Read Khoekhoegowab 1 Johaneb 3 Bible Online

1 Johaneb 3 - Khoekhoegowab bible

1 Johaneb 3

¹Mû, matikō kai ǀnammab ǁGûba mā da hâ ǃkhaisa, Elob ôase da nî ǂgaihe ǃkhaisa. ǁNā-amagab ge ǃhūbaiba sada ǂan tama hâ, ǁîbab ǂan tama hâ amaga.

²ǀNamsabedo, nēsi da a Elob ôa, tsî i ge gorose ǂhai tama, mati da nî īsa; xawe da ge a ǂan, ǁîb ga ǂhai ǃnubai da nî ǁîb khami ī ǃkhaisa, īb a khami da nî mû bi xui-ao.

³Tsî mâ-i hoa-i nē ǃâubasensa ǁîb ai ūhâ-i ge ǁî-aitsama ra ǃanuǃanusen, ǁîb a ǃanu khami.

⁴ǁOreba ra dī-i hoa-i ge ǂhanuoǃnâsib ona ra dī-e, tsî ǁoreb ge a ǂhanuoǃnâsi.

⁵Tsî du ge a ǂan, ǁîb ge ǂhai ǃkhaisa, sada ǁorenab nî ūbēse; tsî ǁore-i xare-i ge ǁîb ǃnâ hâ tama hâ.

⁶Mâ-i hoa-i ǁîb ǃnâ ra hâhâ-i ge ǁore tama-e, ǁore ra-i hoa-i ge ǁîba ǃgapaǀî tsî ǂan tama-e.

⁷ǀGôarodo, khoe-i xare-e a-i tā ǂgaeǂhapu du; ǂhanu-aisiba ra dī-i ge a ǂhanu-ai, ǁîb a ǂhanu-ai khami.

⁸ǁOreba ra dī-i ge ǁgâuaba xu hâ-e; ǁgâuab ge tsoatsoasa xu ǁore amaga. Nēs ǃoab ge Elob Ôaba ge ǂhaiǂhaihe, ǁgâuab di sîsengab nî hîkākāse.

⁹Mâ-i hoa-i Eloba xu ǃnae hâ-i, ǁnā-i ge ǁore-e dī tama hâ; ǀkhommi âb ǁî-i ǃnâ hâ, tsî i a ǁore ǁoa, Eloba xu i ǃnae hâ amaga.

¹⁰Nēs ǃnân ge Elob ôan tsî ǁgâuab ôan tsîna a ǂhaisa. ǂHanu-aisiba dī tama-i hoa-i ge Eloba xu hâ tama-e, tsî ǁî-i di ǃgâsaba ǀnam tama-i tsîn.

¹¹Nēs ge ǂhôas tsoatsoasa xu du ge ǁnâusa, ǀnamgu da nî ti,

¹²Kainni khami tama, ǂkhababa xu ge hâ ib, tsî ǃgâsab âba ge ǂnauǃanni; tsî tare xū-i ǃaromab ge ǂnauǃan bi? ǁÎb di dīgu ge ǂkhaba i, tsî ǃgâsab âb digu ge ǂhanu-ai i amaga.

¹³Tā buru, ti ǃgâsado, ǃhūbaib ga ǁkhan duo.

¹⁴Sada ge a ǂan, ǁōba xu da ge ûib tawa ǃgûsī ǃkhaisa, ǃgâsaga da ǀnam hâ amaga; ǃgâsaba ǀnam tama-i ge ǁōb ǃnâ ra hâhâ-e.

¹⁵ǁÎ-i ǃgâsaba ra ǁkhan-i hoa-i ge ǂnauǃanao-e; tsî du ge a ǂan, ǂnauǃanao-i ǁî-i ǂû-i ǃnâ ǀamo ûiba hâhâ rase ūhâ tama hâ ǃkhaisa.

¹⁶Nēs ǃnâ da ge ǀnamma ge mûǂan, ǁîb ge ûib âba mâiba da ǃkhaisa; o da ge ǁkhāti surude hâ, ǃgâsaga ûiba mâibasa.

¹⁷Tsî khoe-i ga ǃhūbaib di ûixūna ūhâo, tsî i ga ǁî-i ǃgâsaba ǂhâsib ǃnâ mûo, tsî i ga ǁî-i ǂgaoba ǂganamba bio, matib kha Elob ǀnamma ǁî-i ǃnâ nî hâhâ?

¹⁸Ti ôarodo, a da tā mîs tsî nams tsîra ǀguira ǀkha ǀnam; î da dīs tsî amab tsîra ǀkha ǀnam.

¹⁹Tsî nēs ǃnâ da ra mûǂan, amaba xu da hâsa; o da ge sada ǂgaoga ǁîb aiǃâ a ǂkhîǂkhî ǁkhā.

²⁰Sada ǂgaob ga ǀgoraǃgâ da xaweb Eloba sada ǂgaob ǃgâ-ai kai, tsî xūn hoana a ǂan xui-ao.

²¹ǀNamsabedo, sada ǂgaob ga ǀgoraǃgâ da tama io, o da ge ǂhauǃnâsiba Elob ǃoa ūhâ;

²²tsî ǂgan da kara-i hoa-e da ge ǁîba xu ra hō, ǁîb di mîmāde da ra ǃkhōǀgaipe, tsî ǁîb aiǃâ ǃgâi hâ-e da ra dī xui-ao.

²³Tsî nēs ge ǁîb di mîmāsa, ǁîb di ôab Jesub Xristub di ǀons ǃnâ ǂgom tsî da nî ǀnamgusa, mîmā-eb ge mā das ǁkhās xase.

²⁴Tsî ǁîb di mîmāde ra sâu-i, ǁnā-i ge ǁîb ǃnâ ra hâ-e, tsî ǁîba ǁî-i ǃnâ; tsî nēs ǃnâ da ra mûǂan, sada ǃnâb hâsa: Gagab, ǁîb ge mā daba xu.