Read Khoekhoegowab ǂHanuǂhanu-aogu 11 Bible Online

ǂHanuǂhanu-aogu 11 - Khoekhoegowab bible

ǂHanuǂhanu-aogu 11

¹Tsî Jeftab, Gileadǁîb ge ǃgari ǁē-ao ge i, xaweb ge ǀaiǀgôa ge i; tsî Gileadi ge Jeftab di î.

²Tsî Gileadi di taras ge ǁkhāti ǀgôaga ge ǁoraba bi, tsî nē taras di ôagu ge kai gu geo Jeftaba ǂhāǂui tsî ǁîb ǃoa ge mî: Sats ge sage îb di ommi ǃnâ ǀumi tide, ǀkhara taras di ôats a amaga.

³Ob ge Jeftaba ǃgâsagu âb di ais aiǃâba xu ǁhâ tsî Tobǃhūb ǃnâ sī ge ǁan, tsî ǁause ra hâ khoegu ge Jeftab tawa ǀhao tsî ǁîb ǀkha ge ǂoa.

⁴Tsî i ge ǀnî tsēdi khaoǃgâ ge ī, Amonni ôan ge Israela ǃkhamū ǃkhaisa.

⁵Tsî i ge ge ī, Amonni ôan ge Israela ǃkhamū ǃnubai gu ge Gileadi di kaiga ǃgû ǃkhaisa, Jeftaba gu nî Tobǃhūba xu ūhāga.

⁶Tsî gu ge Jeftab ǃoa ge mî: Hā îts sida di ǂamkhoe, î da Amonni ôana ǃkhamū.

⁷Xawe Jeftab ge Gileadi di kaigu ǃoa ge mî: Sago ǁî tamago, tita ge ǁkhan tsî ti îb di omma xu a ǂhāǂuigo? Tare xū-i ǃaroma go kha ǁnâi nēsi go hā, ǂōǂōsib ǃnâ go go ǂgâ ǃnubai?

⁸O gu ge Gileadi di kaiga Jeftab ǃoa ge mî: ǁNā-amagas ge sa tawa ge go hāsa, sige ǀkha ǃgû tsîts nî Amonni ôana ǃkhamūse, tsîts nî sige danase ībase, Gileadi di ǁansabeda hoada ǂama.

⁹ǃNubaib ge Jeftaba Gileadi di kaigu ǃoa ge mî: Sadu ga tita ūdawao, Amonni ôana ta nî ǃkhamūse, tsî ǃKhūb ga ǁîna ti ais aiǃâ māo, ǁnâi danase ta nî ība du?

¹⁰O gu ge Gileadi di kaiga Jeftab ǃoa ge mî: Ab ǃKhūba ǁnâuǃgâ-aose ī sada ǁaegu, sida ga sa mîs ǃoa dī tama io.

¹¹Nētib ge Jeftaba Gileadi di kaigu ǀkha ge ǃgû, tsî ǁaes ge ǁîba dana tsî ǂamkhoese ǁîn ǂama ge mâi. Tsî Jeftab ge ǁîb di mîdi hoade ǃKhūb di ais aiǃâ ge ǃhoa Mispas tawa.

¹²ǃAruǀîb ge Jeftaba sîsabega ge sî Amonni ôan di gao-aob ǃoa, mî rase: Tare-e khom tita tsî sats tsîkhoma ǁae-ūgu hâ, ots go hā ti tawa, ti ǃhūb ǀkhats nî torodīse?

¹³Ob ge Amonni ôan di gao-aoba Jeftab di sîsabegu ǃoa ge mî: Israeli ge Egipteba xub ge doeǂoa ǃnubai ti ǃhūba ge ū, Arnonna xu Jabokǃāb kōse tsî Jordanǃāb kōse; xuige ǁnâi ǁîba mādawa te ǂkhîb ǀkha.

¹⁴Tsî Jeftab ge ǃaruǀî sîsabega ge sî Amonni ôan di gao-aob ǃoa.

¹⁵Tsîb ge ǁîb ǃoa ge mî: Nētib ra mî Jeftaba: Israeli ge Moabǁîn di ǃhūb tsî Amonni ôan di ǃhūba ū tama hâ.

¹⁶Egipteba xun ge doeǂoaxao, ob ge Israela ǃgaroǃhūba ge doeǃganu, ǂĀxahurib kōse, tsîb ge Kades tawa ge sī.

¹⁷Tsî Israeli ge sîsabega ge sî Edomǁîn di gao-aob ǃoa, mî rase: A da sa ǃhūba-ū doeǃganu re; xawe Edomǁîn di gao-aob ge ǁnâumāsen ǂgao tama ge i. Tsîb ge ǁkhāti Moabǁîn di gao-aob ǃoa ge sî, ǁkhāti ǂgao tama ge iba. Nētib ge Israela Kades tawa ge hâ.

¹⁸ǁNās khaoǃgâb ge ǃgaroǃhūb ǃnâ ge ǃgû, tsîb ge Edomǃhūba ge doe-īǀkhā tsî Moabǁîn di ǃhūba, tsîb ge sores ra ǁhai ǀkhāba xu Moabǁîn di ǃhūb ǃnâ sī tsî Arnonni nauǃanib ai sī ge ǁgoe, tsîn ge Moabǁîn di ǀkharib ǃnâ sī tama ge i, Arnonni a Moabǁîn di ǀkhari xui-ao.

¹⁹Tsî Israeli ge sîsabega ge sî Sihonni, Amorǁîn di gao-aob, Hesbons di gao-aob ǃoa, tsî Israeli ge ǁîb ǃoa ge mî: A da sa ǃhūba-ū doeǃganu re, ti ǃkhais kōse.

²⁰Xawe Sihonni ge Israela ǁîb di ǀkhariba doeǃganu kaisa ǂgomaiǂnûi tama ge i; ob ge Sihonna ǁaes âb hoaba ǀhaoǀhao tsî Jahas tawa sī ge ǁgoe; tsîb ge Israela ge ǃkhamū.

²¹Tsî ǃKhūb, Israeli Elob ge Sihonna ǁaes âb hoab ǀkha Israeli ǃomǁae ge mā; on ge ǁîba ge ǂnau; nētib ge Israela Amorǁîn di ǃhūba ǀumise ge ū, ǁnā ǃhūb ǃnâ ǁan hân di ǃhūba.

²²On ge Amorǁîn di ǀkharib hoaba ǀumise ge ū, Arnonna xu Jabokǃāb kōse, tsî ǃgaroǃhūba xu Jordanǃāb kōse.

²³Nētib ge ǃKhūb, Israeli Eloba Amorǁîna Israeli ǁaes di ais aiǃâba xu ūn hâna xu ge doeǁgaǂui; tsî ǁîn di ǀumi-aots nî satsa?

²⁴ǁNāb, sa elob Kemob ge sa aiǃâ ūb hâna xu doeǁgaǂuibats kha ǀumi tide? Nēti da ge sida ǁnān ǃKhūb, sida Elob ra sida aiǃâ ūn hâna xu doeǁgaǂuin hoana nî ǀumi.

²⁵ǁNâi Balaki, Sipori ôab, Moabǁîn di gao-aob ǃgâ-aits a ama-ai satsa? Israeli ǀkha ǀguia ǂnoagub ge? Torodīb ge ǀguia ǁîb ǀkha?

²⁶Israeli ge ǃnonakaidisi kuriga Hesbons ǃnâ ge ǁan tsî ǃhairodi âs ǃnâ, tsî Aroers ǃnâ tsî ǃhairodi âs ǃnâ, tsî ǁnā ǃādi, Arnonni amǃgâ hâdi hoadi ǃnâ; tarexats kha ǁnâi ǁnāǃnubai ge ore bi tama hâ i?

²⁷Tsî tita on ge ǁore tsi tama hâ, tsî sats ra ǂkhabase dī-ū te, tita ǀkhats ra torodīs ǀkha; ab ǁnâi ǁnā ǃKhūb hîa ǂHanuǂhanu-aoba nētsē ǀgoraǃgâ Israeli ôan tsî Amonni ôan tsîn ǁaegu.

²⁸Xawe Amonni ôan di gao-aob ge Jeftab di mîdi, ǁîb ǃoab ge sîde ǁnâu tama ge i.

²⁹ǃNubaib ge ǃKhūb di Gagaba Jeftab ai ge hā, ob ge Gileadi tsî Manaseb tsîkha ge ǃgûǃnâǃganu; ob ge Mispas Gileadi dis kōse ge ǃganu, tsî Mispas Gileadi disa xub ge ge ǃganu Amonni ôan kōse.

³⁰Tsî Jeftab ge ǃKhūba mîmâi-e mîmâiba tsî ge mî: Amonni ôanats ga ti ǃomǁae māǃario,

³¹o i ge ǂoaxa ka-i, ti ommi di dao-amsa xu ga ǃoa te nîse ǂoaxa-i, ǁî-i ge ǂkhîb ǀkha ta ga Amonni ôana xu ǁaruo nî ǃKhūb di, tsî tita ge ǁî-e khauǁguibase nîra ǁguiba.

³²Nētib ge Jeftaba Amonni ôan ǃoa ge ǃgâu, ǁînab nî ǃkhamūga; tsî ǃKhūb ge ǁîna ǁîb ǃomǁae ge mā.

³³Tsîb ge ǁîna ge ǂnau Aroersa xu, Minnits tawats ra sīs kōse, ǀgamdisi ǃāde tsî Abel-Keramims kōse ama kai ǂnau-i ǀkha. Nētin ge Amonni ôana Israeli ôan di ais aiǃâ ge ǃgamǃgamhe.

³⁴Tsî Jeftab ge ǁarusīo Mispas tawa, mû os ge ǁîb di ôasa ǁîba ge ǃgûǃoa ǂnauxūn tsî ǀkhōxūn tsîn ǀkha. Tsîs ge ǁîsa hū ge i, ǀguiseb ūhâ ǀgôasa, tsîb ge ǀnî ǀgôab kas, ǀnî ǀgôas kas hoasa ge ūhâ tama hâ i.

³⁵Tsî i ge ge ī, ǁîsab ge mûo, ob ge saran âba ǀkhau tsî ge mî: Okha, ti ôa, sas ge go ǃgamǃgamtoa te, tsî sas ge ǁnān, tita ra gongonǃnân ǁaegu hâ; ti amsa ta ge ǃKhūba ge khowaba, tsî ta ge a oa ǁoa.

³⁶Os ge ǁîsa ge mîǀî bi: Ti îtse, sa amsats ga ǃKhūba khowaba hâo, ǁnâi dī-ū te re, sa amsa xu i ge ǀkhī khami, ǃKhūb ge sa khākhoen, Amonni ôan tawa ǀkhaotoaba tsis khaoǃgâ.

³⁷Tsîs ge ǃaruǀî ǁgûb ǃoa ge mî: As nē ǃkhaisa tita ǀkha ī: ǀGam ǁkhâkha ǀguikha kōse ǀûǀkhā te, î ta ǃgû, î ta ǃhomgu ai sī, î ta ti oaxaesisa āba, tita tsî ti horesadi tsîse.

³⁸Ob ge: ǃGû, ti ge mî, tsîb ge ǀgam ǁkhâkha kōse ge ǁnāxū si. Os ge horesadi âs ǀkha ǃgû tsî oaxaesis âsa ge āba ǃhomgu ai.

³⁹Tsî i ge ge ī, ǀgam ǁkhâkha di ǀunis ais ge ǁgûb ǃoa oa ǃkhaisa; ob ge mîmâis âb hîab ge mîmâisa ǁîs tawa ge dīǀoaǀoa; tsîs ge ǁîsa ao-e ǂan tama ge hâ i. O i ge ge ǁnaeti kai Israeli ǃnâ,

⁴⁰kurikorobe di Israeli di ǀgôade gere ǃgû ǃkhaisa, Jeftab Gileadǁîb di ôasa di nî ābase, haka tsēde kurib ǃnâ.