Read Khoekhoegowab ǂHanuǂhanu-aogu 14 Bible Online

ǂHanuǂhanu-aogu 14 - Khoekhoegowab bible

ǂHanuǂhanu-aogu 14

¹Tsî Simsonni ge Timnas ǃoa ǁgôa tsî Timnas tawa tara-e ge mû, Filisteǁîn ôadi di-e.

²Ob ge ǃapa tsî ǁgûb tsî ǁgûs tsîra ǁîsa ǂanǂan tsî ge mî: Tita ge tara-e go mû Timnas tawa, Filisteǁîn ôadi di-e; î ro ǁnâi ǁîsa tarase ūba te.

³O ra ge ǁîb îb tsî ǁîb îs tsîra ge mîǀî bi: Tara-i xare-e hâ tama i hâ sa ǃgâsagu di ôadi ǃnâ tsî sa ǁaes hoas ǃnâ, ots ra ǃgû, tara-ets nî ūga, Filisteǁîn, ǁnā ǃgaohesa tamana ǃoa? Ob ge Simsonna ǁgûb ǃoa ge mî: Nēsa tarase ūba te re, ǁîs ge ti mûǁae a ǃgâi xuige.

⁴Tsî ǁîb di îb tsî ǁîb di îs tsîra ge ǀū ge i, nēs ǃKhūba xu hâsa, ǃgâi ǀhapiǀhapiǃkhai-eb ra ôa amaga Filisteǁîn tawa; Filisteǁîn ǁnā ǁaeb ai Israeli ǂama gere gao amaga.

⁵Nētib ge Simsonna ǁgûb tsî ǁgûs tsîra ǀkha Timnas ǃoa ge ǁgôa. Tsî Timnas di ǂauxûiǂûǃhanagu kōsen ge sīo, mû, ob ge ǂkham xamma ǃgui rase ǁîba ge ǃoa.

⁶ǃNubaib ge ǃKhūb di Gagab xa ge hāǂamhe, ob ge ǁîba ge ǀkhauǃā, piriro-i ra ǀkhauǃāhes ǁkhās xase; tsî xū-i xare-i ge ǁîb ǃomǁae hâ tama ge hâ i; tsîb ge ǁkhāti ǁgûb tsî ǁgûs tsîra ǂanǂan tama, tare xū-eb go dī ǃkhaisa.

⁷Tsî ǁgôa tsîb ge taras ǀkha ge ǃhoa, tsîs ge Simsonni mûǁae ǃgâi ge i.

⁸Tsîb ge ǀnî tsēdi khaoǃgâ ǁkhawa ge hā, ū sib nîga; ǁgoasib ge ge ǂgō, ǁō hâ soros xammi disab nî kōse; tsî mû, ǃhabugu di ǂguib ge xammi di soros ǃnâ hâ tsî danib tsîna.

⁹Ob ge ǁîba ǃomǁaeb âb ǃnâ ū tsî ge ǃgû, ǃgûgause ra ǂûǃâ; tsîb ge ǁgûb tsî ǁgûs tsîra ǃoa ǃgû tsî ǁîra ǁîb xa ge mā; o ra ge ge ǂû; xaweb ge ǁîra ǂanǂan tama, danibab go xamma xu ū ǃkhaisa.

¹⁰Tsî ǁîb di îb ge ǁnā taras tawa ǁgôasīo, ob ge Simsonna ǁnāpa ǃgameǁâu-e ge dī, ǁnāti gu ǂkhamkhoega gere dī xui-ao.

¹¹Tsî i ge ge ī, ǁîba gu ge mûo, o gu ge ǃnonadisi horesaga ge ū, ǁîb ǀkha nî hâga.

¹²Ob ge Simsonna ǁîgu ǃoa ge mî: Tita ge nēsi nî ǀhae kai go; ǁî-e go ga hû tsēdi ǃgameǁâus didi ǃnâ ǁguiǃā tsî hōǂuio, o ta ge tita ǃnonadisi ǀui linesarana nî mā go tsî ǃnonadisi ǂgaeǂgāǃkhunisaran tsîna.

¹³Tsî ǁguiǃāba te ǁoa go kao, o go ge sago tita ǃnonadisi ǀui linesarana nî mā tsî ǃnonadisi ǂgaeǂgāǃkhunisarana. O gu ge ǁîb ǃoa ge mî: ǀHaes âtsa mā ge, î ge ǁîsa ǁnâu.

¹⁴Ob ge ǁîgu ǃoa ge mî: ǂÛ-i ge ō-aoba xu ge ǂoa, tsî ǂkhonsib ge ǀgaisaba xu ge ǂoa. Tsî gu ge ǀhaesa ǃnona tsēdi ǃnâ ǁguiǃāba bi ǁoa ge i.

¹⁵ǁNās khaoǃgâ i ge hûǁî tsēs ai ge ī, o gu ge Simsonni di taras ǃoa ge mî: Sa aoba ǃhoadan, îb ǁnā ǀhaesa ǁguiǃāba ge, î ge tā ǀnîsi sas tsî sa îb di omma ǀaes ǀkha khauǃkhū. Saro kha ǁkhau ge ro go, sige dina ro nî ūǀhana ge ga? Ti i ī tama hâ?

¹⁶Os ge Simsonni di tarasa ǁîb aiǃâ kaise ā tsî ge mî: ǁKhans ǀguisats ra hî te satsa, tsîts ǀnam te tama hâ; ti ǁaes di ôagats ge ǀhaesa, hōǂui gu nîse mā, xawets ge ǁîsa ǁguiǃāba te tama hâ. Ob ge ǁîs ǃoa ge mî: Mû, ti îb tsî ti îs tsîra xawe ta ge ǁîsa ǁguiǃāba tama hâ, mati ta kha ǁnâi sasa nî ǁguiǃāba?

¹⁷Tsîs ge ǁîb aiǃâ ǁnā hû tsēdi, ǁîdi ǃnân ge nē ǃgameǁâusa ūhâdi di hûǁî tsēs ai ge ā; o i ge hûǁî tsēs ai ge ī, ǁî ǃkhaisab ge ǁîsa ge mîǃāba ǃkhaisa, ǁîbas gere ǁgari amaga; os ge ǀhaesa ǁîs di ǁaes ôana ge mîǃāba.

¹⁸ǃNubai gu ge ǃās di aoga ǁîb ǃoa ge mî hûǁî tsēs ai, sores ganupe ǂgâ tama hâ hîa: Tare xū-e kha danib ǃgâ-ai a ǂkhon? Tsî tare xū-e kha xammi xa a ǀgaisa? Ob ge ǁîgu ǃoa ge mî: Ti tsâub ǀkha go ga ǃhūǃgao tama i hâo, o go ga ǀhaesa hōǂui tama hâ.

¹⁹ǃNubaib ge ǁîba ǃKhūb di Gagab xa ge hāǂamhe, tsîb ge Askelonǁîn ǃoa ǁgôa tsî ǁîn xa ǃnonadisi khoega ge ǃgam; tsîb ge ǁîgu di sarana ū tsî ǂgaeǂgāǃkhunisaraga ge māǁnâ gu, ǀhaesa ge mîǃāga. Tsî ǁaib âb ge ge khâi, tsîb ge ǁgûb di ommi ǃoa ge ǁaruǃapa.

²⁰Tsî Simsonni di taras ge ge ǁîb di horesab, ǁîba ge ǁnūb di tara kai.