Read Khoekhoegowab 2 Petrub 3 Bible Online

2 Petrub 3 - Khoekhoegowab bible

2 Petrub 3

¹Nēs ge ǀgamǁî sîǂkhanis sado ta ra xoabasa, ǀnamsabedo, ǁîra hoara ǃnâ ta ǂâiǂâis ǀkha sadu ǂhauǃnâ ǂâisa ra ǂkhaiǂkhai,

²ǂâiǂâisen du nîga ǁnā mîdi, ǃanu kēbo-aogu aibe gere ǃhoadi xa, tsî sige ǃKhūb tsî ǃGâiǃōdī-aob di apostelge di mîmās xa.

³Î du ǂguro nēsa ǂan, ǀuni tsēdi ain nîra ǃhō-aona hāsa, ǁîn di turagu ǂûgu ǃoa ûi

⁴tsî nîra mîna: Mapas kha mîmâis ǁîb hās disa hâ? Abogu ge kā tsēsa xun kom xūn hoana kurus di tsoatsoasa xun ge īs ǁkhās xase īo.

⁵Xawe ǂanapegan ǂan ǂgao tama hâ, Elob mîsa xub ge ǀhomma hugasa xu hâ i tsî ǃhūbaib ge ǁgamma xu tsî ǁgammi ǃnâ hâ i ǃkhaisa.

⁶ǁÎkha xub ge ǁnāǃnubai hâ ǃhūbaiba ǁgammi xa dâu-aihe tsî ge kā;

⁷tsî nēsi hâ ǀhommi tsî ǃhūbaib tsîkha ge ǁkhā mîsa xu ǁuise ǁguibēbahe hâ tsî ǀaesa ra sâubahe, ǀgoraǃgâtsēs tsî eloxoresa khoen di kāǁōtsēs kōse.

⁸Î du nē ǀgui ǃkhaisa tā ǀūǂam, ǀnamsabedo, ǀgui tsēs ǃKhūb tawa ǀoadisi kurigu khami īsa, tsî ǀoadisi kuriga ǀgui tsēs khami.

⁹ǃKhūb ge mîmâis ǀkha ǀhape tama hâ (ǀnîn ǁîsa ǀhapes ase ūhâ khami), tsîb ge a ǃnūǃnâxaba da, tsîb ǂgao tama, khoe-i nî kāǁōsa, xawen nî hoana ǃhobasen ǃkhaisa.

¹⁰Tsîs ge ǃKhūb di tsēsa ǃnari-ao-i tsuxuba ra hā-i khami nîra hā, ǁîs ai gu ǀhomga ǂkhupib ǀkha nîra ǃgû-īs, tsî hoa xūn ǀgammi xa nîra tsunis, tsî ǃhūbaib tsî ǁîs ai hâ sîsengu nîra khauǃkhūba.

¹¹Tsî nē xūn hoan ga kāo, mati īse du kha ǃanu tanisens tsî eloǃaoǃgâxasib ǃnâ ga ī?

¹²ǃÂu î du ǃnoeaǂgao ǃKhūb hās di tsēsa, ǁîs ai gu ǀhomga ǀaes xa ra khause nîra kās, tsî hoa xūn ǀgammi xa nîra tsunisa.

¹³Xawe da ge ǁîb di mîmâisa ǃoa ǀasa ǀhommi tsî ǀasa ǃhūbaib tsîkha, ǂhanu-aisib ǁanǃnâ hâkha ra ǃâubasen.

¹⁴ǁNā-amaga, ǀnamsabedo, î du nēna ra ǃâubasense ǃhaeǃhaesen, ǂnao-ose tsî ūose du nî ǁîb xa hōhese ǂkhîb ǃnâ;

¹⁵î du sada ǃKhūb di ǃnūǃnâxasiba ǃgâiǃōsib ase ūhâ; sige ǀnamǀnamsa ǃgâsab Paulub ge ǁkhāti ǁîb māhe hâ gā-aisiba ǃoa sado xoaba khami;

¹⁶sîǂkhanidi hoadi ǃnâb ra ǁkhāti dī khami, ǁîdi ǃnâ nē xūn xa ra ǃhoase; ǁîdi ǃnâ ǀnî xūn ǁnâuǃāsa a ǃgomba, ǁkhāǁkhāhe taman tsî ǀgaiǀgaihe tamana ra dawaǃkhupuna, ǁnās ǁkhās xase nau xoadi tsîna, ǁîn di ǁgaoǁgaosens ǃoa.

¹⁷Sado ǁnâi, ǀnamsabedo, nēsa du a aiǂan amaga ǂanbasen re, î du tā ǁgaiǁgaisa khoen di ǁhapusa xu ǂgaeǂhapuǀhaohe, î du tā sadu ǁaposa ǃkhaisa xu ǁnā;

¹⁸î du ǀom sada ǃKhūb tsî ǃGâiǃōdī-aob Jesub Xristub di ǀkhommi tsî ǂans tsîra ǃnâ. Ab ǁîba ǂkhaisiba ūhâ nēsi tsî ǀamo tsēs kōse! Amen.