Read Khoekhoegowab ǂHanuǂhanu-aogu 12 Bible Online

ǂHanuǂhanu-aogu 12 - Khoekhoegowab bible

ǂHanuǂhanu-aogu 12

¹ǃNubai gu ge Efraimmi di aoga ǂgaiǀhûhe tsî ǀapasǀî Safons ǁga ge doeǃgâu; tsî gu ge Jeftab ǃoa ge mî: Tare xū-i ǃaromats kha ǁnâi go doeǃgâu, Amonni ôanats nî ǃkhamūse, tsîts sige ǂgai tama hâ, ǃgûǀkhā tsi ge nîse? O ge ge ommi âtsa ǀaes ǀkha nî khauǃkhū.

²Ob ge Jeftaba ǁîgu ǃoa ge mî: Tita tsî ti ǁaes tsîda ge Amonni ôan ǀkha kaise ge ǃkham, tsî ta ge sado ge ǂgai, xawe du ge ǁîn ǃomǁaeba xu ore da tama ge i.

³Tsî ore te ǂgao tama du hâ ǃkhaisa ta ge mûo, o ta ge ti ǀomsa ti ǃomǁae ū tsî ge ǃgâu Amonni ôan kōse, tsî ǃKhūb ge ǁîna ti ǃomǁae ge mā. Tarexa du kha nētsē go hā te, ǃkhamū te du nîga?

⁴Ob ge Jeftaba Gileadi di aogu hoaga ǀhaoǀhao tsî Efraimmi ǀkha ge ǃkham; tsî Gileadi di aogu ge Efraimma ge ǂnau, Gileadǁîn hîa Efraimmi tsî Manaseb tsîkha ǁaegu hân ge a Efraimmi di ǁhâsabe, tin ge mî xui-ao.

⁵Gileadǁîn ge Efraimǁîna Jordanǃāb di ǃgâu-amde ūǀhana xui-ao; tsî i ge ge ī, Efraimmi di ǁhâsaben ge: A ta ǃgâu, ti mîo, o gu ge Gileadi di aoga ǁîb ǃoa ge mî: Efraimǁîtsa? Tsî: Hî-î, tib ge mîo,

⁶o gu ge ǁîb ǃoa ge mî: Shibolet, ti mî, ti. Xaweb ge ǁîba: Sibolet, ti mî tsî ǂhanuse ǁnāti ǃhoa ǁoa i; o gu ge ǃkhō tsî ge ǃgam bi Jordanǃāb di ǃgâu-amdi tawa, Efraimmi xan ge ǁnā ǁaeb ǁkhāb ai hakadisiǀgamǀaǀoadisina ǁnās kōse.

⁷Tsî Jeftab ge Israela ǃnani kuriga gere ǂhanuǂhanu; tsî Jeftab, Gileadǁîb, ge ǁō tsî ge ǁkhōhe Gileadi di ǃādi ǃnâ.

⁸Tsî ǁîb khaoǃgâb ge Ibsanni, Betlehemǁîba Israela gere ǂhanuǂhanu.

⁹Tsîb ge ǃnonadisi ǀgôaga ge ūhâ i; tsîb ge ǃnonadisi ǀgôade omma xu ge sîǂoa, tsîb ge ǃnonadisi ǀgôade ǁîb di ôaga ge ūǂgâxaba; tsîb ge Israela hû kuriga gere ǂhanuǂhanu.

¹⁰ǃNubaib ge Ibsanna ǁō tsî ge ǁkhōhe Betlehems tawa.

¹¹Tsî ǁîb khaoǃgâb ge Elonni, Sebulonǁîba Israela gere ǂhanuǂhanu; tsîb ge disi kuriga Israela gere ǂhanuǂhanu.

¹²Tsî Elonni, Sebulonǁîb ge ǁō tsî ge ǁkhōhe, Ajalons tawa Sebulonni di ǃhūb ǃnâ.

¹³Tsî ǁîb khaoǃgâb ge Abdonni, Hilleli ôab, Piratonǁîba Israela gere ǂhanuǂhanu.

¹⁴Tsîb ge hakadisi ǀgôaga ge ūhâ i tsî ǃnonadisi ǀgôagu di ôaga hûdisi ǂkham eselrogu ai ra ǃgapiga; tsîb ge ǁîba Israela ǁkhaisa kuriga gere ǂhanuǂhanu.

¹⁵ǃNubaib ge Abdonni, Hilleli ôab, Piratonǁîba ge ǁō; tsîb ge Piratons tawa, Efraimmi di ǃhūb ǃnâ, Amalekǁîb di ǃhommi ai ge ǁkhōhe.