Read Khoekhoegowab Hebreǁîn 3 Bible Online

Hebreǁîn 3 - Khoekhoegowab bible

Hebreǁîn 3

¹ǁNā-amaga, ǃanu ǃgâsado, ǀhomsi ǂgais ǃnâ ra amǃnâxado, ǃgaoǃgâ re, aposteli tsî ǀgapipristeri sada ǁguiǁnâs dib, Xristub Jesuba,

²ǁîba ge mâiba ǂgomǂgomsaba, Moseb ge ǁkhāti ǁîb di ommi hoaragab ǃnâ ī is ǁkhās khami.

³Xaweb ge nēba Moseb xa nētikō kai ǂkhaisi-e anu-anuhe hâ, omsa ra ǂnubib oms xa kai ǃgôasi-e ūhâs ǁkhās khami.

⁴Mâ om-i hoa-i khoe-i xa ra kuruhe xui-ao; xawe xūn hoana ge kurub ge a Elo.

⁵Tsî Moseb ge ǃoabasabese ǁîb di oms hoaragas ǃnâ ǂgomǂgomsa ge i, ǃhoahe nî xūn di mîdansa ǃoa;

⁶xawe Xristub ge ǀGôase ǂgomǂgomsa ge i ǁîb di ommi ǂûb ǂama, ǁîb di omda a sada, ǁkhoaǂgaosib tsî ǃâubasens di koasa da ga ǀams kōse ǃkhōǀgaiǀgaio.

⁷ǁNā-amaga ǃAnu Gagab ra mî khami: Nētsē, ǁîb di domma du kara ǁnâuo,

⁸ǂgaogu âdo tā karokaro, au-ausens ǃnâ i ge ī khami ǃâitsâs di tsēs ai ǃgaroǃhūb ǃnâ,

⁹sadu îgu ǃâitsâ tsî gere ôaǃnâ te ǃnubai, tsîn ge hakadisi kurigu kōse ti sîsenga gere mû.

¹⁰ǁÎ ǃkhais ǃaroma ta ge ǁnā ǃhaos ǂama ǁaixa, tsî ge mî: Hukaǀguin ra ǂgaob ǀkha ǁhapuma, tsîn ge ti daoga ǂan tama hâ;

¹¹o ta ge tita ti ǁaib ǃnâ ge nū, ti sâb ǃnân ǂgâ tide ǃkhaisa.

¹²Kōbasen re, ǃgâsado, î-i tā ǀgui-i âdo ǀnîsi ǂkhaba ǂgomoǃnâ ǂgaoba ūhâ, ûitsama Eloba xu i nî ǁnāǁgôase.

¹³Î du tsēkorobe ǁnamagu, nētsēs, ti ra mîhes kōse, î-i tā ǀgui-i âdo ǁoreb di ǂgaeǂhapusa xu karokarohe;

¹⁴Xristub ǃnâ da ge amǃnâxa xuige, mûmâinǃgâs di tsoatsoasa da ga ǀunis kōse ǃkhōǀgaipeo.

¹⁵Nēti i ga mîheo: “Nētsē, ǁîb di domma du ga ra ǁnâuo, ǂgaogu âdo tā karokaro, au-ausens ǃnâ i ge ī khami.”

¹⁶Mâna kha ge i, ǁnâun ra hîa ge au-ausenna? Hoan, Moseb xa Egipteba xu gere ǂgaeǂguiǂuihe tamana?

¹⁷Tsî mân ǂamab kha hakadisi kurigu kōse ge ǁaixa hâ i? ǁNān, ǁore gen tsî sorodi âna ǃgaroǃhūb ǃnâ ge ǁnān ǂama tamasa?

¹⁸Tsî mânab kha ge nūba, ǁîb di sâb ǃnân ǂgâ tidesa? ǁNâuǀnamoǃnân ǀgui tamana?

¹⁹Tsî da ra mû, ǂgomoǃnâsib ǃaroman ge ǂgâ ǁoa i ǃkhaisa.