Read Khoekhoegowab 1 Petrub 3 Bible Online

1 Petrub 3 - Khoekhoegowab bible

1 Petrub 3

¹ǁNās ǁkhās xase, saso taraso, saso aoga ǃnaga hâba, ǀnîgu ga Elob mîsa ǁnâuǀnam tama i xawe, î gu taradi di tanisens ǀkha mî-i ose hōhe,

²saso di îǂhôa tanisensa gu ga mûǂano ǃaoǃgâb ǃnâ.

³Îs saso tanisensa tā ǃaugab di, îs tā ǀûǂgapus, tsî ǃhuniǀuridana ǁgās, tsî sarana anas ǃnâ mâ;

⁴îs ǂganǃgâsa khoeb ǂgaob dib ǃnâ mâ, ǁgaoǁoasa īsib tsauraǃnâ tsî ǃnōsa gagasa ūhâb ǃnâ, Elob aiǃâ ǃgomǀgausase ība.

⁵ǁNāti di ge ǃanu tarade huga gere ani, Elob ai ge ǂgomaiǂnûide, tsî ǁîdi aoga ge ǃnaga hâbade.

⁶Saras ge Abrahamma ǁnâuǀnam is ǁkhās xase, ǁîba “ǃkhūtse” ti ra ǂgaise; ǁîs di ôa kai so ge saso, ǃgâidī tsî so ga ǃhuri-i xare-i xa ǃao tama io.

⁷ǁNās ǁkhās xase sago aogo, ǁnâuǃāb ǀkha ǁîs tawa ǁan, î go tarare soas, sago xa ǂkhabusase īs ase ǃgôa-e mā, ǁkhāti ûib ǀkhommi di ǀhaoǀumi-aodi ase, î di sadu ǀgorede tā ǂhanihe.

⁸Î du ǀams ai sadu hoado ǀguiǂâixa, ǀkhomxa, ǃgâsaǀnamxa, ǀkhomxaǃnâ, ǃgamǃgamsenxa,

⁹tā ǂkhaba-e ǂkhaba-i ama mādawa, tsî ǀaumî-e ǀaumî-i ama; î du ǁnās ǃoagu ǀkhae, î ǂan, ǀkhaeba ǀumis ǃoa du ge ǂgaihe ǃkhaisa.

¹⁰Ûiba ǀnam tsî ga ǃgâi tsēde mû ǂgao-e, a-i ǁî-i di namsa ǂkhababa xu ǃnōǃnō, tsî ǁî-i di amǁgaukha, î kha tā gāxaǃnâ;

¹¹a-i ǂkhababa xu ǂgō, î-i ǃgâiba dī; a-i ǂkhîba ôa, î-i ǁîba sauruǃgon,

¹²ǃKhūb di mûra ge ǂhanu-ain ai hâ, tsî ǁîb di ǂgaera ǀgores ân ai xuige; xawe ǃKhūb di ais ge ǂkhababa ra dīn ǃoagu hâ.

¹³Tsî tari-e kha sado ǂkhôa-e a dī ǁkhā, ǃgâib di ǁgaeǁgae-ao du kao?

¹⁴Tsî ǂhanu-aisib ǃaroma du ga tsâ xawe du ge a ǃgâiǃō. ǁÎn di ǃaoǃaosa tā ǃao, î du tā ǃhuri.

¹⁵Î du ǃKhūb Eloba sadu ǂgaogu ǃnâ ǃanuǃanu. Î du hugaǀgui ǂhomisen hâ, sadu ǃnâ hâ ǃâubasens xa ga ǃereamsa ǂgaoǀkhā du-i hoa-e ǃereamsa māsa, tsamtsiǃnâsib tsî ǃaob tsîkha ǀkha.

¹⁶Î du ǃgâi ǂâisa ūhâ, în taotaohe, sadu xan ga ǂkhabadī-aodu axase ǀhoeo, ǁnān sadu ǃgâi tanisens Xristub ǃnâ hâsa ra ǃkhāǃkhāna.

¹⁷ǁNās ǃgâ-ai i kom a ǃgâio, Elob di ǂâis karao, ǃgâidī rase du nî tsâsa, ǂkhabadī rase tsâs xa.

¹⁸Xristub on ge ǀgui ǃnāsa sada ǁoren ǃaroma ǁō xui-ao, ǁîb ǂhanu-aiba ǂhanuoǃnân ǃaroma, Elob tawab nî sada ūsīga; tsî ǁgans ǃnâb ge ǃgamhe, xaweb ge Gagas ǃnâ ge ûi-ûihe;

¹⁹ǁîs ǃnâb ge ǁkhāti ǃgûsī, tsî ǃkhō-oms ǃnâ hâ gagade gere aoǁnâba,

²⁰ǁnādi aiga ǁnâuǀnam tama ge ide, Elob di ǃnūǃnâxasib Noaxi tsēdi ai gere ǃâuo, arki gere ǁāǁāhe ǃnubai, ǁîb ǃnâ di ge ǀorodi, ǁnādi ge ǁkhaisa ǀomde, ǁgamma xu ge sâuhe;

²¹ǁîb ǃoas ge ǁāǁnâs sada nēsi ra ǃgâiǃō kaisa, ǁîs sorosi ǀurixasib di ǁguiǁnâ tamas, xawe a ǃgâi ǂâis di turab Elobǀî, Jesub Xristub di khâisa xu;

²²ǁîb Elob amǀkhāb ǁôab tawa hâb, ǀhommi ǃoa ge ǃapab, ǀhomǃgāgu tsî ǀgaigu tsî ǁkhāsigu tsîgu ǁîb ǃnaga dīhe hâba.