Read Khoekhoegowab Hebreǁîn 13 Bible Online

Hebreǁîn 13 - Khoekhoegowab bible

Hebreǁîn 13

¹Ab ǃgâsaǀnamguba hâ.

²ǃHaokhoe ǃkhōǃoaxasiba tā ǀuru; ǁîba xun ge ǀnîna, ǀūn ase ǀhomǃgāga ge ǃkhōǂgā xuige.

³ǃKhōsan xa ǂâi ǀhaoǃkhōsadu as ǁkhās xase, tsî tsūse ra sîsenūhen xa, aitsama ǁkhāti ganupe soros ǃnâ hâs ǁkhās xase.

⁴Ab ǃgameba hoan tawa ǃgôasib ǃnâ ūhâhe, îb ǃgameb kharoba ǂnao-ose ī, ǀai-aon tsî ǃgamekhôa-aonab ge Eloba nîra ǀgoraǃgâ xuige.

⁵Tanisensa as xūǃgunuxasib ose ī, î du ū du hân ǀkha ǂâu; ǁîb ge mî xuige: “Tita ge ǁnāxū tsi tide, tsî ta satsa xu ūdawasen tide.”

⁶O da kom ǁkhoaǂgaose a mî ǁkhāo: “ǃKhūb ge a ti Hui-ao, o ta ǃao tide; tare-e i kha khoe-e nî dī te?”

⁷Sadu aiǃgû-aogu xa ǂâiǂâisen, Elob mîsa sado gere ǃhoabaga; ǁîgu tanisens di ǀamǂoasa kōǀî, î du ǁîgu ǂgomsa ǁgaeǁgae.

⁸Jesub Xristub ge a ǁkhā, ǁari tsî nētsē, tsî ǁkhāti ǀamosib kōse.

⁹ǃKharaga tsî ǃhao ǁkhāǁkhā-aidi xa tā doeǁgarimakaisen; ǃgâi ǃkhais komo, ǂgaob nî ǀkhomma xu ǀgai ǃkhaisa, tsî ǂûna xu tama, ǁîna xun ge ǁîna ra sîsenūna harebe-i xare-e ūhâ tama hâ.

¹⁰Sada ge altarsa ūhâ, ǁîba xun tabernakela ra ǃoabana ǂû ǁkhā tama hâba.

¹¹Ûitsama xūn, ǀaob ân ǀgapipristeri xa ǁoreb ǃaroma ǃanusib ǃnâ ra taniǂgāhen di sorodi ge ǁgoeǃkhais ǃauga ra khauǃkhūhe.

¹²ǁNā-amagab ge ǁkhāti Jesuba ǁāb ǃauga ge tsâ, ǁîb di ǀaob ǂûb ǀkhab nî ǁaesa ǃanuǃanuga.

¹³A da ǁnâi ǁîb ǃoa ǃgûǂoa ǁgoeǃkhais ǃaugaba ǃoa, î du ǁîb di ǃharaxūhesa tani.

¹⁴Nēpa da hâhâ ra ǃā-e ūhâ tama, xawe da ge ǃgoaxa-e ra ôa;

¹⁵xuige a da ǁîba xu hugaǀgui Eloba koaǁguibasa ǁguiba; ǁnās ge ǁîb di ǀonsa ra ǁguiǁnâ amǁgaugu di ǂûsa.

¹⁶ǃGâidīs, tsî augusa tā ǀuru, nēti ī ǁguibadi ǃnâb ge Eloba ǃgâiǃgâibasen-e ūhâ xuige.

¹⁷Sadu aiǃgû-aoga ǁnâuǀnam, î ǁîga ǃnaga hâba; ǁîgu ge sadu ǀomdi ǂama ra ǃûi, ǃereamsa nîra māgu ase; î gu ǁîsa ǃgâiaǂgaob ǀkha dī, î gu tā ǀhâimâinǀoms ǀkha dī, ǁîs ǃgâiba du tide xuige.

¹⁸Sige ǀgoreba re; ǂgomǃgâsen ge ge ra, ǃgâi ǂâisa ge ūhâsa, xūn hoan ǃnâ anuse ra tanisen ǂgao ge ase.

¹⁹Tsî ta ǁnās ǃgâ-ai ra ǀkhoma du, ǁîsa du nî dīsa, î ta ga ǃhaese sado ǁkhawa māhe ti.

²⁰Tsî ǂkhîb di Elob, kai ǃÛi-aob gūn dib, sada ǃKhūb Jesuba ǀamo ǃgaeǀhaos di ǀaoba xu ǁō hâna xu ge ǂgaeǂguiǂuiba,

²¹ab hoa ǃgâi sîsenni ǃnâ ǁkhā kai du, ǁîb di ǂâisa du nî dīse, îb sada ǃnâ sîsen, ǁîb aiǃâ a ǃgâi-e Jesub Xristuba xu; ǁîba ab ǂkhaisiba ūhâ ǀamosib hoab kōse! Amen.

²²O ta ra ǀkhoma du, ǃgâsado, nē ǁnamas di mîsa tani re; ǃnubuse ta go xoaba du xuige.

²³Î ǂan, ǃgâsab Timoteub ge xūhesa; ǃhaeseb ga hāo, o ta nî ǁîb ǀkha sado sī mû.

²⁴Sadu aiǃgû-aogu hoagu tsî ǃanun hoana tawede. Italiab din ra tawede du.

²⁵Ab ǀkhomma sadu hoadu ǀkha hâ! Amen.