Read Khoekhoegowab Hebreǁîn 7 Bible Online

Hebreǁîn 7 - Khoekhoegowab bible

Hebreǁîn 7

¹Nē Melxisedeki ge Salems tawa gao-ao tsî Hoan xa ǀGapib di prister ge i, Abrahamma ge ǃgûǃoab, gao-aoga ǃkhamdā tsîb ge hāo, tsî ǁîba ge ǀkhaeb,

²Abrahammi ge ǁkhāti ūb hân hoan di disiǁî ǃâsa ǀgorababa. ǁÎb ge ǂgurosa ǂhanu-aisib di gao-ao; ti ra ǂnûiǃkhunihe; tsî ǁnās khaoǃgâb ge ǁkhāti Salems di gao-ao, ǁnāb ge ǂkhîb di gao-aoba;

³ǁgûo, surio, tsî ûitsēdi di tsoatsoa-i tsî ǀam-e ūhâ tamab; tsîb ge Elob Ôab ǀkha ǀguiti-ī, tsîb ge pristerse nîra hâ ǀamosib kōse.

⁴Kō ǁnâi re, matikōseb a kai ǃkhaisa, nēb, abo Abrahammi ge ǁkhāti disiǁî ǃâs ǁkhâuǁnâs disa māba.

⁵Tsî Levib ôan digu pristersisa ra hōgu ge mîmā-e ūhâ, ǁaes, ǁnās ge ǁîgu di ǃgâna xu gu nî ǂhanub ǃoa disiǁî ǃâsa ūsa, Abrahammi di kamanaba xun ge ǀkhī xawe;

⁶xawe ǁnāb, ǁîn ǃhaos di tama ge ib ge Abrahamma xu disiǁî ǃâsa ū, tsî ǁnāb mîmâisa ge ūhâ iba ge ǀkhae.

⁷O i ge hoaragase ǃhoaǃoaheǁoasa, ǂkharib ra ǃnā bi hâb xa ǀkhaehesa.

⁸Tsî amase nēpan ge ǁō nîse ī khoena disiǁî ǃâsa ra ū; xawe ǁnāpab ra ǀguib, ûib hâ, ti ra ǀhûǀguitimîbaheba ū.

⁹Tsî nēti ta ga mî ǁkhā, ob ge ǁkhāti Levib, disiǁî ǃâsa ra ūba Abrahammi ǃnâ disiǁî ǃâsa ge mā;

¹⁰goroseb ge ǁgûb di kamanab ǃnâ hâ i xui-ao, Melxisedeki ge ǃgûǃoa bi ǃnubai.

¹¹ǀOasasib ga Leviǁî pristersisa xu īo (ǁîs ǃnâs ge ǁaesa ǂhanuba hō xui-ao), tarexa i kha ǂhâbasa, mîhe nîsa, Melxisedeki di dommi ǃoab nî ǀkhara pristeri, Aronni dommi ǃoa hâ tamaba khâi ǃkhaisa?

¹²Pristersis ga ǀkharaǀkharaheo, o i kom ǂhâbasao, ǂhanub on nî ǀkharaǀkharahesa;

¹³ǁnāb, ǁîb xan ra nēna mîheb ge a ǀkhara ǃhaos di xui-ao, ǁîsa xu i tātsē khoe-i xare-e altarsa ǃoaba tamasa.

¹⁴ǂHaisa i komo, sada ǃKhūb ge Judab ǃhaosa xu ǀkhīsa, ǁî ǃhaos xab ge Moseba pristersis xa xū-i xare-e mî tama hâ.

¹⁵Tsî ǃnā hâse i kom a ǂhaisao, Melxisedeki di dommi ǃoab ga ǀkhara pristera khâio.

¹⁶ǁGansi ǂnûiǂgās di ǂhanub ǃoa pristerse dīhe tamab, xawe kāǁoasa ûib di ǀgaib ǃoa;

¹⁷nēti ǁîb xa ra ǀhûǀguitimîhe xui-ao: Sats ge pristertsa ǀamosib kōse Melxisedeki dommi ǃoa.

¹⁸ǁÎb ǀkhas ra aibekam mîmāsa ǁaudīhe, ǂkhabusa tsî harebeoǃnâs ge i amaga;

¹⁹(ǂHanub ge xū-i xare-e dīǀoaǀoa ǁoa i xui-ao), tsîs ge naus ǃgâ-ai ǃgâi ǃâubasensa ra ǂgaeǂguiǂgâhe, ǁîs ǀkha da Eloba ra ǀgūsa.

²⁰Tsî i ge nū-i ose ī tama ge i (naugu ge nū-i ose prister kai xui-ao;

²¹xawe nēb nū-i ǀkha, ǁnāb, nēti ǁîb ǃoa ra mîba xu: “ǃKhūb ge ge nū, tsîb ge ǃhausen tide: Sats ge pristertsa ǀamosib kōse Melxisedeki dommi ǃoa.”)

²²Ob ge Jesuba ge nētikōse ǃnā hâ ǃgaeǀhaos di mâba-ao kai.

²³Tsî naugu xa gu ge ǂguiga ge prister kai, ǁōb xa gu ge ǂhanihe amaga, hugaǀgui gu nî hâsa;

²⁴xawe nēb, ǀamosib kōseb ra hâ amagab ge kāǁoasa pristersisa ūhâ;

²⁵ǁî ǃkhais ǃaromab ge ǁkhāti ǁîba xu Elob ǃoa ra hān hoana hoaragase a ǃgâiǃō kai ǁkhā, hugaǀguib ûi hâ xui-ao, ǁînab nî ǀgorebase.

²⁶Nēti ī ǀgapipristeri sada anuba hâ xui-ao, ǃanub tsî ǀhapiob tsî ǂnao-ob tsî ǁore-aona xu khaihe hâb, tsî ǀhommi ǂamai a ǀgapiba;

²⁷nau ǀgapipristergu khami ǂhâba tama hâba, aibeb nî ǁîb di ǁoren ǂûn ǃaroma ǁguibade ǁguibasa, tsî ǁnās khaoǃgâ ǁaes din ǃaroma; ǁîsab ge ǀgui ǃnās ama dī xui-ao, ǁî-aitsamab ge ǁguibasen ǃnubai.

²⁸ǂHanub ge ǂkhabusasiba ūhâ khoega ǀgapipristerse ra ǂnûiǂgā xui-ao; xawe nūs di mîs, ǂhanub khaoǃgâ ge īs ge ǀGôab ǀamosib kōse ǀoasaba ra ǂnûiǂgā.