Read Khoekhoegowab 1 Petrub 1 Bible Online

1 Petrub 1 - Khoekhoegowab bible

1 Petrub 1

¹Petruta, Jesub Xristub di apostelta. ǁNā ǃhaokhoen, Pontub tsî Galatiab tsî Kapadosiab tsî Asiab tsî Bitiniab ǃnâ ǀgaruǀgaruhe hân ǃoa,

²Elob ǁGûb di aimûǂans ǃoa ǃkhōǂuihe hân, Gagab di ǃanuǃanusis ǃnâ, ǁnâuǀnamxasib tsî Jesub Xristub ǀaob di ǀgapi-ais ǃoa: A du ǀkhommi tsî ǂkhîb tsîkha ǂguiǂguibahe!

³Ab karehe Elob tsî ǁGûb sada ǃKhūb Jesub Xristub dib, ǁîb di kai ǀkhomxaǂgaosiba ǃoa sada ǁkhawaǃnae kai hâba ûitsama ǃâubasens ǃoa, Jesub Xristub di ǁō hâna xu khâis ǀkha;

⁴ǁgaoǁoasa tsî ǂnaoǂnaohe ǁoasa tsî ǃūǁoasa ǀumi-i, ǀhommi ǃnâ du sâubahe hâ-i ǃoa,

⁵sadu, ǂgomsa xu Elob di ǀgaib ǃnâ ra sâuhedo ǁāǁāhe hâ ǃgâiǃōsib, ǀuni ǁaeb ai nîra ǂhaiǂhaiheba ǃoa.

⁶ǁÎb ǃnâ du ra ǃgâiaǂgaob, sadu (ǂhâba i ga io) nēsi ǂkharirose ǂguiǃnâgu ǃâitsâdi ǃnâ ǃoa hâdo.

⁷ǃÂitsâhe hâ ǂgoms âdu nî kā ra ǃhuniǀurib, ǀaes ǀkha ra ǃâitsâheb ǂamai ǃgomǀgausase hōhese, koas tsî kares tsî ǂkhaisib ǃoa, Jesub Xristub di ǂhaiǂhaisens ǃnâ;

⁸ǁîba du mû tama xawe du ǀnam hâb; ǁîb ǃnâ du nēsis kōse du mû bi tama hâ xawe ǂgom hâse ra dâba ǃhoaǂuiheǁoasa tsî ǂkhaisa ǃgâiaǂgaob ǀkha,

⁹sadu ǂgoms di ǀams ǀomdi ǃgâiǃōsib disa ra ūbēbasenǃâ.

¹⁰ǁÎ ǃgâiǃōsiba gu ge kēbo-aogu, sado ge hāba ǀkhommi xa gere kēboga ôa-am tsî ge dîǃgâ;

¹¹dîǃgâ raǃâ, mâ tsî tarebe ǁaeb aib ra ǁîgu ǃnâ hâ Gagab Xristub diba ǁgausa, Xristub ai nî hā tsâgu tsî ǁnās khaoǃgâ nî hā ǂkhaisib xa ge aiǀhûǀguitimîba;

¹²o gu ge ge ǂhaiǂhaibahe, ǁî-aitsama tama i tsî gu nî sada ǃoabasa nē xūn, nēsi du ǀhomma xu ge sîhe ǃAnu Gagab ǃnâ ǃgâiǂhôasa gere aoǁnâgu xa ra ǂhôahen; ǁîn ǃnâ gu nî kōǂgâsa gu ǀhomǃgāga ǁkhore hâ.

¹³ǁNā-amaga kamanagu sadu ǁnâuǃāb diga ǃgae, î ǂkhaikari hâ, î hoaragase ǂgomaiǂnûi ǁnā ǀkhommi, Jesub Xristub di ǂhaiǂhaisens ǃnâ du ra ūhâbaheb ai;

¹⁴î ǁnâuǀnamxa ǀgôadu ase tā ǀguiti-īkaisen aibe du ǀūǂams ǃnâ ge ī i tura-aigu ǃoa;

¹⁵î du sado ge ǂgaib a ǃanus ǁkhās khami sado ǁkhāti ǃanu sadu tanisens hoas ǃnâ.

¹⁶Xoamâihe hâ xuige: “ǃAnu, tita a ǃanu xuige,” ti.

¹⁷Tsî ǁGûse du ga ǂgaiǀîo ǁnāb, khoe-i aisa kōǀîs ose ra ǀgoraǃgâba mâ-i hoa-i di sîsenni ǃoa, ǁnâi ǃaob ǀkha tanisen re sadu ǃgûkhoesis di ǁaeb ai;

¹⁸î du ǂan, kā ra xūn ǀhaiǀurib tsî ǃhuniǀurib tsîkha ǀkha du orehe tamasa ǁau tanisens aboga xu ge ǀumisa xu;

¹⁹xawe ǃgomǀgausa ǀaob Xristub, ǀhapio tsî ūo ǁkhaob dib ǀkha;

²⁰ǁîb ǃhūbaib di ǃgaoǃgaohes aiǃâ ge ǂnûiǂgāheb, xawe nē ǀuni ǁaegu ǃnâ sadu ǃaroma ge ǂhaiǂhaiheba;

²¹sadu ǁîba xu Elob ǃnâ ǂgom hâdo, ǁîba ge ǁō hâna xu ǂkhaiǂkhaib tsî ǂkhaisiba ge mā bib, sadu ǂgoms tsî ǃâubasens tsîra nî Elob ai hâga.

²²Î du sadu ǀomde ǃanuǃanu, ǃAnu Gagaba xu ǁnâuǀnamxasib amab dib ǃnâ, hînaoǃnâ ǃgâsaǀnamgusa ǃoa, î du ǃanu ǂgaoba xu ǀaexase ǀnamgu;

²³ǁkhawa ǃnae hâdu ase ǁgaosa ǃkhomma xu tama i, tsî ǁgaoǁoasa ǃkhommi, ûitsama tsî ǀamose ra hâhâ mîs Elob disa xu.

²⁴ǁGans hoas ge ǀgâb khami ī, tsî khoe-i di ǂkhaisib hoab ge ǀgâb di ǀkhurub khami ī xui-ao. ǀGâb ge ǂnâ, tsî ǀkhurub âb ge ǁnā;

²⁵xawe ǃKhūb mîs ge ǀamosib kōse ra hâ. Tsî nēs ge mîs, sadu ǃnâ gere aoǁnâhesa.