Read Khoekhoegowab ǂHanuǂhanu-aogu 1 Bible Online

ǂHanuǂhanu-aogu 1 - Khoekhoegowab bible

ǂHanuǂhanu-aogu 1

¹Tsî i ge ge ī, Josuab di ǁōb khaoǃgâ, Israeli ôan ge ǃKhūba dî ǃkhaisa: Tari-e nî sida xa ǂguro ǃapa Kanaanǁîn ǃoa, ǁîna i nî ǃkhamūse?

²Ob ge ǃKhūba ge mî: Judab ge nî ǃapa; mû, tita ge ǃhūba ǁîb ǃomǁae ge mā.

³ǃNubaib ge Judaba ǃgâsab âb Simeonni ǃoa ge mî: ǃGûǃapa tita ǀkha ti ǃâs ǃnâ, î khom Kanaanǁîn ǀkha torodī, o ta ge tita ǁkhāti nî ǃgûǃapa sats ǀkha sa ǃâs ǃnâ. Nētib ge Simeonna ǁîb ǀkha ge ǃgûǃapa.

⁴Ob ge Judaba ge ǃgûǃapa, tsî ǃKhūb ge Kanaanǁîn tsî Perisiǁîn tsîna ǁîkha ǃomǁae ge mā, tsî kha ge Beseks tawa disiǀoadisi khoega ge ǂnau.

⁵Tsîn ge Adoni-Beseka Beseks tawa hō tsî ge ǃkhamū bi; tsîn ge Kanaanǁîn tsî Perisiǁîn tsîna ge ǂnau.

⁶Tsî Adoni-Beseki ge ge ǁhâ; o gu ge ǁîba sauruǃgon tsî ǁîba ǃkhō tsî ǃomkha âb tsî ǂaira âb di kaitsiǁgubede ge ǁhāǁnâ.

⁷ǃNubaib ge Adoni-Beseka ge mî: Hûdisi gao-aogu, ǃomgu âgu tsî ǂaidi âgu di kaitsiǁgubede ǁhāǁnâhe hâgu ge ti tāb ǃnaga hâ tsî ge ǂomarona sākhâi; tita ge dī khamib ge Eloba ge dīdawa-am te. Tsîn ge Jerusalems ǃoa ge ūsī bi, tsîb ge ǁnāpa ge ǁō.

⁸Judab ôan ge Jerusalemsa ǃkhamū tsî ū si tsî gôab di ǀāb ǀkha ǂnau si xui-ao, tsîn ge ǃāsa ge ǂhubi.

⁹Tsî ǁnās khaoǃgân ge Judab ôana ge ǁgôa, Kanaanǁînan nî ǃkhamūse, ǃhommi ai tsî ǃkhawagasǀî tsî ǃgoaǃnāb ǃnâ ǁan hâna.

¹⁰Tsî Judab ge Kanaanǁîn Hebrons tawa ǁan hân ǃoagu ge ǃgû (tsî ǀons Hebrons dis ge aibe Kirjat-Arba ge i) tsîn ge Sesaib tsî Ahimanni tsî Talmaib tsîga ge ǂnau.

¹¹Tsîb ge ǁnāpa xu Debirs di ǁansaben ǃoagu ge ǃgû; tsî ǀons Debirs dis ge aiga Kirjat-Sefer ge i.

¹²Tsî Kaleb ge ge mî: Kirjat-Sefersa ǂnau tsî ga ū sib, ǁîba ta ge tita ti ôas Axsasa tarase nî mā.

¹³ǃNubaib ge Otnieli, Kenab, Kaleb xa ǂkham ǃgâsab di ôaba ǁîsa ge ū; ob ge Kaleba ǁîba Axsas, ǁîb di ôasa tarase ge mā.

¹⁴Tsî i ge ge ī, ǁîb tawas ge hāo, os ge ǁîba ge ǂgaoǂgaoǃnâ, ǁîs di îb tawab nî ǃhū-e ǂgan ǃkhaisa, os ge eselsa xu ge uriǁgôa; ǃnubaib ge Kaleba ǁîs ǃoa ge mî: Tare-es ôa hâ?

¹⁵Os ge ǁîb ǃoa ge mî: ǀKhaexū-e mā te re. ǂNâsa ǃhū-ets ge mā te xuige ǁkhāti ǀaude ǀkhae te re. ǃNubaib ge Kaleba ǁîsa ǀgapise ǁgoe ǀaudi tsî ǃnaga ǁgoe ǀaudi tsîde ge mā.

¹⁶Tsî Keniǁîb din, Moseb ǀuib di ôan ge ǁkhāti Palmǃāsa xu Judab di ôan ǀkha ge ǃgûǃapa, Judab di ǃgaroǃhūb, Aradsa xu ǃkhawagasǀî ǁgoeb ǃoa; tsîn ge sī tsî ǁaes ǃnâ ge ǁan.

¹⁷Tsî Judab ge ǁîb di ǃgâsab, Simeonni ǀkha ge ǃgû, tsî kha ge Kanaanǁîn, Sefats tawa ǁan hâna ǂnau tsî ge ǀâxare; tsî ǀons ǁnā ǃās dis ge Horma ti ge ǂgaihe.

¹⁸ǁNās tawab ge Judaba Gasasa ge ū ǁîs di ǀkharib ǀkha, tsî Askelonsa ǁîs di ǀkharib ǀkha tsî Ekronsa ǁîs di ǀkharib ǀkha.

¹⁹Tsî ǃKhūb Judab ǀkha hâ xui-aob ge ǃhommi di ǁansabena ge doeǁgabē; xawe ǃgoaǃnāb di ǁansaben ge doeǁgabēhe ǁoa ge i, ǂnūǀurikuniden ge ūhâ i xui-ao.

²⁰On ge Hebronsa Kaleba ge mā, Moseb ge ǃhoa xase, tsîb ge ǃnona ǀgôagu Anaki diga ǁnāpa xu ge doeǁgaǂui.

²¹Xawe Jebusǁîn, Jerusalems tawa ǁan hânan ge Benjaminni ôana doeǁgaǂui tama; on ge Jebusǁîna Benjaminni ôan ǀkha Jerusalems tawa ge ǁan, nētsēs kōse.

²²Tsî Joseb ommi din on ge ge doeǃapa Bet-Els ǁga, tsî ǃKhūb ge ǁîn ǀkha ge hâ i.

²³Tsî Joseb ommi din ge Bet-Els tawa ge ǃkhē kai. ǀOns nē ǃās dis ge ǂguro Lus ti ge hâ i.

²⁴Tsî ǃkhē-aogu ge khoeb ra ǃāsa xu ǂoa ǃkhaisa ge mû, tsîn ge ǁîb ǃoa ge mî: ǃĀs di ǂgâǃkhaisa ǁgau ge re, o ge ge nî ǃgâidī tsi.

²⁵Tsî ǃās di ǂgâǃkhaisab ge ǁîga ǁgauo, o gu ge ǃāsa gôab di ǀāb ǀkha ge ǂnau; xawe khoeb tsî ǁîb ommi din hoana gu ge ge ǃgû kai.

²⁶ǃNubaib ge ǁnā khoeba Hetiǁîn di ǃhūb ǃnâ ge doeǂgâ; tsîb ge ǃāsa ge ǂnubi, tsîb ge ǀons âsa Lus ti ge ǂgai; nēs ge ǀons âsa nētsēs kōse.

²⁷Tsî Manaseb ge Bet-Seans dina doeǁgaǂui tama ge i ǁîs ǃnaga hâ ǃādi ǀkha, Tanaxsa ǁîs ǃnaga hâ ǃādi ǀkha, Dors ǁansabena ǁîs ǃnaga hâ ǃādi ǀkha, Jibleams di ǁansabena ǁîs ǃnaga hâ ǃādi ǀkha, Megidos di ǁansabena ǁîs ǃnaga hâ ǃādi ǀkha; tsî Kanaanǁîn ge ǁnā ǃhūb ǃnâ ge ǁan ǂgao hâ i.

²⁸Tsî i ge ge ī, Israeli ge ǀgaisao, ob ge Kanaanǁîna ǁgui-aisase ge sîsen kai, xaweb ge ǁîna doeǁgaǂuiǃari tama ge i.

²⁹Tsî Efraimmi ge Kanaanǁîn, Gesers tawa ǁan hâna doeǁgaǂui tama ge i, tsî Kanaanǁîn ge ǁîb ǁaegu ge ǁan Gesers tawa.

³⁰Sebulonni ge Kitrons di ǁansabena doeǁgaǂui tama ge i tsî Nahalols di ǁansaben on, tsî Kanaanǁîn ge ǁîb ǁaegu ge ǁan tsî ǁguibasa ge hî kaihe.

³¹Tsî Aseri ge Akos di ǁansabena doeǁgaǂui tama ge i, tsî Sidons di ǁansaben, Axlabs din, Axsibs din, Helbas din, Afiks din tsî Rehobs din tsîna;

³²tsî Aserǁîn ge Kanaanǁîn ǃhūb ǃnâ ǁan hân ǁaegu ge ǁan, ǁînan ge doeǁgaǂui tama i xui-ao.

³³Naftalib ge Bet-Semes di ǁansabena doeǁgaǂui tama ge i tsî Bet-Anats di ǁansaben tsîna, tsîb ge Kanaanǁîn ǃhūb ǃnâ ǁan hân ǁaegu ge ǁan; tsî ǁansaben Bet-Semes tsî Bet-Anats tsîra din ge ǁîna ǁguibasa ge hî kaihe.

³⁴Tsî Amorǁîn ge Danni ôana ge ǁgâi ǃhommi ǃoa; ǁînan ge mā-am tama ge i, ǃgoaǃnāb ǃnâ ǁgôasa.

³⁵ǁKhātin ge Amorǁîna Heres di ǃhommi ai ge ǁan ǂgao hâ i Ajalons tawa tsî Saalbims tawa, tsî Joseb ommi di ǃommi ge ge ǃgom ǁîn ǂamai, tsîn ge gere ǃoaba kaihe.

³⁶Tsî ǀkharib Amorǁîn dib ge ǃapaǃkhais Akrabimsa xu ǃhaoba xu tsî aiǃâb ǃoa ge i.