Read Khoekhoegowab Hebreǁîn 8 Bible Online

Hebreǁîn 8 - Khoekhoegowab bible

Hebreǁîn 8

¹Tsî ǃkhōǀhaos mî ge ran dis ge nēsa: Nēti ība da ǀgapipristerse ūhâ, ǀhommi ǃnâ hâ trons kaisib dis di amǀkhāb ǁôab ai ǂnôab,

²ǃanusib di ǃoabasabeb tsî ama-ai tabernakeli dib, ǃKhūb ge ǂnubikhâib, tsî khoe-e tama.

³Mâ ǀgapipristeri hoab ge ra ǂnûiǂgāhe, hōdi tsî ǁguibadi tsînab nî ǁguibase; o i ge ǂhâbasa ge hâ i, nēb on nî ǁguibab nî xū-e ūhâsa.

⁴ǃHūbaib aib ga hâo, ob ga prister tama i hâ, ǁnāpa gu ǂhanub ǃoa ǁguibade ra ǁguiba pristerga hâ xui-ao;

⁵ǁgaeǁgaes tsî ǀhommi din di somma ra ǃoabagu, elosi ǃereams ge Moseb ǃoa mî khami, tabernakelab nî dītoa ǃnubai: “Kō, tib ra mî, îts hoana ǃhommi aits go ǁgauhe aiǁgaus ǃoa dī.”

⁶Xawe nēsib ge nētikōse ǃnā hâ ǃoabasa ge hō, naus xa ǃgâi ǃgaeǀhaos, naudi xa ǃgâi mîmâidi ai ǀgaiǀgaihe hâs di mâba-aob ges kōse.

⁷Nau ǂguros ga ūose io, os kom ga ǀgamǁîsa ǃkhaisa ôabahe tama i hâo.

⁸ǁÎnab ra ǃgabe hîab ra mî xui-ao: Mû, tsēdi ge nîra hā, tib ra ǃKhūba mî, o ta ge Israeli ommi ǂama, tsî Judab ommi ǂama ǀasa ǃgaeǀhaosa nîra dī;

⁹ǁnā ǃgaeǀhaos khami ī tamas, ǁîn di îgu ǀkha ta ge dīsa, ǁîgu ǃomma ta ge ǃkhō tsēs ai, Egipteǃhūba xu ta nî ǁîga ǂgaeǂguiǂuise. ǁÎgu ge ti ǃgaeǀhaos ǃnâ hâhâ tama i amaga ta ge ǁkhāti ǁîga ǃgôa tama hâ, tib ra ǃKhūba mî.

¹⁰Nēs ge ǃgaeǀhaos, Israeli ommi ǀkha ta nîra ǁnā tsēdi khaoǃgâ dīsa, tib ra ǃKhūba mî: Ti ǂhanuga ta ǁîn di ǂâis ǃnâ nîra mā, tsî ǁîn di ǂgaogu ǃnâ ta ǁîga nîra xoaǂgā; tsî ta ge tita nîra ǁîn di Elo, tsîn ge ǁîna nîra ti ǁae.

¹¹Tsîn ge mâ-i hoa-e ǁî-i ǀgūkhoe-e, tsî mâ-i hoa-e ǁî-i ǃgâsa-e ǁkhāǁkhā tide tsî: ǃKhūba ǂan re! ti mî tide. Hoatsaman tita nîra ǂan xui-ao, hoan xa ǂkhari-i âna xu hoan xa kai-i ân kōse.

¹²ǁÎn di ǂhanuoǃnâsiga ta nîra ǀkhomxa, tsî ǁîn di ǁoren xa ta ǃaruǀî ǂâi tide xui-ao.

¹³ǀAsa ǃgaeǀhaos, tib ra mî hîab ǂgurosa ra ǀoro kai. Tsî ǀoro kaihe hâ-i ge hîkākāhesa a ǀgū-e.