Read Khoekhoegowab Hebreǁîn 12 Bible Online

Hebreǁîn 12 - Khoekhoegowab bible

Hebreǁîn 12

¹ǁNā-amaga ǁkhāti sada, nētikō kai ǀhûǀguitimî-aon di ǀnanu-e da sada ǂnamipe ūhâ amaga, a da ǃgommi hoab tsî hugaǀgui ra ǂae-ai da ǁoreba ǁguiǁnâ, î da ǀûs ose sada mâibahe hâ ǃkhams ǃnâ ǃgû;

²î da Jesub, ǂgoms di ǂgaeǂgui-aob tsî dītoa-aob ai kō; ǁîb ǁgui-aiǃâbaheb ge hâ i ǃgâiaǂgaob di amǃnâs ǃnâ ǃgâuhaiba ge tsâb, taosiba ǃgôa tama i, tsî Elob trons di amǀkhāb ǁôab ai ǂnôaba.

³ǂÂiǂâisen ǁnāb, ǁore-aon xa nēti ī ǃhoaǃoasa ǁîb ǃoagu gere tanib xa, î du tā sadu ǀomdi ǃnâ tsō tsî tsanaǁkhui.

⁴Ganupe du ge ǁoreba ǃkhamǃoas ǃnâ ǀaob kōse ǃkham tama hâ.

⁵Tsî du ge ǀuru hâ ǁnā ǁnamas, sado ǃoa ǀgôadu ase ra ǃhoasa: Ti ôatse, ǃKhūb di ǁkharaba tā ǂkharise ǃgôa, î tā ǂkhabuǂâi, ǁîb xats ga ǁkharaheo;

⁶ǃKhūb ǀnam hâ-i, ǁî-eb ra ǁkhara xuige; tsîb ra mâ ǀgôab hoab, ǃkhōǃoab raba ǁkhara.

⁷ǁKharaba du ga tanio, ob ge Eloba ǀgôadu ase ra sîsenū du; mâ ǀgôaba kha hâ, ǁgûb ǁkhara tamaba?

⁸Tsî ǁkharab ose du ga hâo, hoan ge amǃnâxaba, o du ge a ǀaib ǀgôa tsî ǂhau ǀgôa tama.

⁹Tsî da ga sorosi îga ǁkhara-aose ūhâ tsî ǁîga ǃao-o, matikō ǃnāǂamsase da nî gagagu di Îb, ǁîba da ra ûibaba ǃnaga hâba?

¹⁰Naugu ge ǀnî tsērode ǃgâiba gu ge i khami gere ǁkhara da; xawe nēb ge harebes ǃoa ra ǁkhara da, ǁîb di ǃanusiba da nî amǃnâxaga.

¹¹Tsî ǁkharab hoab, hâb rao, ǃgâiaǂgaose ība da tama i tsî ǃoase ra ība da; xawe ǁnās khaoǃgâb ge ǁîb ǃnâ ǁkhāpesen hâna ǂhanu-aisib di ǂkhîxa ǂû-e ra ūǀkhība.

¹²ǁNā-amaga ǁgarasa ǃomga ūkhâi î ǂkhabusa ǁgoade ǁkhawa ǀgaiǀgai;

¹³î sadu ǂaide ǂhanu ǂgaroga dība, î-i ǃhora-e tā ǃoe, î-i ǂgau.

¹⁴Hoan ǀkha du nî ǂkhîse hâsa sauruǃgon tsî ǃanuǃanusens, ǁîs ose i khoe-i xare-e ǃKhūba mû tidesa;

¹⁵î ǃgaoǃgâ, î-i tā khoe-e Elob ǀkhomma xu khaoǃgâ hâ, î-i tā ǀnîsi au-ausens di ǃnoma-e ǀomkhâi, î-i tā gongonǃnâ-e dī, în tā ǁî-e xu ǀnîsi ǂguina ǀuriǀurihe.

¹⁶Î i tā ǀgui-e ǀai-ao tamas ka io xorexūsa Esaub khami, ǀgui ǂû-ai-i ama ǁîb di ǂguroǃnaesisa ge ǁamaxūba;

¹⁷ǂan du a xuige, ǁnās khaoǃgâb ge ǁkhāti aoxūhe ǃkhaisa, ǀkhaebab ge ǀumi ǂgao-o; ǃhausensoa-eb ge hō tama i xui-ao, ǁgamron ǀkhab ge ǁî-e ôa xawe.

¹⁸Sadu ge sī tama hâ tsâǀkhāsa ǃhommi tawa, tsî khau ra ǀaes tawa, tsî ǃkhaeb tsî ǃkhaenas tsî tūǀnanub tsîn tawa,

¹⁹tsî ǀgapadas di ǀōb tsî mîdi di dommi tawa, ǁnâu bi ran ge ǂkhaba, aiǃâb ǃoan ǃhoaǀîhe tidesa.

²⁰Nē-i mîmāhe ra-en ge tani ǁoa i xui-ao: “ǀGoa-i ga ǃhomma tsâǀkhāo, o i ge nî ǀuiǁhomhe tsî ǂāb ǀkha ǁkhâuǃganuhe,” ti.

²¹Tsî nētikōse ǃaoǃaosa ai-i ge i, ob ge Moseba: “ǃHuri ta hâ tsî ta ra ǀkhū,” ti ge mî.

²²Xawe du ge sado Sions ǃhommi tawa ge sī, tsî ûitsama Elob di ǃās tawa, ǀhomsi Jerusalems tawa tsî ǂgui ǀoadisi ǀhomǃgāgu ǀhûs tawa,

²³tsî ǂguroǃnaesaben di ǀhaohâb tawa, ǀhommi ǃnâ xoamâihe hâna, tsî Elob hoan di ǂHanuǂhanu-aob tawa, tsî dītoahe hâ ǂhanu-ain di gagadi tawa;

²⁴tsî ǀasa ǃgaeǀhaos di mâba-aob Jesub tawa, tsî ǀgapi-ais di ǀaob tawa, Abeli dib xa ama-aise ra ǃhoaba.

²⁵Mûbasen re, î du tā ǃhoa-ū du raba ǂkhā. Naun ga ǁkharaba ǁhâxū tama io, ǃhūbaib ai gere ǃhoaba ge ǂkhāna, matikō ǃnāǂamsase da sada ǁhâxū tide, ǀhomma xu ra ǃhoaǁgôaba da ga ǂkhāo;

²⁶ǁîb di dommi ge ǁnāǃnubai ǃhūbaiba ge gongon. Xawe nēsib ǂhôa tsî ra mî: ǀGui ǃnās ǀguisa ta ganupe nî gongon ǃhūbaib ǀguiba tama i, tsî ǀhommi tsîna.

²⁷Os ge nēs: ǀGui ǃnās ǀguisa ra ǁgauǂui, ǁnopeǁnopesa xūn nîra ǀkharaǀkharahesa, dīhe gena, ǁnopeǁnopehe ǁoa xūn nî hâhâga.

²⁸ǁNā-amaga, ǁnopeǁnopeheǁoasa gaosiba da ge hō amaga, a da ǀkhomma ǃkhōǀgaipebasen, î da ǁîba xu ǃgôasib tsî ǃaoǃgâb ǀkha Eloba, ǃgâiba bi a khami, ǃoaba ǁkhā;

²⁹sada Elob ge a khauǃkhū ra ǀae xuige.