Read Khoekhoegowab 2 Petrub 2 Bible Online

2 Petrub 2 - Khoekhoegowab bible

2 Petrub 2

¹Tsî gu ge ǁkhāti ǂkhaba kēbo-aoga ǁaes ǃnâ ge hâ i, sadu ǃnâ gu ǁkhāti ǂkhaba kēbo-aoga nî hâs ǁkhās xase, ǂganǃgâsase ǁgaoǁgaosa ǁkhāǁkhā-aina nî ūǂgâxaga, ǁîga ge ǁamabasen ǃKhūba ra ǀūxūga, tsî ǃhae kāǁōsi-e ǁîga ra ūhābasenga.

²Tsî ǂguin ge ǁîgu di ǂūǁoasiga nîra sao; ǁîn ǃaromab ge amab di daoba nîra ǃkhāǃkhāhe.

³Tsî gu ge xūǃgunuxasib ǃnâ ǁau mîdi ǀkha sadu ǁamaguxūse nîra dī; ǁîgu ǂamas ge ǀgoraǃgâsa ǂomxa ǁaeba xu ǀhawe tama, tsî ǁîgu di kāǁōsib ge ǂomhî tama hâ.

⁴Elob ge ǁore ge ǀhomǃgāga sâu tama is ǁkhās xase, tsîb ge ǁîga ǃkhaenab di ādi ǃnâ ǀamo ǀaeb ǃnâ gu nî ǂhāǁgôahesa māǁnâs ǁkhās xase, ǀgoraǃgâs ǃoa gu nî sâuhega,

⁵tsî ǀoro ǃhūbaibab ge ǃkharesi tama, tsî ǂhanu-aisib di aoǁnâ-aob Noaxab ge ǁkhaesan ase sâu xase, kai ǁgammab ge eloxoresan di ǃhūbaib ǂama ūhā ǃnubai;

⁶tsî ǃāra Sodoms tsî Gomoras tsîra khauǃkhū hâǃâb ge ǁîra dawaǃkhupuhe ra nîs ǃoa ǀgoraǃgâ xase, eloxoresase nî ûin di aiǁgause;

⁷tsî ǂhanu-ai Loti, ǁgaiǁgaisa tanisens ǁgaisi khoen dis xa ǀhupu hâbab ge ore xase;

⁸(nē ǂhanu-aib ǁîn ǃnâ ǁan hâb kom tsēsa xu tsēs ǃoa ǁîb di ǂhanu-ai ǀoms ǃnâ gere tsûtsûheo, mû tsîb gere ǁnâu ǂhanuoǃnâ sîsengu âna xu).

⁹ǁNās khās xaseb ge ǃKhūba ǂan, matib nî eloǃaoǃgâxana ǃâitsâsa xu ore, tsî ǂhanuoǃnâna ǀgoraǃgâtsēsa sâubasa, ǁkharahen nîga;

¹⁰tsî ǀō-ai ǁnān, ǁgans ǃoa ǃanuoǃnâ turab ǃnâ ra tanisenn, tsî gaosisa ra ǃharaxūn, ǂgapan, tsî ǁî-aitsama ra ǃgâiǃgâisenn, kaisiga ǃkhāǃkhāsa sau tama hâna,

¹¹ǀhomǃgāgu, ǁîn xa kai ǀgaib tsî ǁkhāsiba ūhâgu ǁîn ǃoagu ǃkhāǃkhāǀgoraǃgâ-e ǃKhūb tawa ūsītsâ tama xawe;

¹²xawe nēn ge ǁnâuǃāoǃnâ ǀgurun, ǃkhōhe tsîn nî ǃgamhesa ǃnaeba hân khami ī; ǀūn anan ra ǃkhāǃkhā amagan ge ǁîn ona nîra hîkākāhe,

¹³tsîn ge ǂhanuoǃnâsib di amǃnâsa nîra hō, ǁîn tsēkorobe ǃgâiǃgâisensa dâxūse ūhân, ǂnaoǂnaosa tsî ǀurisan, gāxaǃnâsigu ǃnâ ǃkhūsan, sadu tāgu tawa ǂûs ǃnâ ra ǃgâiǃgâisenn,

¹⁴ǃgamekhôaxa mûde ūhân, tātsē ǁoreǀû taman, ǀgaioǃnâ ǀomde ra nanaǁnân, ǂgaoba xūǃgunuxasib ǃnâ ǁkhāpesen hân, ǀâxareb ôan,

¹⁵ǂhanu daoba ge ǁnāxūn tsî ra ǁhapuman, Bileammi Beori ôab, ǂhanuoǃnâsib di amǃnâsa ge ǀnam hâ ib di daoba ra saon;

¹⁶ǁîb ge ǂhanuoǃnâsib âb di ǁkharaba ge hō; ǃgomma ge tani amo esels kom khoesi dommi ǀkha ǃhoa tsî kēbo-aob di ǃkhausasiba ge ǃkhâio.

¹⁷Nēn ge ǁgamoǃnâ ǀaun, sare-i xa ra doeǁgamahe ǀnanun ǃkhaenab di ǃkhaeba ǀamosib kōse sâubahe hâna.

¹⁸ǁAu khūkhūsensa xūna ra ǃhoasen ra ǁgans di turagu tsî ǂūǁoasiga xu nanaxū ǁnān, ǁhapus ǃnâ ra ǃgûna ǁhâxūhe ge hâ ina;

¹⁹ǁîna ǃnorasasi-e ra mîmâiǃâ, ǁî-aitsaman a kāǁōsib di ǃgā hîa; ǁî-i xats ge danhe-i, ǁnā-i di ǃgā kaits go xui-ao.

²⁰ǃHūbaib di ǂnaoǂnaosenden ga ǃKhūb tsî ǃGâiǃōdī-aob Jesub Xristub di ǂansa xu ǁhâxū hâo, tsîn ga ǁkhawa ǁîde ǁaeǁaesen tsî ǁîdi xa danheo, on ge ǀunigan âna ǂguron ǃgâ-ai ge tsūbahe;

²¹ǃgâibahen ka xui-ao ǂhanu-aisib di daoban ga ǂan tama hâ io, ǁîban ǂan hâ xawen ǁkhawa māhen ge ǃanu mîmāsa xu ge oa ǃkhais xa.

²²Xawen ge ge hāǂamhe, ama-ai ǂkhoamî-i ra mîs xa: Ari-i ge ǀkhûi i go i ǂû-e ǁkhawa ra hapu tsî: Hāgū-i ge ǁāhe i gos khaoǃgâ ǁkhawa ǂgoab ǃnâ ra ǃupupesen.