Read Khoekhoegowab ǂHanuǂhanu-aogu 13 Bible Online

ǂHanuǂhanu-aogu 13 - Khoekhoegowab bible

ǂHanuǂhanu-aogu 13

¹Tsî Israeli ôan ge ǃaruǀî ǃKhūb mûǁae a ǂkhabana gere dī, ob ge ǃKhūba ǁîna Filisteǁîn di ǃomǁae ge mā, hakadisi kuriga.

²Tsîb ge aoba ge hâ i Soras dib, Danni ǃhaos dib, Manoax ti ǀon hâba; tsî taras âb ge ǂûtanioǃnâ tsî ǁora tama ge hâ i.

³Tsî ǀhomǃgāb ǃKhūb dib ge nē taras tawa ǂhai tsî ǁîs ǃoa ge mî: Mû, sas ge nēsi ǁora tama hâ tsî ǀgôa-e ūhâ tama hâ, xawes ge ǀgamǀkhā tsî ǀgôaba nîra ǁora.

⁴Îs ǁnâi nēsi ǃûisen îs tā ǂauxûib kas, ǀnî ǀgaisa āxūb kas hoasa ā, îs tā ǃanuoǃnâ ǂû-e ǂû.

⁵Mû, ǀgamǀkhā tsîs ge ǀgôaba nîra ǁora, danas âb ai i ǂkhomgôa-e hā tideba. ǀGôab ge Elob khaiǂuisabese nî ī ǁgûs di ǃnāba xu; tsîb ge ǁîba Israela nîra oretsoatsoa, Filisteǁîn di ǃomǁaeba xu.

⁶ǃNubais ge ǁnā tarasa hāǂgâxa tsî aob âs ǀkha ǃhoa tsî ge mî: Elob ao-i ge ti tawa go hā, tsî ais âb ge Elob ǀhomǃgāb di ais ǁkhās khami go ī i, kaise ǃaoǃaosa; tsî ta ge dî bi tama go i, mapa xub hâsa, tsîb ge ǀons âba mîba te tama hâ.

⁷Tsîb ge tita ǃoa go mî: Mû, sas ge ǀgamǀkhā tsî ǀgôaba nîra ǁora; îs ǁnâi nēsi tā ā, ǂauxûib kas, ǀnî ǀgaisa āxūb kas hoasa, îs tā ǃanuoǃnâ xū-e ǂû, ǀgôab ge Elob khaiǂuisabese nî ī xuige, ǁgûs di ǃnāba xu, ǁîb di ǁōtsēs kōse.

⁸ǃNubaib ge Manoaxa ǀaexase ǃKhūba ǀgoreǀî tsî ge mî: Ti ǃKhūtse, ǁnā Elob aob, sats go sîba ab ǁkhawa sim ǃoa hā, îb sima ǁkhāǁkhā, tare-em ǁnā ǀgôab hîa nî ǃnaeb ǀkha nî dī ǃkhaisa.

⁹Tsî Elob ge Manoaxi di domma ge ǁnâu-am; tsî ǀhomǃgāb Elob dib ge ǁkhawa taras tawa ge hā. Tsîs ge ǁîsa ǃaub ǃnâ ge ǂnôa i, tsî aob âs, Manoaxi ge ǁîs ǀkha hâ tama ge hâ i.

¹⁰Os ge tarasa ǃhae tsî ǃkhoe tsî aob âsa ge ǂanǂan, tsîs ge ǁîb ǃoa ge mî: Mû, ǁnā aob ge ti tawa go ǂhai, ǁnātsē ti tawa ge hāba.

¹¹Ob ge Manoaxa khâi tsî taras âba ge sao; tsîb ge ǁnā aob tawa sī tsî ǁîb ǃoa ge mî: Satsa ǁnā aotsa, nē taras ǃoa ge ǃhoatsa? Ob ge: ǁÎ ta ge, ti ge mî.

¹²Ob ge Manoaxa ge dî: Sa mîdi nî īs kao, o ǀgôaba matib nî dī? Mati ī ûibab kha nî ûi?

¹³Ob ge ǀhomǃgāb ǃKhūb diba Manoaxi ǃoa ge mî: Taras ǃoa ta go mî xūn hoana xus ge nî ǃûisen.

¹⁴ǂAuxûiǂûhaisa xu ga ǀkhī xū-i hoa-es ge ǂû tide, tsî ǃanuoǃnâ xū-i xares-es ge ǂû tide; tsî tita ge mîmā si xūn hoanas ge nî dī.

¹⁵ǃNubaib ge Manoaxa ǃKhūb di ǀhomǃgāb ǃoa ge mî: Am ǀhapeǀhape tsi, îm piriro-e sa ais aiǃâ ǁāǁā.

¹⁶Xawe ǀhomǃgāb ǃKhūb dib ge Manoaxi ǃoa ge mî: Tsî ǀhapeǀhape te ro ka xawe ta ge saro di pereb xa ǂû tide; tsî khauǁguiba-e ro ga ǁguiba o ro ge ǃKhūba ǁî-e nî ǁguiba. Manoaxi ge ǀū ge i xui-ao, ǃKhūb di ǀhomǃgāb a ǃkhaisa.

¹⁷Ob ge Manoaxa ǃKhūb di ǀhomǃgāb ǃoa ge mî: Matits ǀon hâ satsa, îm ǃgôa tsi, mîs âts ga hāo?

¹⁸Ob ge ǃKhūb di ǀhomǃgāba ǁîb ǃoa ge mî: Tarexats ra ǁnāti ti ǀonsa dîǃā, ǁîs a buruxa xawe?

¹⁹ǁGoasib ge Manoaxa piriro-i tsî ǂûǁguibas tsîna ū tsî ǃhaob ai ǃKhūba ge ǁguiba; tsîb ge ǁîba buruburuxase ge dī, dīb âb ǃnâ; tsî Manoaxi tsî ǁîb di taras tsîra ge gere mûǃnâ.

²⁰Tsî i ge ge ī, ǁhabub ra altarsa xu ǀhommiǀî ǃapa hîab ge ǃKhūb di ǀhomǃgāba altars di ǁhabub ǃnâ ǃapa ǃkhaisa. Tsî Manoaxi tsî taras âb tsîra ge mûo, o ra ge ǁîra di aira ai ǃhūb ai ge ǁnāǁgoe.

²¹Tsî ǃKhūb di ǀhomǃgāb ge ǃaruǀî Manoaxi tsî ǁîb di taras tsîra tawa ǂhai tama. ǃNubaib ge Manoaxa ge ǂanǃā, ǃKhūb di ǀhomǃgāb go i ǃkhaisa.

²²Ob ge Manoaxa taras âb ǃoa ge mî: ǁŌm ge nîra, Elobam go mû xui-ao.

²³Os ge taras âba ǁîb ǃoa ge mî: ǃKhūb ga sama ǃgam ǂgao-o, ob ga khauǁguibas tsî ǂûǁguibas tsîra sam di ǃomǁaeba xu ǃkhōǃoa tsî nēn hoana ǁgau tsî ǁnā ǁaeb ai nēti ī xū-e sama ǁnâu kai tama hâ.

²⁴ǁNās khaoǃgâs ge nē tarasa ǀgôaba ge ǁora, tsîs ge Simsonni ti ge ǂgai bi; tsî ǀgôab ge ge kai, tsî ǃKhūb ge ǁîba ge ǀkhae.

²⁵Tsî Gagab ǃKhūb dib ge ǁîba ge ǁgaritsoatsoa, Danni di ǁgoeǃkhais ǃnâ, Soras tsî Estaols tsîra ǁaegu.