Read Khoekhoegowab Hebreǁîn 2 Bible Online

Hebreǁîn 2 - Khoekhoegowab bible

Hebreǁîn 2

¹ǁNā-amaga da ge ǁnâu da gen ai ǃnāǂamsase nî ǃgaoǃgâ, î da tā ǀguitsē kā.

²ǀHomǃgāgu xa gere ǃhoahe mîs ga ǀgaisa io, tsî mâ ǃûǂam-i tsî ǁnâuoǃnâsi-i ga anu hâ amǃnâsa hō-o,

³mati da kha sada nî ǁhaiǁhâ, nētikō kai ǃgâiǃōsib ai da ga ǃgaoǃgâ tama io? ǁÎb tsoatsoas ǃnâ ǃKhūb xa ge aoǁnâheb, tsî ǁnâu bi gega xu sada ǀgaiǀgaibahe hâba;

⁴Elob ǁkhā ǁaeb ai ra ǀhûǀguitimîse saodi tsî buruxa dīn tsî mâ ǀgaigu hoagu tsî ǃAnu Gagab di ǁhōǂuis tsîn ǀkha, ǁîb di ǂâisa ǃoa.

⁵ǀHomǃgāgab ge ǃgoaxa ǃhūbaiba ǃnaga dība tama hâ xui-ao, ǁîb xa ge ra ǃhoaba.

⁶Tsî ǀguib ge ǃkhai-i tawa ǃkhō-am tsî ra mî: Tareba khoeba, ots ra ǁîb xa ǂâi, tsî khoen ôaba, ots ra ǁîba kō?

⁷ǂKharirosets ge ǁîba ǀhomǃgāgu ǃnaga ge ǃgamǃgam; ǂkhaisib tsî ǃgôasib tsîkha ǀkhats ge ǁîba ge ǀgapa, tsîts ge sa ǃomkha di sîsenni ǂama ge mâi bi.

⁸Xūn hoanats ge ǁîb di ǂaira ǃnaga ge ǁgui. Tsî xūn hoanab ga ǁîb ǃnaga ǁguio, ob ge ǀgui xū-i xare-e, ǁîb ǃnaga hâ tide-e ǃgau tama; tsî da nēsi gorose mû tama, xūn hoan ǁîb ǃnaga ǁguihe hâsa.

⁹Xawe da ge ǁîb, ǂkhari ǁaero-e ǀhomǃgāgu ǃnaga ǃgamǃgamhe hâba ra mû, Jesub a ǃkhaisa, ǁōb di tsâb ǃaroma ǂkhaisib tsî ǃgôasib tsîkha ǀkha ǀgapahe hâba, Elob di ǀkhomma xub nî hoan ǃaroma ǁōba tsâ ǁkhāse.

¹⁰ǁNāb, ǁîb ǃaroman xūn hoana hâb, tsî ǁîba xun xūn hoana hâba i ge anuba i xui-ao, ǂgui ǀgôanab nî ǂkhaisib ǃoa hā-ūsa, ǁîna ǃgâiǃōsib di ǂgaeǂgui-aobab nî tsâb ǀkha dītoase.

¹¹ǃAnuǃanu rab kas, ǃanuǃanuhe ran kas hoas ge ǀguiba xu ǀkhī hâ amaga. ǁNā-amagab ge ǁîna ǃgâsase ǂgaisa tao tama hâ.

¹²Tsî ra mî: “Tita ge sa ǀonsa ti ǃgâsana nîra aoǁnâba, ǀhaohâb ǁaegu ta karesa nîra ǁnaeba tsi.”

¹³Tsî ǁkhawa: “ǁÎb ai ta nî ǂgomaiǂnûi.” Tsî ǁkhawa: “Mû, nē ta ge ā tita tsî ǀgôan, Elob ge mā ten tsîna.”

¹⁴Tsî ǀgôan ra ǁgans tsî ǀaob tsîra ǃnâ amǃnâxas ǁkhās khamib ge ǁkhāti ǁîba ǁîra ǃnâ ge amǃnâxa, ǁōb ǀkhab nî ǁnāb, ǁōb di ǀgaiba ūhâba hîkākāse, ǁgâuab ge a ǁî,

¹⁵tsîb nî ǁnān, ǁōb di ǃaob xa ǁîn di ûihâb hoaba ǃgāsis ǃnâ ǃkhōhe hâna orese.

¹⁶ǀHomǃgāgab kom ǃkhōǃoa tamao, xaweb kom Abrahammi suriba ra ǃkhōǃoao.

¹⁷ǁNā-amagab ge anuba i, xūn hoan ǃnâb nî ǁîb di ǃgâsan ǀkha ǀguiti-īsa, ǀkhomxa tsî ǂgomǂgomsa ǀgapiprister kaib nîga, Elob tawa nî dīhe xūn ǃnâ, ǁaes di ǁoren ǃaromab nî ǂkhîbaguba dīse,

¹⁸ǁîb ǂûb ge tsân tsî ǃâitsâheb gen ǃnâb ge naun ǃâitsâhe rana a hui ǁkhā xui-ao.