Read Khoekhoegowab Hebreǁîn 4 Bible Online

Hebreǁîn 4 - Khoekhoegowab bible

Hebreǁîn 4

¹A da ǁnâi ǃao, î-i tā ǀnîsi ǀgui-i âdo, ǁîb di sâb ǃnâ ǂgâ ǁkhās di mîmâis hâ hîa, khaoǃgâ i hâse hōhe.

²Sada on ge ǂhôahe hâ amaga, naun khami; xawe aoǁnâs di mîs ge nauna xū-i xare-e hui tama ge i, ǁnâu si ran ǃnâs ge ǂgoms ǀkha ǀhao tama hâ i xui-ao.

³Sada ǂgom ra da ge sâb ǃnâ nî ǂgâ, mîb ge khami: “Ti ǁaib ǃnâ ta ge ge nū, ti sâb ǃnân ǂgâ tide ǃkhaisa. Tsîb ge ǁnāsa ge dī, sîsengu âb ge ǃhūbaib di ǃgaoǃgaosa xu dītoahe hâ i xawe.”

⁴Tsîb ge ǃkhai-i tawa hûǁî tsēs xa nēti ge ǃhoa: “Tsîb ge Eloba hûǁî tsēs ai ǁîb di sîsengu hoaga xu ge sâ.”

⁵Tsî nē ǃkhais tawa ǁkhawa: “Ti sâb ǃnân ǂgâ tide.”

⁶O i ge ra ǃgau, ǀnîn nî sâb ǃnâ ǂgâsa, tsî ǁnān, aibe ge ǃgâiǂhôasa aoǁnâbahen ge ǂgomoǃnâsib ǃaroma ǂgâ tama isa,

⁷ob ra ǁkhawa ǀnî tsēsa mîmâi: Nētsēs, nētikō ǂomxa ǁaeb khaoǃgâ Daviba xu ra mîǃâ, (ǀnai ge mîhe khami): “Nētsē, ǁîb di domma du kara ǁnâuo, sadu ǂgaoga tā karokaro.”

⁸Tsî Josuab ga ǁîna sâb ǃnâ ūǂgâ hâ io, ob ga ǁnās khaoǃgâ ǀnî tsēs xa ǃhoa tama i hâ.

⁹ǁNā-amaga i ge sâtsēs di sâ-e Elob ǁaesa ra ǃgauba.

¹⁰ǁÎ-i di sâb ǃnâ ge ǂgâ-i, ǁnā-i ge ǁkhāti ǁî-i di sîsenga xu ra sâ, Elob ge ǁîb diga xu sâ khami.

¹¹A da ǁnâi ǃhaeǃhaesen, ǁnā sâb ǃnâ da nî ǂgâsa, î-i tā ǀgui-e ǁkhā aiǁgaus ǂgomoǃnâsib dis ǃnâ ǁnā.

¹²Elob mîs a ûitsama tsî ǀgaisa xui-ao, tsîs ge hoaǃnamǀā gôab ǃgâ-ai a ǀā, tsîs ge ra ǃganu, ǀoms tsî gagas tsî uniǁaedi tsî ǂgaeb tsînas ra ǀgoraǃās kōse, tsîs ge a ǂâidi tsî ǀapeǀapedi ǂgaob didi di ǀgoraǃgâ-ao;

¹³tsî kurusabe-i xare-i ge ǁîb aiǃâ mûheǁoasa tama hâ, tsî xūn hoan ge ǀkhaiǀkhā tsî khowa-aihe hâ, ǁnāb, ǁîb xa da ra ǃhoab di mûra aiǃâ.

¹⁴Tsî kai ǀgapipristeri, ǀhomga ge ǃgûǃganub, Jesub, Elob Ôaba da ūhâ amaga, a da nē ǁguiǁnâsa ǃkhōǀgaipe.

¹⁵ǀGapipristeri, sada ǂkhabusasigu ǀkha ǀkhomǀkhomsi-e ūhâ ǁoaba da kom ūhâ tamao, xawe da kom hoa ǃkhaidi ǃnâ sada khami ǃâitsâhe hâb, xawe ǁoreoba ūhâo.

¹⁶ǁNā-amaga a da ǂhauǃnâsib ǀkha ǀkhommi di trons tawa ǃgûsī, ǀkhomxaǂgaosiba ǃkhōǃoa tsî da nî ǀkhomma hōse, î da ǂhanu ǁaeb ǃnâ huihe.