Read Khoekhoegowab Jakobub 2 Bible Online

Jakobub 2 - Khoekhoegowab bible

Jakobub 2

¹Ti ǃgâsado, ǂgoms sada ǃKhūb Jesub Xristub, ǃKhūb ǂkhaisib dib disa tā khoe-i aisa kōǀîs ǀkha ūhâ.

²Khoeb ga sadu ǀhaos ǃnâ ǂgâxa ǃhuniǀuri ǀkhunuǂnûida-i tsî anu-anusa sarab ǀkha, tsîb ga ǁkhāti ǀgâsaba ǁkhoatama sarab ǀkha hāo,

³tsî du ga anu-anusa saraba tani hâba kōǀî, tsî du ga ǁîb ǃoa mîo: Satsa nēpa ǃgâi ǃkhai-i ai ǂnû! tsî du ga ǀgâsab ǃoa mîo: ǁNāpa mâ! Nēpa ǂnû ti ǂaimâi-aidas ai!

⁴ǀGorasa du kha sadu ǃnâ dī tama hâ, tsî ǂkhaba ǂâiǂâisendi di ǂhanuǂhanu-ao kai tama du kha hâ?

⁵ǁNâu re, ti ǀnam ǃgâsado, Eloba kha nē ǃhūbaib di ǀgâsana ǃkhōǂuibasen tamab hâ, ǂgoms ǃnâ ǃkhū tsîn nî gaosib, ǁîba ǀnam hânab ge mîmâibab di ǀumi-ao kaise?

⁶Xawe du ge sado ǀgâsaba ge sora. ǃKhū hâ tamana kha ǁnān, sado ra dān, tsî sado ǂhanuǂhanu-aogu aiǃâ ra ǂgaina?

⁷ǁÎ tamana kha ǁnān, ǃgâi ǀons, ǁîs ǀkha du ra ǂgaihesa ra ǃkhāǃkhāna?

⁸Gao-aosi ǂhanuba du ga dīǀoaǀoao, xoas ǃoa: “Sa ǀgūkhoebats ge sats ǁkhāts khami nî ǀnam,” o du ge ǃgâise ra dī;

⁹xawe khoe-i aisa du ga kōǀîo, o du ge ǁoreba ra dī, tsî du ge ǂhanub xa ǃûǂamaose ra ǁkharahe.

¹⁰Khoe-i ga ǂhanub hoaba ǃkhōǀgaipe, tsî i ga ǀgui xū-i ǃnâ dīsā, o i ge hoan tawa a ǀhapixa.

¹¹“ǃGamebats ge khôa tide,” ti ge mîb ge ǁkhāti: “ǃGamts ge tide!” ti ge mî. O ǃgamekhôa tamats ga i xawets ga ǃgamo, ots go ǂhanub di ǃûǂamao kai.

¹²Nēti ǃhoa, î nēti dī ǂhanub ǃnorasasis dib ǀkha nîra ǂhanuǂhanuhedu ase;

¹³ǀkhomoǃnâ ǀgoraǃgâ-i ge ǀkhomxaǂgaosi-e dī tama-i ǂama nîra hā xuige; tsî ǀkhomxaǂgaosib ge ǀgoraǃgâs ǃoa-ai ra koasen.

¹⁴Tare-e nî harebe, ti ǃgâsado, khoe-i ga: ǂGomsa ta ūhâ ti mî, tsî i ga sîsenga ūhâ tama io? ǂGomsa kha ǁî-e ǃgâiǃō kai ǁkhā?

¹⁵O ǃgâsab ga, ǃgâsas ga ǀōǀkhā hâo, tsîn ga tsēkorobe ǂû-e tôasio,

¹⁶tsî khoe-i sadu di-i ga ǁîna ǃoa: ǂKhîb ǃnâ ǃgû, sâ î du ǁâ ti mî tsî i ga ǁîna soros di ǂhana mā tama io, tare-e kha nî harebe?

¹⁷ǁNās ǁkhās xases ge ǁkhāti ǂgomsa ǁîs ǂûs ǃnâ ǁō hâ, sîsengas ga ūhâ tama io.

¹⁸Xawe khoe-i ga mî: Sats ge ǂgomsa ūhâ, o ta ge tita sîsenga ūhâ; sa ǂgomsa sîsengu âtsa xu ǁgau te, o ta ge tita tsîna ti sîsenga xu ti ǂgomsa nî ǁgau tsi.

¹⁹Sats ge ra ǂgom, ǀgui Elob a ǃkhaisa. ǃGâisets ra dī. ǁGâuagu on kom ra ǂgom tsî ǀkhūo.

²⁰Tsî ǂan ǂgaots ra, gâre khoetse, ǂgoms sîsengu ose ǁō hâsa?

²¹Abob Abrahammi, sîsenga xu ǂhanu-ai kaihe tamab hâ, ǁîb di ôab Isakab ge altars ai ǁguiba ǃnubai?

²²Ots kom ra mûo, ǂgoms ge sîsengu âb ǀkha sîsenǀhao ǃkhaisa, tsî ǂgoms ge sîsenga xu ǀoa ǃkhaisa.

²³Os ge xoasa ge ǀoa, nēti ra mîsa: “Tsî Abrahammi ge Eloba ge ǂgom, ob ge ǁîsa ǂhanu-aisise ge ǃgôabahe,” tsîb ge Elob khoese gere ǂgaihe.

²⁴O du kom ra mûo, khoe-i sîsenga xu ra ǂhanu-ai kaihesa, tsî ǂgoms ǀguisa xu tama.

²⁵Tsî ǁnās ǁkhās khami ǀai-aos Raxasa, sîsenga xus kha ǂhanu-ai kaihe tama hâ, sîsabega ǃkhōǃoa tsîs ge ǁîga ǀkhara daoba-ū ǂoa kai ǃnubai?

²⁶Soros gagas ose ǁō hâs ǁkhās khamis ge ǁkhāti ǂgomsa sîsengu ose ǁō hâ.