Read Khoekhoegowab Hebreǁîn 6 Bible Online

Hebreǁîn 6 - Khoekhoegowab bible

Hebreǁîn 6

¹ǁNā-amaga a da tā Xristub di tsoatsoaǁkhāǁkhāsa nēsi ǁnāxū, î da dīǀoaǀoasib ǃoa aiǃâb ǃoa ǃgû; î da tā ǁkhawa ǃgaoǃgao-e ǁgui ǁō hâ sîsenga xu ǃhobasens xa, tsî Elob ǃnâ ǂgoms xa,

²tsî ǁāǁnâdi di ǁkhāǁkhās xa, tsî ǃommi ǁgui-ais xa, tsî ǁō hân di khâis xa, tsî ǀamo ǀgoraǃgâs xa.

³Tsî da ge ǁîsa ǁkhāti nî dī, Elob ga mā-amo.

⁴Īǁoasa i kom ao, ǁnān ǀgui ǃnāsa ge ǃnâǃnâhen, tsî ǀhommi hōsa tsâtsâ hân, tsî ǃAnu Gagab ǃnâ ge amǃnâxan,

⁵tsî ǃgâi mîs Elob dis tsî ǃgoaxa ǃhūbaib di ǀgaiga ge tsâtsân,

⁶ǁîn ga ǁnāǁgôao, ǁîn nî ǁkhawa ǃhobasens ǃoa ǀasaǀasahe ǃkhaisa, ǀasa-amen ra Elob Ôaba ǃgâubasen tsî ǃharaxūsa xūse dībasen amaga.

⁷ǃHū-i ǃnuriǃnāde ǁî-i ǂama ra hā ǀapiba ra ā-i, tsî ǁî-e ra sîsen khoena harebesa ǁhaona ra ūǀkhība-i, ǁnā-i ge Eloba xu ǀkhaeba ra hō;

⁸xawe ǁkhūn tsî ǀkhininin tsîna ra ūǀkhī-i, ǁnā-i ge ǁkhoatsama tsî ǀâxarexūhesa ǀgū hâ; ǁî-i di ǀams ge khauǃkhūhesa.

⁹Xawe ge ge sadu ǀnamsabedo xun ǃnāsa ama-ai xūna nî hâsa ra ǂgom ǃgâiǃōsib ǃoa garuna nēti ge ra mî xawe;

¹⁰Elob ge ǂhanuoǃnâ tama xui-ao, ob ge sadu sîsenni tsî ǀnammi di xūreba ǀuru tide, ǁîb ǀons ǃnâ du ge ǁgauba, ǃanuna du gere ǃoaba tsî ganupe ra ǃoabas ǀkha.

¹¹O ge ge ra ǂgao, a-i mâ-i hoa-i âdo ǁkhā ǃhaeǃhaesensa ǁgau, î-i ǃâubasensa ǀoa hâse ǀunis kōse sâu;

¹²ǀopesa du tidese, tsî du nî ǁnān, ǂgoms tsî ǃnūǃnâxasiba xu mîmâide ge ǀumin di ǁgaeǁgae-ao kaise.

¹³Elob ge Abrahamma mîmâibao, ob kom ǁîb ǃgâ-ai kaib, ǁîb tawab nî nūbab ge ūhâ tama hâ i amaga, ǁîb ǂûb tawa nū,

¹⁴tsî ge mîo: “Amase, tita ge ǃkhū hâse nîra ǀkhae tsi, tsî kaise ta nîra ǂguiǂgui tsi.”

¹⁵Ob ge ǁnāti ǃnūǃnâxase ǃâu, tsî mîmâisa ge hōbasen.

¹⁶Khoen kom ǁîn ǃgâ-ai kai-i tawa ra nūo, tsî nūs, ǀgaiǀgais ase ra dīhes ge ǁîna ǃhoaǃoagus di ǀamse ra ība.

¹⁷ǁNā-amaga, Elob ge mîmâis di ǀumi-aoba ǃnāǂamsase ǁgau ǂgao-o, ǁîb di ǂâibasens ǁnope tide ǃkhaisa, ob ge nū-i ǀkha ǁaegub ǃnâ ge hā.

¹⁸Î da ga ǀgam ǁnoweǁoasa xūra, ǁîra ǃnâb Eloba ǂhumi ǁoara ǃnâ ǀgaisa ǁkhaeǂgao-e ūhâ ti, sada ǁhâsī geda, tsî ǁkhau-ūhe da ge ǃâubasensa ra ǃkhōǀgaipeda;

¹⁹ǁîsa da ǀoms di ǃkhōmâixūse ūhâs, ǁaposa tsî ǀgaisas, tsî ǁkhāti ǂgāmâisab ǃnâ ra ǃgûǂgâsa;

²⁰ǁîb ǃnâb ge Jesub ai-aiba-aoba sada ge ǃgûǂgâba, Melxisedeki di dommi ǃoa ge ǀamosib kōse ǀgapiprister kaiba.