Read Khoekhoegowab Jakobub 3 Bible Online

Jakobub 3 - Khoekhoegowab bible

Jakobub 3

¹Tā ǂgui ǁkhāǁkhā-ao kai re, ti ǃgâsado, î du ǂan, ǁnās ǃgâ-ai kai ǀgoraǃgâ-e ge nîra hō ǃkhaisa.

²Kaise da kom xūn hoan ǃnâ ra ǃnôao; khoe-i, mîs ǃnâ dīsā tama-i ge dīǀoaǀoasa khoe-e, soros hoasa ǃkhōǀgara ǁkhā hâ-e.

³Mû, hāna da ge tomde ra ǂgâ-amǃnâ, sadan nî ǁnâuǀnamga, tsî da ge ǁîn ǀkha soros ân hoasa ra ǂgae-ūnu.

⁴Mû, ǁkhāti doe-omga, matikōse gu a kai tsî ǃgom ǂoagu xa ra doeǁgamahe, xawe gu ge ama ǂkhari ruri ǀkha ra unuhe, ǂgaeǂgui-aob ra ǂgao ǀkhāb hoab ǃoa;

⁵nētis ge namsa ǁkhāti a ǂkhari uniǁaero, xawes ge kai xūn xa ra koasen. Kō, ǂkhari ǀaero-e, matikō kai haiǀgomsa i a ǂhubi ǁkhā ǃkhaisa!

⁶Tsî nams on ge a ǀae, ǂkhabab xa ǀoa hâ ǃhūbaisa. Nētis ge namsa sada uniǁaedi ǃnâ ge mâihe, os ra soros hoasa ǂnaoǂnao, tsî ǂūsib di ǀnūsa ra ǂhubi, tsîs ra ǁîsa ǀamo ǀaeba xu ǂhubihe.

⁷Mâ ǂūsi-i hoa-i ge ra ǂauǂauhe, ǀgurun di-i karao, anin di-i karao, ǂhana ran tsî hurib ǀgurun di-i karao, tsî i ge ǀnai khoeb di ǂūsiba xu gere ǂauǂauhe;

⁸xawe namsa i ge khoe-i xare-e a ǂauǂau ǁoa, ǁnā dāhe ǁoasa ǂkhabas, ǁōǁōsa ǃgāb xa ǀoa hâsa.

⁹ǁÎs ǀkha da ǃKhūb tsî ǁGûba ra kare, tsî ǁîs ǀkha da khoen, Elob īb ǃoa ge kuruhena ra ǀâxare.

¹⁰ǁKhā amsa xu kha ra ǂoaxa ǀkhaeb tsî ǀâxareb tsîkha. Tā as ǁnāti ī, ti ǃgâsado.

¹¹ǀAu-e kha ǀgui mû-e xu ǂkhon-e tsî au-e ra ôa?

¹²Īǁkhā i a, ti ǃgâsado, ǀnomahais nî ǀkheraǂûna ūǀkhīsa, tsî ǂauxûiǂûhaisa ǀnomaǂûna? ǁNās ǁkhās khami i ge ǀau-i xare-e ǀū tsî ǂkhon ǁgam-e a ūǀkhī ǁoa.

¹³Tari-e kha sadu ǃnâ gā-ai tsî ǁnâuǃāxa? A-i ǁî-i ǃgâi tanisensa xu ǁî-i sîsenga ǁgau tsamtsiǃnâ gā-aisib ǃnâ.

¹⁴Xawe au surib tsî ǀguriǂâibasens tsîra du ga ǂgaob ǃnâ ūhâo, tā koasen î tā amab ǃoagu ǂhumi.

¹⁵Nē gā-aisib ge ǀgapiseba xu ǁgôaxa tama; tsîb ge a ǃhūsi tsî ǂūsi tsî ǁgâuasi;

¹⁶surib tsî ǁîǁâsens tsîra hâpa, ǁnāpa i ge domoǃnâsib tsî mâ ǂkhaba dī-i hoa-e hâ.

¹⁷Xawe ǀgapiseba xu hâ gā-aisib ge ǂgurose a ǃanu, ǁnās khaoǃgâ ǂkhîxaǃnâ, tsauraǃnâ, mîbakaisenxa, ǀkhomxaǂgaosib tsî ǃgâi ǂûn xa ǀoa hâ; tsîb a ǂhauǃnâ tsî hînaoǃnâ.

¹⁸Tsîb ge nē ǂûtanib ǂhanu-aisib diba ǂkhîbagusa ra dīna ǂkhîb ǃnâ ra tsorobahe.