Read Khoekhoegowab 1 Petrub 5 Bible Online

1 Petrub 5 - Khoekhoegowab bible

1 Petrub 5

¹ǂNomdomgu sada ǃnâ hâga ta ra ǁnama, tita, ǀhaoǂnomdomgu tsî Xristub tsâgu di ǃkhō-amaota tsî ǁkhāti ǂhaiǂhaihe nîra ǂkhaisib ǃnâ nîra amǃnâxa ta:

²ǃÛi Elob gūn, sago ǂgomǃgâbahe hâna, ǁgarisa xu tama i tsî māsenxase; ǁkhāti taotaosa hōbasen-i ǃaroma tama i tsî ǂgaob hoaba xu;

³ǁkhāti ǃKhūb di ǀhaohâba ra gaoǂamse tama i tsî gūn di aiǁgause.

⁴O go ge, ǂAm ǃûi-aob ga ǂhaio, ǁgaoǁoasa krons ǂkhaisib disa nîra hō.

⁵ǁNās ǁkhās xase sadu ǂkhamdo, kaikhoena ǃnaga hâba, î du hoado ǃnaga hâbagu; î du ǃgamǃgamsensa ana: Elob ge ǃguriǂgaoxana ra mâǃoa, xaweb ra ǃgamǃgamsensana ǀkhomma mā xuige.

⁶ǃGamǃgamsen ǁnâi re Elob di ǀgaisa ǃommi ǃnaga, îb ǁîb di ǁaeb ai ǀgapiǀgapi du.

⁷Sadu ǂhansendi hoade ǁîba ǁgui-ai; ǁîb sado ra ǂhansenba xuige.

⁸ǀKhaiǃnâse hâ î ǂkhaikari hâ; sadu di mâǃoasabeb ǁgâuab ge ǃguru ra xammi xase ra ǃgûma, tsî mâ-eb nî hapu ǃkhaisa ra ôa xuige.

⁹ǁÎba mâǃoa ǂgoms ǃnâ ǁapo hâse, ǁkhā tsūǀkhāgu ǃhūbaib ai hâ ǃgâsan âdu tawa ra dīǀoaǀoahe ǃkhaisa ǂan tsî.

¹⁰Tsî ǀkhommi hoab di Elob, ǁîb di ǀamo ǂkhaisib Jesub Xristub ǃnâ hâb ǃoa ǂgai da hâba, ab sadu, ǂkharirose ra tsâdo dīǀoaǀoa, ǀgaiǀgai, ǁapoǁapo, ǃgaoǃgao.

¹¹ǁÎba ab ǂkhaisib tsî ǀgaib tsîkha ūhâ ǀamosib hoab kōse! Amen.

¹²Silvanub sadu ǂgomǂgomsa ǃgâsab ǀkha ta ge, ǂâi ta ra khami, ǀnîrona ge xoa, ǁnama tsî ra ǃkhō-amǃâ, nē ǀkhommi Elob dib, ǁîb ǃnâ du mâb a ama-ai ǀkhom ǃkhaisa.

¹³Babilons ǃnâ ǃkhōǂuihe hâ ǀhaohâb ra tawede du, tsî ti ôab Markub tsîn.

¹⁴Tawedegu du re ǃanu ǁoas ǀnammi dis ǀkha. ǂKhîba ab sadu, Xristub Jesub ǃnâ hâdu hoadu ǀkha hâ! Amen.