Read Khoekhoegowab ǂHanuǂhanu-aogu 16 Bible Online

ǂHanuǂhanu-aogu 16 - Khoekhoegowab bible

ǂHanuǂhanu-aogu 16

¹Tsî Simsonni ge ge ǃgû Gasas ǃoa; tsîb ge ǁnāpa tara-e ge mû, ǀai-ao-e, tsîb ge ǁîs tawa ge ǂgâ.

²ǃNubain ge Gasaǁîna ge mîbahe: Simsonni ge nēpa go hāǂgâxa; on ge ǃgûma tsî tsuxub hoaba ge ǁgoeǃgâ bi ǃās di ǁāb ǃnâ; xawen ge tsuxub hoaba ǃnōsase hâ tsî: ǁGoaǂnobos ǀkha da ge nî ǃgam bi, ti ge mî.

³Xawe Simsonni ge tsuxuǃgâb kōse ge ǁgoe; ǃnubaib ge tsuxuǃgâb ai khâi tsî ǃās ǁāb di dao-amra ǁîra di ǃnamamǃgâhaikha ǀkha ǃkhō tsî ǁîna ge ūbē ǁkhaehaib ǀkha, tsîb ge ǁîna ǃhōra âb ai ǁgui tsî ǁîna ge taniǃapa ǃhommi di ǂnaob, Hebrons di ais aiǃâ ǁgoeb ai.

⁴Tsî i ge ǁnās khaoǃgâ ge ī, tara-eb ge ǁâ ǃkhaisa, ǃgoaǃnāb Soreki tawa, Delila ti ǀon hâsa.

⁵ǃNubai gu ge Filisteǁîn di gaosaga ǁîs ǃoa ǃapahā tsî ge mî: ǃHoadan bi îs mû, mâ xū-i ǃnâb hâ kai ǀgaib âba, tsî mâ xū-i ǀkha ge ga ǁîba ǀgaidā tsî ǁîba ǃgae ǁkhā ǃkhaisa, ǁnora bi ge nîga; o ge ge mâb hoab âge ǀguiǀoadisi tsî ǀguikaidisi ǀhaiǀurimarina nî mā si.

⁶Os ge Delilasa Simsonni ǃoa ge mî: Mîǃāba te re, mâ xū-i ǃnâb hâ sa kai ǀgaiba, tsî mâ xū-i ǀkhats ǃgaehe ǁkhā ǃkhaisa, ǁnorahets nîse.

⁷Ob ge Simsonna ǁîs ǃoa ge mî: Hû ǀasa tsurigu ǀkhan ga ǃgae te, ǂnâsa tamagu ǀkha, o ta ge ga ǂkhabu, tsî ta ga nau khoe-i khami ī.

⁸ǁGoasi gu ge Filisteǁîn di gaosaga hû ǀasa tsurigu hîa ǂnâsa tamaga ge ūǃapa, tsîs ge ǁîba ǁîgu ǀkha ge ǃgae.

⁹Tsî ǃkhē-aogu ge ǁîs tawa ǃnā-oms ǃnâ ge ǂnôa i. Os ge ǁîba ge mîǀî: Filisteǁîgu ra hāǂam tsi, Simsontse! Ob ge ǁnā ǀasa tsuriga ge ǂgaeǃgao, ǀkhoa ǀâb di ǁapa-i ra ǃgâuǃā khami, ǀaes xa i ra ǃkhōhe ǃnubai. Nētib ge ǀgaib âba ǂansa tama ge i.

¹⁰ǃNubais ge Delilasa Simsonni ǃoa ge mî: Mû, sats ge go ǃhō te tsî ǂhumiba go mîba te; mîǃāba te ǁnâi re, mâ xū-i ǀkhats nî ǃgaehe ǁkhā ǃkhaisa.

¹¹Ob ge ǁîs ǃoa ge mî: ǀAsa tsurigu tātsē sîsenūhe tama hâgu ǀkha gu ga ǃgae teo, o ta ge ga ǂkhabu, tsî ta ga nau khoe-i khami ī.

¹²Os ge Delilasa ǀasa tsuriga ū tsî ǁîgu ǀkha ǃgae bi tsî ǁîb ǃoa ge mî: Filisteǁîgu ra hāǂam tsi, Simsontse! Tsî ǃkhē-aogu ge ǃnā-oms ǃnâ ge ǂnôa i. Ob ge ǁîga ǁôakha âba xu ǁaparo-i axase ge ǂgaeǃgao.

¹³Os ge Delilasa Simsonni ǃoa ge mî: Nēsis kōsets ge go ǃhō te tsî ǂhumiba go mîba te; ǁnâi mîǃāba te re, mâ xū-i ǀkhats nî ǃgaehe ǁkhā ǃkhaisa. Ob ge ǁîs ǃoa ge mî: Ti danas di hû ǂgomasenǀûgan ga ǂgapu-ūxūs ǃnâ ǂgapuǀhao-o.

¹⁴Os ge ǁîde ge ǁapoǁapo ǀuri-i ǀkha, tsîs ge ǁîb ǃoa ge mî: Filisteǁîgu ra hāǂam tsi, Simsontse! Ob ge ǂoms âba xu ǃnoaǂkhai tsî ǂgapu-ūheb hâ ǂgomasenǀûgu di ǀuriba ge ūbē tsî ǂgapu-ūxūs tsîna.

¹⁵Os ge ǁîb ǃoa ge mî: Matits kha: ǀNam si ta a, ti nî mî, sa ǂgaob tita ǀkha hâ tama hâ xawe; ǃnona ǃnādi kōsets ge go ǃhō te, tsîts ge mîǃāba te tama hâ, mâ xū-i ǃnâb sa kai ǀgaiba hâ ǃkhaisa.

¹⁶Tsî i ge ge ī, tsēkorobes ra mîdi âs ǀkha ǁgâi tsî ǁgari bi ǃnubais ǁîb ǀomsa ge ǃoa ǃkhaisa, ǁōb kōse.

¹⁷Ob ge ǂgaob âb hoaba mîba si tsî ǁîs ǃoa ge mî: Tātsē i ge ǂkhomgôa-e ti danas ai hā tama hâ, Elob khaiǂuisabe ta a xui-ao, ti îs di ǃnāba xu; ǂkhomhe ta kao, ob ga ti ǀgaiba tita xu ǂgō, tsî ta ga ǂkhabu, tsî ta ga nau khoen khami ī.

¹⁸Tsî Delilas ge mû, ǂgaob âb hoabab go mîǃāba si ǃkhaisa os ge sî tsî Filisteǁîn gaosaga ǂgai tsî ge mî: Nē ǃnās ai ǂoaxa, ǂgaob âb hoabab ge go mîǃāba te xuige. O gu ge Filisteǁîn di gaosaga ǁîs tawa ǂoaxa tsî marina ge ūhā ǁîgu ǃomǁae.

¹⁹ǃNubais ge ǁîba ge ǁom kai tîǃgâkha âs ai, tsîs ge khoeba ǂgai tsî ǁîb danas di hû ǂgomasenǀhaide ge ǂkhomǁnâ kai, tsîs ge ǁîba ge ǁnoratsoatsoa; ob ge ǀgaib âba ge ǂgōxū bi.

²⁰Os ge: Filisteǁîgu ra hāǂam tsi, Simsontse! ti ge mî. Ob ge ǂoms âba xu ǃnoaǂkhai tsî ge mî: Tita ge nē ǃnās ai nau ǃnādi ais ǁkhās khami ǂoa tsî nî xoresen; ǀūb ge i xui-ao, ǃKhūb ǁîba xu ǂgō hâ ǃkhaisa.

²¹ǃNubai gu ge Filisteǁîga ǃkhō bi tsî mûra âba ge ǁhoreǂui; tsî gu ge ǁîba Gasas ǃoa ǂgaeǂguiǁgôa tsî ge ǃgae bi, ǀgam ǂaiǁkhamkha ǀkha, ob ge ǁkhamisa gere ǁkhami ǃkhō-oms ǃnâ.

²²Tsî ǀûn danas âb din ge ǁkhawa ge ǀomtsoatsoa, ǂkhomheb ges khaoǃgâ.

²³ǃNubai gu ge Filisteǁîn di gaosaga ge ǀhû, ǁîn di elob Dagonnan nî kai ǁguiba-e ǁguibaga tsî nî dâga; tsîn ge ge mî: Sida di elob ge sida khākhoeb Simsonna sida ǃomǁae go mā.

²⁴Tsî ǁaes ge mû bi on ge ǁîn di eloba ge ǃkhōǀkhā, nētin ra mî xui-ao: Sida di elob ge sida khākhoeba sida ǃomǁae go mā, sida ǃhūba ge hîǀhurub tsî sida ǃgamhesana ge ǂgui kaiba.

²⁵Tsî i ge ge ī, ǂgaob ân ge dâxao, on ge ge mî: Simsonna ǂgai îb sida aiǃâ ǀkhō. On ge Simsonna ge ǂgai ǃkhō-omsa xu, ob ge aidi ân aiǃâ ge ǀkhō, tsîn ge ǁîba ǂkhâǃnâhaikha ǁaegu ge mâi.

²⁶ǁGoasib ge Simsonna ǁnā ǀgôab, ǁîba ge ǃkhōǁôa hâ ib ǃoa ge mî: A ta ǀgū, î ta ǂkhâǃnâhaikha ommi ǁîkha ai ǁapoǁapohe hâkha tsâǀkhā, î ta ǁîkha tawa ǃgâsen.

²⁷Tsî ommi ge aogu tsî taradi tsîn xa ǀoa ge hâ i, tsî Filisteǁîn di gaosagu hoagu ge ǁnāpa ge hâ i; tsî ǂamais ain ge ǃnonaǀoadisi nî ī aogu tsî taradi tsîn, matib ra Simsonna ǀkhō ǃkhaisa ra mûǃnâna ge hâ i.

²⁸ǃNubaib ge Simsonna ǃKhūb ǃoa ǂgai tsî ge mî: ǃKhūtse, ǃKhūtse, tita xa ǂâi îts nē ǃnās ǀguisa ǀgaiǀgai te re, ti Elo, î ta ti mûra ǂama Filisteǁîn tawa ǀkhaobasen.

²⁹Tsî Simsonni ge ǁaegub ǃnâ mâ ǂkhâǃnâhaikha, ommi ǁîkha ai ǁapoǁapohe hâkha tsî ǁîkha tawab ǃgâsen hâkha ge ǃkhō, ǀguiba amǀkhāb ǁôab âb ǀkha tsî nauba ǁareǀkhāb ǁôab ǀkha;

³⁰tsî Simsonni ge: Ti ǀomsa as ǁō Filisteǁîn ǀkha, ti mî tsî ge ǃgamǃgâ ǀgaib ǀkha, ob ge omma ge ǁnā gaosagu ai tsî ǁaes, ǁîb ǃnâ hâs hoas ai. Tsî ǁō gen, ǁōb âb ǃnâb ge ǃgamn ge ǁnān, ûib âb ǃnâb ge ǃgamn ǃgâ-ai ge ǂgui i.

³¹ǁGoasi gu ge ǃgâsagu âba ge ǁgôaxa tsî ǁgûb di ommi hoaragaba, tsîn ge ūkhâi bi tsî ge ūǃapa bi, tsîn ge Soras tsî Estaols ǁaegu ge ǁkhō bi ǁîb îb Manoaxi di ǀhobas ǃnâ; tsîb ge ǁîba Israela ǀgamdisi kuriga ge ǂhanuǂhanu.