Read Khoekhoegowab Jakobub 4 Bible Online

Jakobub 4 - Khoekhoegowab bible

Jakobub 4

¹Mapa xu gu kha torogu tsî ǃkhamgu tsîga sadu ǃnâ ra hā? Nēsa xu tamasa, sadu turagu, uniǁaedi âdu ǃnâ ra ǃkhamga xu?

²Tura du ra, xawe du ūhâ tama hâ; ǃgam tsî du ra suri, xawe du ge a hō ǁoa; ǃkham tsî du ra torodī, xawe du ūhâ tama hâ, ǀgore tama du hâ amaga.

³ǀGore du ra xawe du ge ǃkhōǃoa tama hâ, tsūse du ra ǀgore amaga, sadu turagu ǃnâ du nî ǁîna hîǀhuruse.

⁴ǃGamekhôa-aogo tsî ǃgamekhôa-aoso, ǂan tama du kha hâ, ǃhūbaib di khoexasib a khāsi ǃkhaisa Elob ǃoagu? Mâ-i hoa-i ǃhūbaiba ra khoexagu ǂgao-i ge ra Elob di khākhoe kai.

⁵Tsî ǂâi du kha hâ, xoas ra ǁause mî ǃkhaisa: “Gagas sada ǃnâ ǁan hâs ge surixase ra ǁkhore da?”

⁶Tsîb ge ǁnās ǃgâ-ai kai ǀkhomma ra mā. ǁNā-amagab ra mî: “Elob ge ǃguriǂgaoxana ra mâǃoa, xaweb ge ǃgamǃgamsen hâna ǀkhomma ra mā.”

⁷Elob ǃnaga māsen; ǁgâuaba mâǃoa, ob ge nî ǁhâxū du;

⁸Eloba ǀgū, ob ge sado nî ǀgū. ǃOmga ǃanuǃanu, sadu ǁore-aodo, î du ǂgaoga ǀkhaiǀkhai sadu ǃhonariǂgaoxado.

⁹Tsūǀkhā hâse tanisen, ǃoa î du ā; as sadu âisa ǃhausens ǃnâ ǀkharaǀkharasen, îb sadu ǃgâiaǂgaoba ǃoa kai.

¹⁰ǃKhūb aiǃâ ǃgamǃgamsen, ob ge nîra ǀgapiǀgapi du.

¹¹Tā ǀhoegu, ǃgâsado. ǁÎ-i ǃgâsaba ra ǀhoe tsî ǁî-i ǃgâsaba ra ǀgoraǃgâ-i ge ǂhanuba ǀhoe tsî ǂhanuba ra ǀgoraǃgâ-e. Tsî ǂhanubats ga ǀgoraǃgâo, ots ge ǂhanub di dī-ao tama i, tsîts ge a ǁîb di ǂhanuǂhanu-ao.

¹²ǀGui ǂhanuǂnûiǂgā-aob tsî ǂhanuǂhanu-aob ǀguib hâ, sâu tsî hîkākā ǁkhāba. Taritsa kha sats nau-e ra ǀgoraǃgâtsa?

¹³Hā ǁnâi sadu, nēti ra mîdo: Nētsēs kas, ǁaris kasa a da nē ǃās ǃoas kas, nau ǃās ǃoas kasa ǃgû, î da ǁnāpa ǀgui kuriba hâǂui, î da ǁamagusa dī, î da xū-e hōbasen;

¹⁴sadu, ǁari nî ī-e ǂan tamado. Matib kha ī sadu ûiba? ǀAn-i khamib kom īo, ǂkhari ǁaero-e a mûhesa-e, tsî ǁnās khaoǃgâ ra kā-e.

¹⁵Nē mîdi amǃnâs ǃnâ du ga nēti mî: ǃKhūb ga ǂâio, tsî da ga ûio, o da ge nē-i tsî nau-e nî dī.

¹⁶Xawe du kom nēsi sadu ǃgurib ǃnâ ra koaseno; ǁnāti ī koasens hoas ge a tsū.

¹⁷O ǃgâidīsa ǂan tsî ga dī tama i-i, ǁnā-i ge ǁîsa ǁorese ība.