Read Khoekhoegowab Jakobub 1 Bible Online

Jakobub 1 - Khoekhoegowab bible

Jakobub 1

¹Jakobuta, Elob tsî ǃKhūb Jesub Xristub di ǃgāta, disiǀgamǀa ǃhaodi ǀgaruǀgarusib ǃnâ hâdi ǃoa: ǃGâiaǂgao re!

²ǃGâiaǂgaob ǀguib ase ūhâ re, ti ǃgâsago, ǂguiǃnâgu ǃâitsâdi ǃnâ du ga ǁnāo;

³î du ǂan, sadu ǂgoms di ǃâitsâhes taniǀnamxasiba ra hā-ū ǃkhaisa.

⁴Tsî taniǀnamxasiba ab dīǀoaǀoasase sîsenni âba dī, î du dīǀoaǀoasa tsî hoaragase ǂhau, î du xū-i xare-i ǃnâ tā tôasi.

⁵Tsî ǀgui-i â du ga gā-aisiba tôasio, a-i Elob tawa ǂganbasen, mâ-i hoa-e ǀguiǃnâxase ra māb tsî ǂgōǀau tamaba, o i ge nîra māhe.

⁶Xawe a-i ǂgoms ǃnâ ǂganbasen, î-i tā xū-i xare-i ǃnâ îganǀgē; îganǀgē ra-i hurib ǃgabi-i, ǂoab xa ra doeǁgarihe tsî ǂnapimahe-i khami ī xuige.

⁷ǁNāti ī khoe-e a-i tā ǂâi, xū-e i nî ǃKhūba xu hōsa.

⁸ǃHonariǂgaoxa khoe-i ge ǁî-i daogu hoagu ǃnâ a ǁae-oǃnâ.

⁹Xawe ǃgamǃgamsensa ǃgâsaba ab ǁîb di ǀgapib xa koasen,

¹⁰tsî ǃkhū hâba ǁîb di ǃgamsib ǃnâ; ǀgâb di ǀkhuru-i xaseb nîra kā xuige.

¹¹Sores ge ǀgamsib âs ǀkha ǁhaio, ob ge ǀgâba ge ǂnâ, tsî ǀkhurub âb ge ǁnā, tsî îsa īsib âb ge kā; ǁnās ǁkhās khami i ge ǃkhū hâ-e ǁkhāti nî ǃū ǁî-i di daogu ǃnâ.

¹²ǃGâiǃō i ge hâ ǁnā khoe-i, ǃâitsâba ra tani-e; mâhō i kao, o i ûib di kronsa nîra hō xui-ao, Elob ge ǁîba ǀnam hâna mîmâibasa.

¹³Khoe-i xare-i, ǃâitsâhe i karao, a-i tā mî: Elob xa ta ra ǃâitsâhe. Elob ge ǂkhabab ǀkha a ǃâitsâhe ǁoa xuige, tsîb ge ǁîb ǂûba khoe-i xare-e ǃâitsâ tama hâ;

¹⁴xawe mâ-i hoa-i ge ra ǃâitsâhe, ǁî-i di turab ǂûb xa i ra ǂgaeǁnâhe tsî nanaheo;

¹⁵ǁnās khaoǃgâ, turab ga ǃkhōǃoao, ob ra ǁoreba ǁora; tsî ǁoreb ga dītoaheo, ob ra ǁōba ǁora.

¹⁶Tā ǁhapu, ti ǀnam ǃgâsado.

¹⁷Mâ ǃgâi hō-i tsî mâ dīǀoaǀoasa hō-i hoa-i ge ǀgapiseba xu ra ǁgôaxa, ǃnâgu di ǁGûba xu, ǁîb ǃnâ ǀkharasi-i xare-i tsî dawaǃkhupusens di som-i xare-i hâ tamaba.

¹⁸ǁÎb di ǂâis ǃoab ge sada ge hōbasen mîs amab dis ǀkha, î da ga sada ǁîb kurusaben di ǂguro.

¹⁹ǁNā-amaga, ti ǀnam ǃgâsado, mâ khoe-i hoa-e a-i ǃhae ǁnâu i nîsa, î-i ǁgarasa ǃhoa i nîsa, î-i ǁgarasa ǁaixa i nîsa,

²⁰khoeb di ǁaib Elob di ǂhanu-aisiba sîsen tama xuige.

²¹ǁNā-amaga ǀurixasib hoab tsî ǂkhabasib di ǃnāǂamsib hoaba ǁguiǁnâ, î du tsamtsiǃnâsib ǀkha mîs, sadu ǃnâ ra ǂgāhes tsî sadu ǀomde ǃgâiǃō kai ǁkhāsa ǃkhōǃoa.

²²Mîs di dī-ao kai re, î du tā ǁnâus ǀguisa hî, î du tā ǁî-aitsama garasen.

²³Khoe-i ga mîsa ǁnâus ǀguisa hî, tsî i ga dī-ao tama io, ǁnā-i ge khoeb khami ī, ǃnae-ūb hâ aisa mûsenxūs ǃnâ ra kōba;

²⁴ǁî-aitsamab ge kōseno, ob bē tsî ǁnātimîsi ge ǀuru, matib īsa xui-ao;

²⁵xawe dīǀoaǀoasa ǂhanub ǃnorasasis dib ǃnâ ra mûǂgā-i, tsî ǁîb ǃnâ ra hâhâ-i, tsî ǀuruxa ǁnâu-ao tama-i, tsî sîsenni di dī-ao-i, ǁnā-i ge nî ǃgâiǃō ǁî-i di dīs ǃnâ.

²⁶ǀGui-i âdu ga ǂâi, eloǃoabasa-i a ǃkhaisa, tsî i ga ǁî-i namsa ǃkhōǀgara tama io, tsî i ga ǁî-i ǂgaoba garao, ǁnā-i di eloǃoabas ge a ǁau.

²⁷Elob tsî ǁGûb aiǃâ ǃanu tsî ǂnao-oǃnâse ī eloǃoabas ge nēsa: ǃOaǀgôan tsî ǃoataradets ga ǁîn di ǁgâiǀāb ǃnâ sari, tsîts ga sa-aitsama ǃhūbaiba xu ǂnaoǂnaosens ose sâuseno.