Read Khoekhoegowab ǂHanuǂhanu-aogu 18 Bible Online

ǂHanuǂhanu-aogu 18 - Khoekhoegowab bible

ǂHanuǂhanu-aogu 18

¹ǁNā tsēdi ǃnâ i ge gao-ao-e hâ tama ge hâ i Israeli ǃnâ; tsî ǁnā tsēdi ǃnâs ge Danǁîn di ǃhaosa ǀumi-amǃnâ-e ge ôabasen, ǁnāpan nî ǁanga; ǁnā tsēs kōsen ge ǁîna Israeli ǃhaodi ǃnâ ǀumi-amǃnâ-i ǂâu hâ-e hō tama ge hâ i xui-ao.

²On ge Danni ôana ǁîn di ǃhaosa xu koro khoega ge sî ǁîn di ǀgausa, aogu, hîa ǃkham ǁkhāgu, Sorasa xu tsî Estaolsa xu, ǃhūba gu nî ǃkhēga tsî ǁîba nî ôaǃnâga; tsîn ge ǁîgu ǃoa ge mî: ǃGû î go ǃhūba ôaǃnâ. O gu ge Efraimmi di ǃhommi tawa ge sī, Mixab di oms kōse, tsî gu ge ǁnāpa ge hâǂkhai.

³Tsî Mixab di oms tawa hâǃâ gu ge ǂkham khoeb, Leviǁîb di domma ge ǁnâuǃā; o gu ge ǁnāǀî sī tsî ǁîb ǃoa ge mî: Tare-ets nēpa ra ôa? Tsî tari-e nēpa go hā-ū tsi?

⁴Ob ge ǁîba ge mî ǁîgu ǃoa: Nēti tsî nētib ge Mixaba ge dī te; ǁîb ge tita ge ǃgae, tsî tita ge ǁîba pristerse ība.

⁵O gu ge ǁîb ǃoa ge mî: Eloba dîǃā re, î ge ǂan, iseb sige di daob, ǁîb ai ge ra ǃgûba nî ǃgâiǃgâ ǃkhaisa.

⁶Ob ge pristera ǁîgu ǃoa ge mî: ǂKhîb ǀkha ǃgû; sago daob hîa go ra ǃgûb ge Elob di ais aiǃâ hâ.

⁷ǃNubai gu ge ǁnā koro khoega ǃgû tsî Lajis tawa ge sī; tsî gu ge ǁaes ǁîs ǁaegu hâsa ge mû, sâusase ǁgoese, Sidonǁîn di dommi ǃoa ǃnōsase tsî ǂkhîse hâse; tsî ǀumiǃkhūkhoeb ge ǁnāpa ge ǀkhai i, mâ ǃkhai-i hoa-i ǃaroma khoe-e ra ǁgâiǀāba ǁnā ǃhūb ǃnâ; tsîn ge ǁkhāti ǃnūse ge hâ i Sidonǁîna xu, tsîn ge ǀnî khoe-i xare-e ǁae-ū tama ge hâ i.

⁸Tsîn ge ǁîn di ǃgâsagu tawa ge sī Soras tsî Estaols tsîra tawa, tsî ǁîn di ǃgâsagu ge ǁîn ǃoa ge mî: Tare-e go ra mî?

⁹O gu ge ge mî: Khâi, î da ǁîna ǃoa doeǃapa; ǁnā ǃhūba ge go sī kō, tsî mû kaiseb ge a ǃgâi; mati du nî ǃnō? Tā ǀope doesa, sī tsî du nî ǃhūba ǀumise ūhâga.

¹⁰Sī du kao, o du ge ǁūse hâ ǁaes tawa nî sī, tsî ǃhūb ge a hara, Elob ǁîba sadu ǃomǁae go mā xuige; ǃkhai-i, ǁî-i tawa i mâ xū-i, ǃhūbaib ai hâ-i hoa-e tôasi tama-e.

¹¹ǃNubai gu ge ǁnāpa xu Danǁîǃhaos din xa Soras tsî Estaolsa xu ge doeǃapa ǃnanikaidisi khoegu, ǀāxūna ǃgaesen hâga.

¹²Tsî gu ge doeǃapa tsî ge ǁgoe, Kirjat-Jearims tawa Judab ǃnâ; ǁnā-amagan ge ǁnā ǃāsa Mahane-Dan ti ge ǂgai nētsēs kōse; mû, ǁîs ge Kirjat-Jearims ǃgâb ai hâ.

¹³Tsî ǁnāpa xu gu ge Efraimmi ǃhommi ǃoa doeǃgâu tsî Mixab di ommi kōse ge sī.

¹⁴ǁGoasi gu ge ǁnā koro aogu, Lajis di ǃhūba ge ǃkhēǃgûga ǃeream tsî ǁîgu di ǃgâsagu ǃoa ge mî: ǂAn go a xare, ǁnā omgu ǃnâb efoba hâ ǃkhaisa tsî omelona tsî ǁhāhesa tsî ǂnâhesa ība? Î go ǁnâi ǂan, tare-e go nî dīsa.

¹⁵ǃNubai gu ge ǁnāǀî ǂgō tsî ge sī Leviǁî ǂkhamkhoeb di oms tawa Mixab di oms ǃnâ; tsî gu ge ǂkhîb xa ge dî bi.

¹⁶Tsî ǁnā ǃnanikaidisi khoegu Danni ôan digu ge toroǀāxūn âga ǃgaesen hâǃâ ge mâ, ǁāb ǃnâ.

¹⁷Tsî ǁnā koro aogu, ǃhūba ge ǃkhēǃgûgu ge ǃapaǂgâ tsî ge ūbē ǃgaohesa īb, efob, omelon tsî ǂnâhesa ība; tsî pristeri ge sī ge mâ, ǁāb ǃnâ, ǃnanikaidisi khoegu, torob di ǀāxūna ǃgaesen hâgu ǀkha.

¹⁸Tsî ǁîgu ge Mixab di oms ǃnâ ǂgâ tsî ǃgaohesa īb, efob tsî ǂnâhesa īb tsîna ūbēo, ob ge pristera ǁîgu ǃoa ge mî: Tare-e go ra dī?

¹⁹O gu ge ǁîb ǃoa ge mî: ǃNō, îts sa ǃomma ams âts ai ǁgui, îts sige ǀkha ǃgû, îts sige ǁgûse tsî pristerse ība. ǃGâiba tsi-e xare, ǀgui aob ǀguib oms di pristersets nî īsa, Israelǁîn ǃhaoǃnā tamas ka io, ǃhaos di pristersets nî īs xa?

²⁰ǃNubaib ge pristeri di ǂgaoba ǃgâiaǂgao kai, tsî efoba ge ū tsî omeloga tsî ǃgaohesa īb tsîna, tsîb ge ǁaes ǁaegu ge sī.

²¹Nēti gu ge dabasen tsî ge dāǁnâ; tsî gu ge ǀgôaron, ǀgoan tsî xūn tsîna ge aiǃgû kai.

²²Tsî Mixab di omsa xu gu ge ǃnūo, o gu ge aogu, oms ǃnâ hâgu, Mixab oms ǀgūse hâga ge ǂgaiǀhûhe, tsî gu ge Danni ôana ge saoǁae.

²³O gu ge Danni ôana ge ǂgaiǃgon; on ge aidi âna daba tsî Mixab ǃoa ge mî: Tare-ets hō hâ, ots ǁîga go ǂgaiǀhû?

²⁴Ob ge ǁîba ge mî: Sago ge ti elogu hîa ta ge dībasenga go ūbē pristeri ǀkha, tsî go ge go bē; tare-e ǃgauba te hâ? Tsî tare-e kha nē-e, sago tita ǃoa: Tare-ets hō hâ? ti ra mî-e?

²⁵On ge Danni ôana ǁîb ǃoa ge mî: Sa domma ab sida tawa tā ǁnâuhe, îts tā aogu, ǁaixa gagas â-igu xa hāǂamhe, îts sa ûiba tā ǂoaǃnâ tsî sa oms din di ûiba.

²⁶Nētin ge Danni ôana daob ân ai aiǃâb ǃoa ge ǃgû; tsî Mixab ge ǁîb xan a ǀgaisa ǃkhaisa mûo, ob ge dabasen tsî ge ǁaru.

²⁷On ge ǁîna Mixab ge kuru xūna ge ū, tsî pristeri hîab ge ūhâ ib tsîn ge Lajis tawa ge sī, ǃnōsa tsî ǁūse hâ ǁae-i tawa, tsîn ge ǁîna gôab di ǀāb ǀkha ge ǂnau, tsî ǃāsan ge ǀaes ǀkha ge khauǃkhū.

²⁸Tsî khoe-i ǁîna ga ore hâ-i ge ǀkhai ge i; Sidonsa xus ge ǃnūse ge hâ i, tsî khoe-i ǀkhan ge ǁaeǁaesen tama hâ i xui-ao; tsîs ge ǃgoaǃnāb Bet-Rehob tawa hâb ǃnâ ge ǁgoe i. Tsîn ge ǃāsa ǁkhawa ǂnubi tsî ǁîs ǃnâ ge ǁan.

²⁹Tsîn ge ǀons ǁnā ǃās disa Dan ti ge ǂgai, ǁîn di îb Danni Israela ge ǁorabaheb di ǀons ǃoa; nē ǃās di ǀons ge aibe Lajis ti gere ǂgaihe xawe.

³⁰Tsî Danni ôan ge ǁhāhesa ība ge ǂnûikhâibasen; tsî Jonatanni, Gersommi ôab, Moseb ôab, ǁîb tsî ǁîb di ôagu ge Danǁîn ǃhaos di prister ge i, ǃhūb din ge ǃkhōsan ase ūbēhes kōse.

³¹Nētin ge Mixab di īb hîab ge kuruba ǁîn ǁaegu ge ǂnûikhâi, Elob ommi Silos ǃnâ hâ tsēdi hoadi kōse.