Read Khoekhoegowab Jakobub 5 Bible Online

Jakobub 5 - Khoekhoegowab bible

Jakobub 5

¹Hā ǁnâi sadu ǃkhū hâdo, sadu ǂama nîra hā tsūǀkhāb ǃaroma ā î ǃau-ā.

²ǃKhūsib âdu ge gunu hâ, tsî saran âdu ge ǁgurin xa hapuhe hâ.

³ǃHuniǀurib tsî ǀhaiǀurib âdu ge ǀgū hâ, tsî ǀgūb ân ge mîdanse nî ība du, tsîb nî ǁgans âdo khauhapu ǀae-i axase. ǁUiba du ge ge ǀhaoǀhaobasen nē ǀuni tsēdi ǃnâ.

⁴Mû, amǃnâs ǃoabasabegu, sadu ǃhanaga gere ǃgaogu dis sadu xa tôatôahe hâs ra ǂgai; tsî ǃgao ra gu di ǃaudi ge ǃKhūb ǂnubidi dib di ǂgaera ǃnâ sī ge ǂgâ.

⁵Hîǀhuru rase du ge ǃhūbaib ai gere ûi, tsî du ge gere ǃgâiǃgâisen; sadu ǂgaoga du ge gere kaukau ǂātsēs ais xase.

⁶ǂHanu-aiba du ge ǀgoraǃgâ tsî ǃgam, tsîb ge sado mâǃoa tama hâ.

⁷ǃNūǃnâxase ǁnâi hâ, ǃgâsado, ǃKhūb di hās kōse. Kō, ǃhanakuru-aob ge ǃhūb di ǃgomǀgausa ǂû-e ra ǃâu, tsîb ge a ǃnūǃnâxa, haiǃkharub tsî ǁhaoǁaeb tsîkha di ǀnanuba i nî hōs kōse.

⁸Sadu ona ǁnâi ǃnūǃnâxa, î sadu ǂgaoga ǀgaiǀgai; ǃKhūb di hās a ǀgū xuige.

⁹Tā ǀhâimâinǀomǀîgu, ǃgâsado, ǀgoraǃgâhe du tidega. Mû, ǂhanuǂhanu-aob ge dao-ams aiǃâ mâ.

¹⁰Aiǁgause ūhâ, ti ǃgâsado, kēbo-aogu ǃKhūb di ǀons ǃnâ gere ǃhoagu di tsâb tsî ǃnūǃnâxasib tsîkha.

¹¹Mû, sâsase ra hâna da ǃgâiǃōse ra kare. Jobi di taniǀnamxasib xa ǁnâu, tsî du ge ǃKhūb ǂâibasens di ǀamsa ge mû; ǃKhūb a ǀkhomxa tsîb a ǀkhomxaǂgao xui-ao.

¹²Tsî hoan ǂamai, ti ǃgâsado, tā nū ǀhommi tawas karao, ǃhūbaib tawas karao, tsî mâ ǀnî nū-i hoa-i karao; îs sadu di āsa ā, îs sadu di hî-îsa hî-î, î du tā ǀgoraǃgâs ǃnâ ǁnā.

¹³Khoe-i ga sadu ǃnâ tsâo, a-i ǀgore. Khoe-i ga ǃgâiaǂgao-o, a-i psalmde ǁnae.

¹⁴Khoe-i ga sadu ǃnâ ǀaeseno, a-i ǂnomdomgu ǀhaohâb diga ǂgai, î gu ǁî-i ǂama ǀgore, î gu ǃKhūb di ǀons ǃnâ ǁnui-i ǀkha ǁî-e ǂkhau;

¹⁵os ge ǂgoms di ǀgoresa ǀaesen hâ-e nî sâu, tsî ǃKhūb ge ǁî-e nî ǃkhōkhâi; tsî ǁorena i ga dī hâ io, o i ge ǁîna nî ǀûbahe.

¹⁶ǃÛǂamde ǁguiǁnâbagu re, î du ǀgorebagu, ǂuru du nîga; ǀgaisa ǀgores ǂhanu-ai-i dis ge a sîsenǃnâxa.

¹⁷Eliab ge sada khami ī khoe ge i, tsîb ge ǀgoresa gere ǀgore, ǀapi tide ǃkhaisa, o i ge ǃhūb ai ǀapi tama i ǃnona kurigu tsî ǃnani ǁkhâgu tsîna;

¹⁸tsî ǁkhawab ge ǀgoreo, ob ge ǀhomma ǀapiba ge mā, ob ge ǃhūba ǂû-i âba ge mā.

¹⁹ǃGâsado, khoe-i ga sadu ǃnâ amaba xu ǁhapuo, tsî khoe-i ga ǁî-e ǃhobasen kaio,

²⁰ǁnā-e a-i ǂan, ǁore-ao-e ǁhapudaob â-e xu ra ǃhobasen kai-i, ǁnā-i ǀom-e ǁōba xu ra sâu tsî ǁoren di ǂguiba ra ǃgū-ai ǃkhaisa.