Read Khoekhoegowab 1 Johaneb 5 Bible Online

1 Johaneb 5 - Khoekhoegowab bible

1 Johaneb 5

¹Mâ-i hoa-i Jesub a Xristu ǃkhaisa ra ǂgom-i ge Eloba xu ǃnae hâ-e; tsî Elob, ǁîba xu i ǃnae hâba ǀnam hâ-i hoa-i ge ǁîba xu ǃnae hâ-i ona ra ǀnam-e.

²Nēs ǃnâ da ge ra mûǂan, Elob ôana da ǀnam hâsa, Eloba ǀnam tsî da ga ǁîb di mîmāde ǃkhōǀgaipeo.

³Nēb ge ǀnammi Elob diba, ǁîb di mîmāde da ga ǃkhōǀgaipeo; tsî ǁîb di mîmādi ge ǃgom tama hâ.

⁴Eloba xu ǃnae hâ-i hoa-i ge ǃhūbaiba ra dan-e, tsî nēs ge dans, ǃhūbaiba ra dansa: Sada ǂgoms.

⁵Tari-e kha, ǃhūbaiba ra dan-e? Jesub a Elob Ôa ǃkhaisa ra ǂgom-i ǀgui-i.

⁶Nēb ge ǁnāb, ǁgam-i tsî ǀaob tsîkha ǀkha ge hāb, Jesub Xristub, ǁgam-i ǀgui-i ǀkha tama i tsî ǁgam-i tsî ǀaob on ǀkha;

⁷Gagab ge ǃkhō-am raba, Gagab a ama amaga.

⁸Tsî ǃnonan ge ǃkhō-amgu rana: Gagab tsî ǁgam-i tsî ǀaob nē ǃnonan ge a ǀgui.

⁹Khoen di ǃkhō-amsa da kara ǃkhōǃoao, os ge Elob di ǃkhō-amsa ǁnās ǃgâ-ai a kai; Elob di ǃkhō-ams ge ǁnās, ǁîb di Ôab xab gere ǃkhō-amsa.

¹⁰Elob Ôab ǃnâ ra ǂgom-i ge ǃkhō-amsa ǁî-i ǃnâ ūhâ-e; Eloba ǂgom tama-i ge ǁîba ǂhumi-aose ra dī-e, ǁîb di Ôab xab ge Eloba ǃkhō-am ǃkhō-amsa i ǂgom tama hâ amaga.

¹¹Tsî nēs ge ǃkhō-ams, Elob ge sada ǀamo ûiba māsa; tsî nē ûib ge ǁîb di Ôab ǃnâ hâ.

¹²ǀGôaba ūhâ-i ge ûiba ūhâ-e. Elob Ôaba ūhâ tama-i ge ûiba ūhâ tama-e.

¹³Nēna ta ge goro xoaba du, sadu Elob Ôab di ǀons ǃnâ ra ǂgomdo, ǂan du nîga, ǀamo ûiba du ūhâsa.

¹⁴Tsî nēb ge ǁkhoaǂgaosib, ǁîb ǃoa da ūhâba: Xū-e da ga ǁîb di ǂâis ǃoa ǂgano, ob ge ra ǁnâu-am da.

¹⁵Tsî ǂgan da kara-i hoa-i ǃnâb ra ǁnâu-am da ǃkhaisa da ga ǂano, o da ge a ǂan, ǁîb tawa da ge ǂgan ǂgande da ra hōsa.

¹⁶Khoe-i ga ǁî-i ǃgâsab tawa mûo, ǁore-i ǁōba anu tama-eb ra ǁore ǃkhaisa, a-i Eloba ǀgore, ob ge ûiba nî mā bi, ǁnān ǁōba anu tamase ra ǁorena. ǁOre-i ge hâ, ǁōba anu hâ-e, ǁî-i nî ǀgorebahesa ta mî tama.

¹⁷ǂHanuoǃnâsi-i hoa-i ge a ǁore; tsî i ge ǁore-i, ǁōba anu tama-e hâ.

¹⁸ǂAn da ge a, mâ-i hoa-i, Eloba xu ǃnae hâ-i ǁore tama ǃkhaisa; xawe Eloba xu ǃnae hâ-i ge ǁî-aitsama ra sâusen, ob ge ǂkhababa ǁî-e ǃkhō tama hâ.

¹⁹ǂAn da ge a, Eloba xu da hâsa, tsî ǃhūbaib hoaragab ǂkhabab ǃnâ ǁgoesa.

²⁰Tsî da ge a ǂan, Elob Ôab ge hā tsîb ǁnâuǃāba mā da hâsa, ǁîb hîa amaba da nî mûǂanse; î da ǁîb hîa amab ǃnâ hâ, ǁîb di Ôab Jesub Xristub ǃnâ; nēb ge a ama Elo tsî a ǀamo ûi.

²¹ǀGôarodo, ǁî-aitsama ǃûisen ǁgôatsuiǁgoana xu! Amen.