Read Khoekhoegowab ǂHanuǂhanu-aogu 17 Bible Online

ǂHanuǂhanu-aogu 17 - Khoekhoegowab bible

ǂHanuǂhanu-aogu 17

¹Tsîb ge khoeba ge hâ i Efraimmi ǃhommi ai, Mixa ti ǀon hâba.

²ǁÎb ge ǁgûs ǃoa ge mî: ǁNā ǀguiǀoadisi tsî ǀguikaidisi ǀhaiǀurimarin, sas ge ūǀhanahen, ǁîn ǃaromas ge ǀâxaren tsî ǁîn xas ge ti ǂgaera ǃnâ ǃhoan, mû, ǁnā marin ge ti tawa hâ, tita ge ǁîna ge ū. ǃNubais ge ǁgûsa ge mî: Ab ti ôaba ǃKhūba ǀkhaebahe hâ!

³Nētib ge ǁgûsa ǁnā ǀguiǀoadisi tsî ǀguikaidisi marina ge mādawa. Os ge ǁgûsa ge mî: Tita ge ǁnā mariba ǃKhūba hoaragase ge khaiba hâ i, ti ôab ǃaroma, ǁhāhesa ī-i tsî ǂnâhesa ī-eb nî dīse; o ta ge ǁîba ra mādawa tsi.

⁴Xaweb ge ǁnā mariba ǁgûsa ǁkhawa ge mā. Os ge ǁgûsa ǀgamkaidisi ǀhaiǀurimarina ū tsî ǁîna ǃhuniǀuriǂnau-aoba ge mā; ǁîb ge ǁîn xa ǁhāhesa ī-i tsî ǂnâhesa ī-e ge dī; ǁî-i ge Mixab di oms ǃnâ ge hâ i.

⁵Tsî nē aob Mixab ge elo-omma ge ūhâ i; tsîb ge efoba ge dībasen tsî omelona, tsîb ge ǀgôagu âb di ǀguiba ǃomma ge ǀoaǀoaba, prister kaiba bib nîga.

⁶ǁNā tsēdi ǃnâ i ge gao-ao-e ge hâ tama hâ i Israeli ǃnâ; mâ-i hoa-i ge ǁî-i mûǁae a ǃgâi-e gere dī.

⁷Tsîb ge ǂkham khoeba ge hâ i, Betlehems Judab dis dib, Judab ǃhaos diba; ǁîb ge Leviǁî ge i, tsîb ge ǁnāpa ǃhaokhoese ge hâ.

⁸Tsî nē aob ge ǁnā ǃās, Betlehem-Judasa xu ge doebē, ǀkhara, ǃkhai-i ǃgâiba bi ka-i hoa-i tawab nî hâga. Tsî Efraimmi ǃhommi tawab ge Mixab di oms kōse sīo, aiǃâb ǃoab nî ǃgûse,

⁹ob ge Mixaba ǁîb ǃoa ge mî: Mapa xuts ra hā? Ob ge ǁîb ǃoa ge mî: Tita ge Leviǁîta Betlehem-Judas dita, tsî ta ge ra ǃgûma, ǃgâiba te ka ǃkhai-i tawa ta nî hâse.

¹⁰ǃNubaib ge Mixaba ǁîb ǃoa ge mî: Tita ǀkha hâ îts ǁgûse tsî pristerse ība te re; o ta ge tita kurikorobe disi ǀhaiǀurimarina nî mā tsi, tsî ǂhâts hâ sarana tsî sa ûixūn tsîna; ob ge Leviǁîba ge ǃgûǀkhā bi.

¹¹Ob ge Leviǁîba ge māsen, ǁnā aob ǀkha hâsa; tsî ǂkhamkhoeb ge ǀgôagu âb di ǀguib khami ge ība bi.

¹²Tsî Mixab ge Leviǁîb di ǃomma ge ǀoaǀoa; ob ge ǁîba ge prister kaiba; nētib ge Mixab di ommi ǃnâ ge hâ.

¹³ǃNubaib ge Mixaba ge mî: Nēsi ta ge a ǂan, ǃKhūb nî ǃgâidī te ǃkhaisa nē Leviǁîba ta pristerse ūhâ amaga.