Read Khoekhoegowab 1 Petrub 4 Bible Online

1 Petrub 4 - Khoekhoegowab bible

1 Petrub 4

¹Tsî Xristub ge sada ǃaroma ǁgans ǃnâ tsâ amaga, sadu ǁkhāti ǁkhā ǂâis ǀkha ǁâtanisen; ǁgans ǃnâ ra tsâ-i ge ǁoreb ǀkha ǀû hâ-e xuige,

²ǃaruǀî i khoen di turagu ǃoa ûi tidese, tsî i nî, gorose i ǁgans ǃnâ ǃgaubahe hâ ǁaeba Elob di ǂâis ǃoa ûise.

³ǂÂuba da i kom hâo, ǃgôa-ī ge ǁaeb ûib diba da ǀūben di ǂâisa gere dīǀoaǀoasa, ǁgaiǁgaisa ǂūǁoasigu tsî turagu tsî āǀhorosigu tsî ōgu tsî āǃansengu tsî ǁgaisi ǁgôatsuiǁgoaǃoabagu tsîn ǃnâ da gere ûi ǃnubai;

⁴ǁî xūn ǂaman ra buru, ǁkhā ǀūbesi hîǀhurus ǃnâ du ǁîn ǀkha ǃgû tama ǃkhaisa, tsîn ra ǃkhāǃkhā;

⁵ǁîn ge ǃereambasensa nîra mā ǁnāb, ûitsaman tsî ǁō hân tsîna ǀgoraǃgâs ǃoa ǂhomisen hâba.

⁶Nēs ǃoas ge ǃgâiǂhôasa ǁō hân tsîna aoǁnâbahe xui-ao, ǁgans ǃnâ hâ khoesib ǃoan ga ǀgoraǃgâhe xawen nî gagas ǃnâ Eloba ûibaga.

⁷Tsî ǀams xūn hoan dis go ǀgū. ǀKhaiǃnâse hâ re, î ǂkhaikari hâ re ǀgoresa ǃoa.

⁸Î du hoan ǂamai ǀaexa ǀnamguba ūhâ; ǀnammi ra ǁoren di ǂguiba ǃgū-ai xuige.

⁹Sâuǀnamgu du re ǀaras ose.

¹⁰ǃOabagu re, mâ-i hoa-e ǃkhōǃoa-i ge hōs ǃoa ǃgâi ommûǂamaose ǃkharaga ǀkhommi Elob dib dise.

¹¹Khoe-i ga ǃhoao, a-i ǁîsa Elob mîse ǃhoa. Khoe-i ga ǃoabao, a-i Elob ra ǀkhae ǀgaiba xus ase ǃoaba, îb Eloba xūn hoan ǃnâ koahe Jesub Xristuba xu, ǁîb ǂkhaisib tsî ǀgaib tsîkha anu hâba ǀamosiba xu ǀamosib kōse. Amen.

¹²ǀNamsabedo, tā buru sadu ǃnâ hâ ǀgamsib, ǃâitsâhe du nîse ra hāǂam dub xa, ǃhao xū-i ga hāǂam dus axase;

¹³xawe Xristub di tsâb ǃnâ du amǃnâxa hâs ǁkhās xase ǃgâiaǂgao re, î du ga ǁkhāti ǁîb ǂkhaisib di ǂhaiǂhaisens ǃnâ ǃgâiaǂgao tsî dâ ǁkhā ti.

¹⁴ǁGuiǂamhe du karao Xristub di ǀons ǃaroma, o du ge a ǃgâiǃō; Gagab ǂkhaisib dib tsî Elob dib sadu ai ra sâ xui-ao; ǁîn tawab ra ǃkhāǃkhāhe, xawe sadu tawab ra ǂkhaiǂkhaihe.

¹⁵A-i khoe-i xare-e tā tsâ ǃgamaose tsî ǃnari-aose tsî ǂkhabadī-aose, tsî nau-i di xū-i ǀkha ra ǁaeǁaesense.

¹⁶Xawe xristeǁîse i kara tsâo, a-i tā tao, î-i Eloba ǂkhaiǂkhai nē ǀons ǀkha.

¹⁷Nēb kom ǁaeb, ǀgoraǃgâs nî Elob ommi tawa tsoatsoabao; tsî ǂguros ga sida tawa tsoatsoao, mâsa kha ǀams, Elob di ǃgâiǂhôasa ǁnâuǀnam taman disa nî ī?

¹⁸Tsî ǂhanu-ai-i ga ǂōse ǃgâiǃō kaiheo, mapa i kha eloxoresa-i tsî ǁore-ao-e nî ǂhai?

¹⁹ǁNā-amaga an Elob di ǂâis ǃoa ra tsâna Eloba ǂgomǂgomsa kuru-aob ase ǀomdi ana māǁnâ ǃgâidīgu ǃnâ.