Read Khoekhoegowab ǂHanuǂhanu-aogu 10 Bible Online

ǂHanuǂhanu-aogu 10 - Khoekhoegowab bible

ǂHanuǂhanu-aogu 10

¹Abimelexi khaoǃgâb ge Tolab, Puab ôab, Dodob ôab, Isaskari khoeba ge khâi, Israelab nî sâuga. Tsîb ge Samirs tawa ge ǁan, Efraimmi ǃhommi ai.

²Tsîb ge ǁîba Israela ge ǂhanuǂhanu ǀgamdisiǃnonaǀa kuriga, tsîb ge ǁō tsî Samirs tawa ge ǁkhōhe.

³Tsîb ǁîb khaoǃgâb ge Jairi, Gileadǁîba ge khâi tsî Israela ǀgamdisiǀgamǀa kuriga gere ǂhanuǂhanu.

⁴Tsîb ge ǃnonadisi ǀgôaga ge ūhâ i, ǃnonadisi ǂkham eselrogu ai ra ǃgapiga, tsî ǁîgu ge ǃnonadisi ǃāde ge ūhâ i, Havot-Jair ti gu ge ǂgaidi, nētsēs kōse Gileadi ǃhūb ǃnâ hâde.

⁵Tsî Jairi ge ǁō tsî ge ǁkhōhe Kamons tawa.

⁶Tsî Israeli ôan ge ǃaruǀîǀgui ǃKhūb mûǁae a ǂkhabana gere dī, tsîn ge gere ǃoaba Baalgu, Astaroti, Siriab di elogu, Sidons di elogu, Moab di elogu, Amonni ôan di elogu tsî Filisteǁîn di eloga; tsîn ge ǃKhūba ǁnāxū tsî ǁîba ǃoaba tama ge i.

⁷Ob ge ǃKhūb di ǁaiba ge ǂhubi Israeliǀî; ob ge ǁîna ge ǁamaxū Filisteǁîn ǃomǁae tsî Amonni ôan ǃomǁae.

⁸Tsîn ge Israeli ôana ǁnā kurib ǁkhāb ǃnâ gere ǁgâiǀā tsî dāǃgâ, disiǁkhaisaǀa kurigu kōsen ge Israeli ôan, Jordanǃāb nauǃanib ai Amorǁîn di ǃhūb, Gileadi ǃnâ hâb ǃnâ hân hoan ǀkha gere dī xase.

⁹ǁNās tawan ge Amonni ôana Jordanna ge ǃgâu, ǁkhātin nî ǃkhamūga, Judab tsî Benjaminni tsî Efraimmi di omma; ob ge Israela kaise ge ǃao.

¹⁰ǃNubain ge Israeli ôana ǃKhūb ǃoa ǂgai tsî ge mî: Sida ge goro ǁore sa ǃoagu, sida Eloba da ge ǁnāxūs ǀkhas kas, Baalga da ge ǃoabas ǀkhas kas hoasa.

¹¹Ob ge ǃKhūba Israeli ôan ǃoa ge mî: Tita kha ǁî tama ta, Egipteǁîn, Amorǁîn, Amonni ôan, Filisteǁîn,

¹²Sidonǁîn, Amalekǁîn tsî Maonǁîn, sado ge ǁgâiǀāna xu, tita ǃoa du ge ǂgai ǃnubai ǁîn ǃomǁaeba xu ge ore du ta?

¹³Xawe du ge tita ge ǁnāxū, ǀkhara eloga du nî ǃoabase; ǁnā-amaga ta ge tita ǃaruǀî ore du tide.

¹⁴ǃGû, î du ǁnā eloga sī ǂgaiǀî, sadu ge ūǂuibasenga; ǁîga a gu ore du sadu ǂōǂōsib di ǁaeb ai.

¹⁵On ge Israeli ôana ǃKhūb ǃoa ge mî: Sida ge goro ǁore, îts ǁnâi satsa dī-ū da, sa mûǁae a ǃgâin hoan ǃoa; nēs ǀguisa dī îts nē tsēs ǁkhās ai ore da re.

¹⁶Tsîn ge ǃhao eloga ǁîn ǁaeguba xu dībē tsî ǃKhūba ge ǃoaba. ǃNubais ge ǀoms âba ge ǃoa Israeli di ǃoas ǂama.

¹⁷Tsî Amonni ôan ge ǂgaiǀhûhe tsî Gileadi ǃnâ sī ge ǁgoe; tsî Israeli ôan ge ǁnās ǃoa-ai ǀhûǀhûhe tsî Mispas tawa sī ge ǁgoe.

¹⁸ǁGoasis ge ǁaesa ge mî, Gileadi di ǂamsaga, nēba naub ǃoa: Tariba ǁnā aob, Amonni ôana nî ǃkhamūba? ǁÎb ge nî danakhoe, Gileadi di ǁansaben hoan ǂama.