Read Khoekhoegowab 1 Johaneb 2 Bible Online

1 Johaneb 2 - Khoekhoegowab bible

1 Johaneb 2

¹Ti ôarodo, nēna ta ge ra xoaba du, ǁore du tidega. Tsî khoe-i ga ǁore xawe da ge ǁGûb tawa aigowaba-aoba ūhâ: Jesub Xristub ǂhanu-aiba.

²Tsî ǁîb ge ǂkhîbagus sada ǁoren dis di; tsî sada din ǀguin di tama, tsîb ge a ǁkhāti ǃhūbaib hoab din di ǂkhîbagu.

³Tsî nēsa da ge a ǂan, ǁîba da ǂansa, ǁîb di mîmāde da ga sâuo.

⁴ǁÎba da ǂan hâ, ti mî tsî ga ǁîb di mîmāde sâu tama i-i, ǁnā-i ge a ǂhumi-ao, tsî ǁnāti ī-i ǃnâb ge amaba hâ tama hâ;

⁵xawe ǁîb di mîsa ga sâu-i, ǁnāti ī-i ǃnâb ge Elob di ǀnamma amase dīǀoaǀoahe hâ; nēs tawa da ge a ǂan, ǁîb ǃnâ da hâsa.

⁶ǁÎb ǃnâ da hâ, ti ra mî-i ge surude hâ, ǁîb ge tanisens ǁkhās khami i nî ǁî-aitsama ǁkhāti tanisensa.

⁷ǃGâsado, ǀasa mîmā-e ta xoaba du tama, xawe ǀoro mîmā-i, tsoatsoasa xu du ge ūhâ i-e; nē ǀoro mîmās ge ǁnā mîs, tsoatsoasa xu du ge ǁnâusa.

⁸ǁKhawa ta ge ǀasa mîmā-i, ǁîb ǃnâ tsî ǁkhāti sadu ǃnâ a ama-ai-e ra xoaba du; ǃkhaenab ra ǃgû-ī tsî ǀnaib ama-ai ǃnâba ra ǀkhâu xui-ao.

⁹ǃNâb ǃnâ ta hâ, ti mî tsî ga ǁî-i ǃgâsaba ǁkhan-i, ǁî-i ge ǃkhaenab ǃnâ nēsis kōse hâ.

¹⁰ǁÎ-i ǃgâsaba ǀnam hâ-i ge ǃnâb ǃnâ hâ-e, tsî ǁgonǁgonǂgao-i ge ǁî-i ǃnâ hâ tama hâ;

¹¹xawe ǁî-i ǃgâsaba ra ǁkhan-i ge ǃkhaenab ǃnâ hâ tsî ǃkhaenab ǃnâ ra ǃgû-e, tsî i ge a ǀū, mâǀî i ra ǃgû ǃkhaisa; ǃkhaenab ge ǁî-i di mûra ǃkhae kai amaga.

¹²ǀGôarodo, xoaba du ta ra, ǁorena du ǁîb di ǀons ǃaroma ǀûbahe hâ amaga.

¹³Xoaba go ta ra, ǁgûgo, tsoatsoasa xu hâba du ge a ǂan amaga. Xoaba go ta ra, ǂkhamkhoego, ǂkhababa go ge dan amaga.

¹⁴Xoaba du ta go, ǀgôado, ǁGûba du a ǂan amaga. Xoaba go ta go, ǁgûgo, tsoatsoasa xu hâba du a ǂan amaga. Xoaba go ta go, ǂkhamkhoego, ǀgaisa go a, tsî Elob mîs sago ǃnâ hâ, tsî ǂkhababa go ge dan amaga.

¹⁵Tā ǀnam ǃhūbaib karao, ǃhūbaib ai hân karao; khoe-i ga ǃhūbaiba ǀnamo, ǁî-i ǃnâb ge ǁgûb di ǀnamma hâ tama hâ;

¹⁶ǃhūbaib ai hân hoan, ǁgans di turab kas, mûdi di turab kas, ûib di kaikaisens kas hoas ǁGûba xu hâ tama i tsî ǃhūbaiba xu hâ xuige.

¹⁷Tsî ǃhūbaib ge ra ǃgû-ī turab âb ǀkha; xawe Elob ǂâisa ra dī-i ge ǀamosib kōse ra hâ-e.

¹⁸ǀGôarodo, ǀuni iri ge, tsî Xristub khākhoeb ǃgoaxa ǃkhaisa du ge ǁnâus ǁkhās xase gu ge nēsi ǂgui Xristub khākhoega hâ; ǁî ǃkhaisa xu da ge a ǂan, ǀuni iri a ǃkhaisa.

¹⁹Sige xu gu ge ǃgûǂoa, xawe gu ge sige xu hâ tama ge hâ i; sige xu gu ga hâ io, o gu kom ga sige ǀkha hâhâ io; xawes ge ge ī, ǂhai gu nîga, hoagu sige xu hâ tama ǃkhaisa.

²⁰Tsî du ge sadu ǂkhauǀkhāsa ūhâ ǃAnuba xu, tsî du ge hoa xūna a ǂan.

²¹Amaba du ǂan tama amaga ta ge xoaba du tama; xawe ǁîba du a ǂan, tsî ǂhumi-i xare-i amaba xu hâ tama amaga ta ge xoaba du.

²²Mâba kha ǂhumi-aoba, ǁnāb ga ī tama io, Jesub a Xristu ǃkhaisa ra ǀūxūba? Nēb ge Xristub khākhoeb, ǁgûb tsî ǀgôab tsîkha ra ǀūxūba.

²³Mâ-i hoa-i ǀGôaba ra ǀūxū-i ge ǁGûb ona ūhâ tama-e; mâ-i hoa-i, ǀGôaba ra ǁguiǁnâ-i ge ǁGûb ona ūhâ-e.

²⁴Tsoatsoasa xu du ge ǁnâu-e, a-i ǁnâi sadu ǃnâ hâ; tsoatsoasa xu du ge ǁnâu-i ga sadu ǃnâ hâo, o du ge ǁkhāti ǀGôab ǃnâ tsî ǁGûb ǃnâ nî hâ.

²⁵Tsî nēs ge mîmâis, sadab ge mîmâibasa: ǀAmo ûiba.

²⁶Nēna ta ge xoaba du ǁnān, ǂgaeǂhapu du ran xa.

²⁷Tsî ǂkhauǀkhās, ǁîba xu du ge hōs ge sadu ǃnâ hâ, tsî du ge ǂhâba tama hâ, khoe-i nî sado ǁkhāǁkhāsa; tsî ǁnā ǂkhauǀkhās ǁkhās ra xūn hoana ǁkhāǁkhā du khamis ge a ama-ai tsî ǂhumi tama hâ; î du sados ge ǁkhāǁkhā khami ǁîb ǃnâ hâhâ.

²⁸Tsî nēsi, ǀgôarodo, ǁîb ǃnâ hâ, î ge sige ǁkhoaǂgaosiba ūhâ, ǂhaiǂhaiheb kao, î ge ǁîb xa tā taotaohe ǁîb di hās ǃnâ.

²⁹ǂHanu-aib a ǃkhaisa du ga ǂano, mûǂan ǁnâi re, mâ-i hoa-i ǂhanu-aisiba ra dī-i ǁîba xu ǃnae hâ ǃkhaisa.