Read Khoekhoegowab 1 Johaneb 4 Bible Online

1 Johaneb 4 - Khoekhoegowab bible

1 Johaneb 4

¹ǀNamsabedo, tā mâ gaga-i hoa-e ǂgom re, î du gagade ǃâitsâ, ise di Eloba xu hâsa; ǂgui ǂkhaba kēbo-aogu ge ǃhūbaib ǃoa ǃgûǂoa xuige.

²Tsî nēs ǃnâ du ge Gagab Elob diba nî mûǂan: Mâ gaga-i hoa-i, Jesub Xristub ge ǁgans ǃnâ hāsa ra ǁguiǁnâ-i ge Eloba xu hâ-e;

³tsî mâ gaga-i hoa-i Jesub Xristub ge ǁgans ǃnâ hāsa ǁguiǁnâ tama-i ge Eloba xu hâ tama-e, tsî i ge a Xristub khākhoeb gaga, ǁî-i xa du ge ǁnâu-i hā i nîsa tsî i ge ǀnai ǃhūbaib ai hâ.

⁴ǀGôarodo, sadu ge Eloba xu hâ, tsî du ge ǁîna dan hâ; sadu ǃnâ hâb a ǃhūbaib ǃnâ hâb xa kai xui-ao.

⁵ǁÎn ge ǃhūbaiba xu hâ; ǁnā-amagan ge ǃhūbaib din xa ra ǃhoa, tsî ǃhūbaib ge ǁîna ra ǁnâu.

⁶Sada ge Eloba xu hâ; Eloba ra ǂan-i ge sada ra ǁnâu-e; Eloba xu hâ tama-i ge sada ǁnâu tama-e. Nēs tawa da ge amab di gagas tsî ǁhapus di gagasa ra mûǂan.

⁷ǀNamsabedo, a da ǀnamgu re, ǀnammi Eloba xu hâ xuige; tsî mâ-i hoa-i ǀnam ra-i ge Eloba xu ǃnae hâ-e, tsî i ge Eloba a ǂan.

⁸ǀNam tama-i ge Eloba ǂan tama-e, Elob a ǀnam xui-ao.

⁹Nēs ǃnâb ge ǀnammi Elob diba sada ǃnâ ge ǂhai, Elob ge ǁîb di Ôab ǀguise ǃnae hâba ǃhūbaib ai sî ǃkhaisa, ǁîba xu da nî ûiga.

¹⁰Nēs ǃnâb ge ǀnamma mâ: Sada ga Eloba ǀnam hâ is axase tama, tsîb ge sadu ǀnam hâ i, tsî ǁîb di Ôabab ge ǂkhîbagub sada ǁoren dib ase sî ǃkhaisa.

¹¹ǀNamsabedo, Elob ga sada nētikōse ǀnam hâ io, o da ge sada ona surude hâ, ǀnamgu da nîsa.

¹²Khoe-i xare-i ge Eloba tātsē ǃgapaǀî tama hâ; ǀnamgu da kao, ob ge Eloba hâǃnâ da, tsî ǀnammi âb ge sada ǃnâ ǀoa hâ.

¹³Nēs tawa da ra mûǂan, ǁîb ǃnâ da hâsa, tsî ǁîb sada ǃnâ hâsa, ǁîb di Gagab xab mā da hâ ǃkhaisa.

¹⁴Tsî sige ge mû tsî ra ǃkhō-am, ǁGûb ge ǀGôaba ǃhūbaib di ǃGâiǃōdī-aose sî ǃkhaisa.

¹⁵Mâ-i hoa-i, Jesub a Elob Ôa ǃkhaisa ga ǁguiǁnâ-i, ǁî-i ǃnâb ge Eloba hâ, tsî ǁî-e Elob ǃnâ.

¹⁶Tsî mûǂan tsî da ge ge ǂgom ǁnā ǀnammi, Elob sada ǃoa ūhâba. Elob ge a ǀnam, tsî ǀnammi ǃnâ ra hâhâ-i ge Elob ǃnâ ra hâ, tsî Eloba ǁî-i ǃnâ.

¹⁷Nēs ǃnâb ge ǀnamma sada ǃnâ ǀoa hâ, î da ga ǁkhoaǂgaosiba ūhâ ǀgoraǃgâs di tsēs ai; ǁîb ī khami da sada ona nē ǃhūbaib ai ī xui-ao.

¹⁸ǃAo-i ge ǀnammi ǃnâ hâ tama hâ, tsî ǀoa hâ ǀnammi ge ǃaoba ra doeǁgaǂui; ǃaob kom ǁkharahes xa ra ǂâio, tsî ǃao ra-i kom ǀnammi ǃnâ dīǀoaǀoasa tamao.

¹⁹A da ǁîba ǀnam, ǁîb ge sada aibe ǀnam hâ i xuige.

²⁰Khoe-i ga Eloba ta a ǀnam, ti mî tsî ǁî-i ǃgâsaba ǁkhano, ǁnā-i ge ǂhumi-ao-e. ǁÎ-i ǃgâsab, mû i raba i ga ǀnam tama io, mati i kha ǁnâi Elob, mû tama i hâba nî ǀnam?

²¹Tsî nē mîmāsa da ǁîba xu ūhâ, î-i Eloba ra ǀnam-e ǁî-i ǃgâsab ona ǀnam ti.