaeba ūhâ i, ǁkhawan nî ǁnāǀî oaga.

¹⁶Xawen kom naub ǃgâ-ai ǃgâib ǀhommi diba ra turao. ǁNā-amagab ge Eloba ǁîn xa tao tama hâ, ǁîn di Eloseb nî ǂgaihesa, ǃā-eb ǁîna ǁāǁāba hâ xui-ao.

¹⁷ǂGomsa xub ge Abrahamma Isaka ge ǁguiba, ǃâitsâheb geo, tsîb ge ǀguise ǃnae hâba ge ǁguiba, ǁîb mîmâisa ge ǃkhōǃoab;

¹⁸(ǁîb xa ge mîheb: “Isaki ǃnâts ge surib âtsa nîra ǂgaibahe”) tsîb ge ge ǂâi, Elob a ǁkhā ǃkhaisa, ǁkhāti ǁō hâna xub nî ǂkhaiǂkhai bisa;

¹⁹ǁîna xub ge ǁkhāti ǂkhōts kao ǁkhawa ge hō bi.

²⁰ǂGomsa xub ge Isaka ǃgoaxa xūn ǀkha Jakob tsî Esaub tsîkha ge ǀkhae.

²¹ǂGomsa xub ge Jakoba, ǁōb geo, mâb hoab Joseb ôakha diba ǀkhae, tsî ge ǀgoreǀî, ǁîb ǀkharub di ǀams ai ǃgâsen tsî.

²²ǂGomsa xub ge Joseba, ǁōb ra hîa, Israeli ôan di doeǂoas xa ǃhoa, tsî ǁîb di ǂkhōgu ǃaroma ge mîmā.

²³ǂGomsa xub ge Moseba, ǃnaeb geo, ǁgûra xa ǃnona ǁkhâgu kōse ge gaugauhe, îsa ǀgôarob a ǃkhaisa ra ge mû, tsî gao-aob di mîmāsa ra ge ǃao tama i amaga.

²⁴ǂGomsa xub ge Moseba ǂgao tama ge i, kaib geo, Faraob ôas di ôab aseb nî ǂgaihesa;

²⁵tsîb ge ge ǃkhōǂuibasen Elob ǁaes ǀkhab nî tsūse sîsenūhesa, ǃgû-ī ra ǁkhoab ǁoreb dibab nî ūhâs xa;

²⁶tsîb ge Xristub di ǃharaxūhesa Egipteb di ǁuidi xa kai ǃkhūsib ase ge ǃgôa; mādawa-amǃnâsab ge kō amaga.

²⁷ǂGomsa xub ge Egipteba ǁnāxū, tsî gao-aob di ǁaixasiba ǃao tama ge i; mûheǁoasab tawab ge mû bib ras axase ge ǃkhōǀgaipesen xui-ao.

²⁸ǂGomsa xub ge Pasxab tsî ǀaob ǀgapi-aisa ge dī, ǂguroǃnaesabega ra hîǀhurub ǁîna tsâǀkhā tidega.

²⁹ǂGomsa xun ge ǀApahuriba ǂnâsa ǃhūb axase ge ǃgûǃganu; ǁîsan ge Egipteǁîn tsîna dītsâ, tsî ge āǁō.

³⁰ǂGomsa xu gu ge Jerixos di ǂnubiǂgoaga ge ǁnā, hû tsēdi kōse gu ge ǃgûǂnamipeheo.

³¹ǂGomsa xus ge ǀai-aos Raxasa ǂgomoǃnân ǀkha kā tama ge i, ǃkhē-aogas ge ǂkhîb ǀkha ǃkhōǃoao.

³²Tsî tare-e ta kha ǃaruǀî nî mî? ǁAeb nî tôasiba te, ǃhoa ta kao Gideonni xa, tsî Baraki xa, tsî Simsonni xa, tsî Jeftab xa, tsî Davib xa, tsî Samueli xa, tsî kēbo-aogu xa,

³³ǁîgu ǂgoms ǀkha gaosiga ge danga, ǂhanu-aisiba ge sîsenga, mîmâide ge hōga, xamgu di amǃnâga ge ǂganamga,

³⁴ǀaes di ǀgaiba ge ǀariga, gôab di ǀāba xu ge ûiga, ǂkhabusasiba xu ge ǀgaiba hōga, ǃkhams ǃnâ ge ǀgaiga, ǃhaokhoen di ǂnubide ge ǃhū kaiga.

³⁵Taradi ge ǁîdi ǁō hâna khâisa xu ǁkhawa ge hō; naun ge ge ǂnauǂkhūkaisen, ǃnora kaihesa ǃkhōǃoa tama i tsî, ǁnās ǃgâ-ai ǃgâi khâisan nî hōga.

³⁶Naun ge ǃhōhes tsî ǂnauhes, tsî ǁnās tawa ǃgae-ūdan tsî ǃkhōsis tsîna ge tsâ;

³⁷tsîn ge ǀuiǁhomhe, tsî saxaǃāhe, ǃâitsâhe, tsî gôab ǀkha ge ǃgamhe; tsîn ge khōn tsî pirikhōn ǃnâ gere ǃgûma, tôasib ǃnâ hâse, tsî ǁgâiǀāhe rase, tsî tsūse ra sîsenūhese;

³⁸ǁîn ǃhūbaiba ge anuba tama i tsî ǃgaroǃhūgu ǃnâ, tsî ǃhomgu ai tsî ǃhūb di ǁhoagu tsî ǁhāgu ǃnâ gere ǁhapumana.

³⁹Nēn hoan ge ǂgomsa xu ǃkhō-am-e hō, tsî mîmâisa hō tama ge i;

⁴⁰Elob ge ǁnās ǃgâ-ai ǃgâi xū-e sada ge aiǂhomiba amaga, sada osen ǁîna dītoahe tidega.