Read Khoekhoegowab ǂHanuǂhanu-aogu 15 Bible Online

ǂHanuǂhanu-aogu 15 - Khoekhoegowab bible

ǂHanuǂhanu-aogu 15

¹Tsî i ge ǀnî tsēdi khaoǃgâ ge ī, ǃhoroǃgaos di tsēdi ǃnâ, ob ge Simsonna taras âba piriro-i ǀkha ge sari, tsîb ge ge mî: A ta ti taras tawa ǂgâ ǃnā-oms ǃnâ. Xawe ǁgûb âs ge ǁîba ǂgâsa mā-am tama ge i.

²Tsîb ge ǁgûb âsa nēti ge mî: Tita ge ge ǂâi, ǁîsats hoaragase ǁkhan hâ ǃkhaisa, o ta ge ǁîsa sa horesaba ge mā. O ǁîs di ǃgâsas ǂkhamsa ǁîs xa îsa tamas hâ? As ǁîsa ǁîs di amǃnâs ǃnâ hâba tsi.

³ǃNubaib ge Simsonna ǁîn ǃoa ge mî: Tita ge nē ǃnās ai a ǀhapio, Filisteǁîn tawa, ǁîna ta ga ǂkhabase sîsenūo.

⁴Ob ge Simsonna ǃgû tsî ǃnonakaidisi ǀgiriga sī ge ǃkhō, tsî ǃamamǀaede ū tsî ǂareba ǂareb tawa ǃgae tsî ǀgui ǃamamǀaesa ǀgam ǂarekha ǁaegu ge ǂgā.

⁵Tsîb ge ǃamamǀaede ǀaes ǀkha ǃamam tsî ǀgiriga mâ hâ ǃhorob Filisteǁîn dib ǃnâ ge ǃkhoeǂgâ kai; tsîb ge ǃgaeǀkhādadi tsî mâ hâ ǃhoroba ge ǂhubi, ā, ǂauxûiǂûǃhanagu tsî ǀkherahaiǃhanagu kōse.

⁶O gu ge Filisteǁîga ge mî: Tari-e go dī nēsa? On ge ge mî: Simsonni, Timnaǁîb di ǀuiǀgôab, taras âba ū tsîb ge ǁîsa horesab âba mā amaga. ǃNubain ge Filisteǁîna ǃapahā tsî ǁîs tsî ǁîs di îna ǀaes ǀkha ge khauǃkhū.

⁷ǁGoasib ge Simsonna ǁîn ǃoa ge mî: ǁNāti du kha ǁnâi nî dī? Amase sadu tawa ta ǀkhaobasen hâs khaoǃgâ ǀgui ta nî ǀû.

⁸Tsîb ge ǁîna ge ǂnau, tîs tsî ǂnamib tsîra tawa, ama kai ǂnau-i ǀkha; tsîb ge ǁgôa tsî Etams ǃhaob di ǀgapib ai ge sī ǁan.

⁹ǃNubain ge Filisteǁîna ǃapa tsî Judab ǃoa-ai ǁgoe tsî Lehis kōse ge khoraǃāsen.

¹⁰O gu ge Judab di aoga ge mî: Tare xū-i ǃaroma du kha sige ǃoagu go ǂoaxa? O gu ge ge mî: Sige ge go ǂoaxa, Simsonna ge nî ǃgaese, ǁîba ge nî dī-ūse, ǁîb ge sida dī-ūs ǁkhās xase.

¹¹ǁGoasi gu ge ǃnonaǀoadisi aoga ge ǁgôa, Judaba xu Etams ǃhaob di ǃgoaǃnāb kōse tsî Simsonni ǃoa ge mî: ǂAn tamats kha go hâ i, Filisteǁîn ra sada ǂama gao ǃkhaisa? Tarexats kha ǁnâi ǁnāti go dī-ū da? Ob ge ǁîgu ǃoa: ǁÎn go tita dī-ūs ǁkhās xase ta ge ǁîna go dī-ū, ti ge mî.

¹²O gu ge ǁîb ǃoa: Sige ge go ǁgôaxa, ǃgae tsi ge nîse, Filisteǁîn di ǃomǁaeb ǃnâ ge nî māǁnâ tsise, ti ge mî. Ob ge Simsonna ǁîgu ǃoa: Nūba te re sago ǃgam te tide ǃkhaisa, ti ge mî.

¹³O gu ge ǁîb ǃoa ge mî: Hî-î, ǃgae tsis ǀguisa hî tsî ge ge nî ǁîn ǃomǁae māǁnâ tsi, xawe ge ge tātsē ǃgam tsi tide. O gu ge ǀgam ǀasa tsurikha ǀkha ǃgae bi tsî ǃhaoba xu ge ǂgaeǂguiǃapa bi.

¹⁴Tsî Lehis tawab ge hāo, on ge Filisteǁîna ǁîba ge dâǃoa; xawe ǃKhūb di Gagab xab ge hāǂamheo, o kha ge tsurikha, ǁôakha âb ai hâkha, lineǁapakha, ǀaes ǀkha khauhe hâkha xase ge ī; o kha ge ǃgae-ūdakha âba ǁîb di ǃomkha xu ge tsunibē.

¹⁵Tsî ǀasa eselǃnaniba hō tsîb ge ǃommi âba ǀhōǂui tsî ū bi tsî ǁîb ǀkha ǀguiǀoadisi khoega ge ǂnau.

¹⁶ǁGoasib ge Simsonna ge mî: Eselǃnani-i ǀkha ǀgui ǂguiba, ǀgam ǂguikha, eselǃnani-i ǀkha ta ge tita ǀguiǀoadisi khoega go ǂnau.

¹⁷Tsî i ge ge ī, ǃhoatoab geo, ob ge ǃnaniba ǃomǁaeb âba xu ge aoxū, tsîb ge ǁnā ǃāsa Ramat-Lehi ti ge ǂgai.

¹⁸Tsî kaiseb ge ǁgâo, ob ge ǃKhūb ǃoa ǂgai tsî ge mî: Sats ge sa ǃgāta di ǃomma xu nē ǃgâiǃgâb kaiba go mā; tsî ta kha ǁnâi ǁgâs xa ǁō tsî nî nē ǃgaohe tama hâgu di ǃomǁae ǁnā?

¹⁹ǃNubaib ge Eloba ǃgoaǃkhais Lehis tawa hâsa ge ǁhāǃā; o-i ge ǁgam-e ge ǀkhī ǁîsa xu, tsîb ge ge ā. Os ge gagas âba oa, tsîb ge ge khoakhoahe. ǁNā-amagas ge ǀons âsa, ǂGaiǀî-aob di ǀAus, ti ge ǂgaihe, Lehis ǃnâ hâsa, nētsēs kōse.

²⁰Tsîb ge Israela ge ǂhanuǂhanu Filisteǁîn di tsēdi ǃnâ, ǀgamdisi kuriga.