Read Khoekhoegowab Hebreǁîn 9 Bible Online

Hebreǁîn 9 - Khoekhoegowab bible

Hebreǁîn 9

¹Tsîs ge ǀnai ǂguro ǃgaeǀhaosa eloǃoabas di ǂhanugu tsî ǃaugasi ǃanusiba ge ūhâ i;

²tabernakeli ǂgurob ge ǁāǁāhe hâ i xui-ao, ǁîb ǃnân ge kandelari tsî tāb tsî ǁgauperegu tsîna ge hâ i; ǁîb ge ǃanub ti ra ǂgaiheba.

³Tsî ǀgamǁî ǂgāmâisab ǃgâb aib ge tabernakela ge hâ i, hoan xa ǃanub ti ra ǂgaiheba;

⁴ǁîb ǃnân ge hâ i: ǃHuniǀuriǀanǀansoas, tsî ǃgaeǀhaos di ǂgaes, hoaragase ge ǃhuniǀurib ǀkha ǃkhûǃgâhe hâ is, ǁîs ǃnân ge ǃhuniǀurixapas, manab hâǃnâs tsî Aronni haib ǀom geb tsî ǃgaeǀhaos di xoa-aidara tsîna ge hâ i;

⁵tsî ǁîs ǂamǃnâkha ge xerukha ǂkhaisib dikha, ǀkhommi tronsa ra somsomǂamkha ge hâ i; ǁî xūn xa i ge nēsi ǀguiǀguibes ai ǃhoahe ǁoa.

⁶Tsî nēn nēti ǂhomihe hâ hîa gu ge pristerga hugaǀgui ǂguro tabernakeli ǃnâ gere ǂgâ, eloǃoabasa gu nî dīse;

⁷xawe ǀgamǁîb ǃnâb ge ǀgapipristeri ǀguiba kurikorobe ǀgui ǃnās ǀguisa gere ǂgâ, ǀaob ose tama, ǁîbab ge ǁîb ǂûb tsî ǁaes di ǃûǂamdi ǃaroma ǁguibaba;

⁸tsî nēs ǀkhab ra ǃAnu Gagaba ǁgauǂui, ǃanusib ǃoa garu daob ganupe ǂhaiǂhaihe tamasa, ǂguro tabernakeli ga mâs kōse:

⁹Nē hâ ǁaeb di ǁgauǁgaub ge ǁîba i, ǁîb ai di ge hōdi tsî ǂāǁguibadi tsîna gere ǁguibaheb, ǃoabasa ra dī-i di ǂâisa dītoa ǁoana;

¹⁰ǂûs tsî ās ǀguis ǃnâ mâna, tsî ǃkharaga ǁāsen-aidi ǃnâ, tsî ǃaugakam ǂhanu-aisigu ǃnâ, dī-unus ǁaeb nî hās kōse ǁgui-aihe hâna.

¹¹Xawe Xristub ge ǃgoaxa xūn di ǀgapipristerse ge hā, tsîb ge naub ǃgâ-ai kai tsî dītoahesa tabernakeli, ǃomgu ǀkha dīhe tamab, ǁnāb nē kurus di tamab,

¹²tsî ǁkhāti pirigu tsî tsâugu tsîn di ǀaob ǀkha ǂgâ tama i, tsîb ge ǀgui ǃnās ǀguisa ǁîb di ǀaob ǂûb ǀkha ǃanusib ǃnâ ǂgâ, tsî ǀamo ore-e ge hā-ū;

¹³ǁgōgu tsî pirigu di ǀaob tsî ǂkham gomas di tsaob, ǃanuoǃnân ra ǀgapi-ūheb ga ǁgans di ǃanuǃanusens ǃoa ǃanuǃanuo,

¹⁴matikō ǃnā hâseb Xristub, ǁî-aitsama ūose ǀamo Gagaba xu Eloba ge ǁguibasenni di ǀaoba sadu ǂâide ǁō hâ sîsenga xu nîra ǃanuǃanu, ûitsama Eloba du nî ǃoaba ǁkhāse?

¹⁵Tsî ǁîs ǃaromab ge a ǀasa ǃgaeǀhaos di mâba-ao, în ga ǂgaihesana, ǁō-i ge hās khaoǃgâ ǂguro ǃgaeǀhaos ǃnâ ge hâ i ǃûǂamde xu orehesa ǃoa, mîmâihesa ǀamo ǀumisa hō ti.

¹⁶ǃGaeǀhaos hâpa, ǁnāpab nî ǃgaeǀhaosa ge dīb di ǁōba ǂanǂanhe xui-ao.

¹⁷ǃGaeǀhaos kom ǁō hân ǀguin ǂama a sîsenxa, ǃgaeǀhaosa ge dīb ûi hâ hîas ǀgai-e ūhâ tama amaga.

¹⁸ǁNā-amagas ge ǂguro ǃgaeǀhaosa ǁkhāti ǀaob ose khaihe tama ge hâ i.

¹⁹Mîmādi hoadeb ge Moseba ǂhanub ǃoa ǁaes hoas ǁga ǃhoatoao, ob ge tsâugu tsî pirigu di ǀaob xa ū ǁgam-i tsî purpurǀûn tsî hisob tsîn ǀkha, tsî ǂkhanis ǂûs tsî ǁaes hoasa ǀgapi-ai,

²⁰tsî ge mî: Nēb ge ǀaob ǃgaeǀhaos dib, Elob ge mîmā duba.

²¹Tsî tabernakeli tsî eloǃoabas di sîsenūdan hoan onab ge ǁnās ǁkhās xase ǀaob ǀkha ge ǀgapi-ai.

²²Tsî ǁaupe xūn hoan ge ǂhanub ǃoa ǀaob ǀkha ra ǃanuǃanuhe tsî ǀaoǂnâxūs ose i ge ǀûba-i xare-e ī tama hâ.

²³O i ge ge ǂhâbasa i, ǀhommi xūn di aiǁgaun nî nēti ī xūn ǀkha khaihesa; xawe ǀhommi xūn ǂûn ge nēn xa ǃgâi ǁguibadi ǀkha nî khaihe;

²⁴Xristub ge ǃomgu ǀkha dīhe hâ ǃanusib, ama-aib dib ǃoa-ai ge hâ ib ǃnâ ǂgâ tama i, tsî ǀhommi ǂûb ǃnâ ǂgâ xui-ao, Elob di ais aiǃâb nî sada ǃaroma ǂhaiga;

²⁵tsîb nî ǁkhāti ǂgui ǃnāde ǁguibasense tama, ǀgapipristeri kurikorobe ǁîb ǂûb di tama ǀaob ǀkha ǃanusib ǃnâ ra ǂgâ khami;

²⁶ǁnāti ga ī tama io, ob ga ǃhūbaib di ǃgaoǃgaosa xu ǂgui ǃnāde tsâ hâ; xaweb ge nēsi ǃhūbaib di ǀuniga ǁaegu ǃnâ ǀgui ǃnāsa ge ǂhai, ǁorenab nî ǁaudīga ǁî-aitsama ǁguibasens ǀkha.

²⁷Tsî khoen ǀgui ǃnās ǀguisa ǁōsa mâibahe hâ khami, tsî ǁnās khaoǃgâ ǀgoraǃgâsa,

²⁸ǁnās ǁkhās xaseb ge ǁkhāti Xristuba ǀgui ǃnās ǀguisa ǁguibahe hâ, ǂguin di ǁorenab nî ūbēse, tsîb ge ǀgamǁî ǃnās ai ǁore-i ose ǃgâiǃōsib ǃoa nîra ǂhaiǂhaisenba ǁnān, ǁîba ra ǃâubasenna.