Read Khoekhoegowab 2 Petrub 1 Bible Online

2 Petrub 1 - Khoekhoegowab bible

2 Petrub 1

¹Simon Petruta, Jesub Xristub di ǃgā tsî apostelta, ǁnān sige ǀkha sada Elob tsî ǃGâiǃōdī-aob Jesub Xristub di ǂhanu-aisib ǃnâ ǁkhā ǃgâi ǂgomsa ge hōn ǃoa:

²ǀKhommi tsî ǂkhîb tsîkha a kha sado ǂguiǂguibahe Elob tsî Jesub sada ǃKhūb di ǂans ǃnâ.

³ǁÎb di elosi ǀgaib ge ûib tsî eloǃgâiǃōsib ǃoa harebe hân hoana ǀkhae da khami, ǁnāb, ǁîb di ǂkhaisib tsî ǁkhāsib ǀkha ge ǂgai dab di ǂansa xu,

⁴ǁîba xu di hoan xa kai tsî ǀgapiǃgôahesa mîmâide sada ǀkhaehe hâb, ǁîde xu du nî elosi ǂūsib ǃnâ amǃnâxase, ǃhūbaib di turagu ǃnâ hâ kāǁōsiba du ga ǁhâxūo:

⁵ǁÎs ǁkhāsa ǃoa ǁnâi ôasasib hoaba dī, î du sadu ǂgoms tawa ǃgâi ǂūba ǀaro, tsî ǃgâi ǂūb tawa ǂans,

⁶tsî ǂans tawa ǁkhaesens, tsî ǁkhaesens tawa taniǀnamxasib, tsî taniǀnamxasib tawa eloǃaoǃgâxasib,

⁷tsî eloǃaoǃgâxasib tawa ǃgâsaǀnamgus tsî ǃgâsaǀnamgus tawa ǀnamma hoan ǃoa.

⁸Nē xūn ga sadu tawa hâ tsîn ga ǃnā, on kom ǀopesase tsî ǂûtanioǃnâse hâ kai du tideo sada ǃKhūb Jesub Xristub di ǂans ǃnâ;

⁹xawe nē xūn ǁî-i ǃnâ hâ tama-i, ǁnā-i ge ǂgī hâ, tsî ǃnūse mû tama, tsî aibekam ǁoren di ǃanuǃanusisa ra ǀuru.

¹⁰ǁNā-amaga, ǃgâsado, ǁnās ǃgâ-ai ôasa, sadu di ǂgaihes tsî ǃkhōǂuibasenhesa du nî ǁapoǁaposa; nēna du ga dīo, o du kom tātsē ǃnôa tideo.

¹¹O du ge ǁnāti ǃkhū hâse nîra ǀarobahe sada ǃKhūb tsî ǃGâiǃōdī-aob Jesub Xristub di ǀamo gaosib ǃnâ ǂgâsa.

¹²ǁNā-amaga ta ǀhawe tide, sado ta nî hugaǀgui nēn xa ǂâiǂâiǃnâ, ǁîna du a ǂan, tsî hâ a amab ǃnâ du ǀgaiǀgaihe hâ xawe.

¹³Tsî ta nēsa ǂhanuse ūhâ, nē tabernakeli ǃnâ ta nî hâs kōse ta nî ǁnamas ǀkha ǂkhaiǂkhai du ǃkhaisa;

¹⁴ǂan ta a xui-ao, ǃhaese ta nî ti tabernakela ǁguiǁnâsa, sada ǃKhūb Jesub Xristub ge ǁkhāti ǂhaiǂhaiba te khami.

¹⁵O ta ge nî ôasa, î du ga ǁkhāti ti ǃgûǂoas khaoǃgâ hugaǀgui nē xūn xa ǂâiǂâisensa ūhâ.

¹⁶Gāxaǃnâsise hōǂuihe hâ ǁau ǃhoana ge kom sao tamao, sado ge ge sada ǃKhūb Jesub Xristub di ǀgaib tsî hās tsîra ǂanǂan ǃnubai, xawe ge ge ǁîb kaisib di ǃgapaǀî-ao ge i,

¹⁷ǃgôab tsî ǂkhaisib tsîkhab ge Elob ǁGûba xu hō ǃnubai, ǀgapiǃgôahesa ǂkhaisiba xub ge nēti ī domma hāba bi ǃnubai: “Nēb ge ti ǀnamǀnamsa ǀGôab, ǃgâiǃgâibasensa ta ūǃnâ hâba.”

¹⁸Tsî nē domma ge ge ǁnâu, ǀhomma xub ge hāo, ǁîb ǀkha ge ǃanu ǃhommi ai hâ hîa.

¹⁹O da ge ǁnās ǃgâ-ai kēbosi mîsa ǁaposase ūhâ; tsî du ga ǃgâise dī, ǁîsa du ga ǃgaoǃgâo, ǃkhae ǃkhai-i ai ra ǃnâ ǃamamǀae-i axase, ǁgoas nî ǃnâ tsîs nî ǁgoaǀgamirosa sadu ǂgaogu ǃnâ ǁhais kōse.

²⁰Î du nēsa ǂguro ǂan, kēbosis Xoas dis xares ǁî-aitsama ǁguiǃāsa xu hâ tamasa.

²¹Tātsē i kēbosi-i xare-e khoe-i di ǂâisa xu ūǀkhīhe tama hâ xui-ao; xawe ǃAnu Gagab xa doeǁgarihe hâsen ge ǃanu khoen Elob dina gere ǃhoa.