Read Khoekhoegowab ǂHanuǂhanu-aogu 19 Bible Online

ǂHanuǂhanu-aogu 19 - Khoekhoegowab bible

ǂHanuǂhanu-aogu 19

¹Tsî i ge ǁkhāti ǁnā tsēdi, ǁîdi ǃnâ i gao-ao-e Israeli ǃnâ hâ tamadi ai ge ī, Leviǁî aob, ǃhaokhoese Efraimmi ǃhommi di ǃgâb ai hâb, taras, ǀgamitaras Betlehem-Judas disa ge ū ǃkhaisa.

²Tsî ǀgamitaras âb ge ǁîb ǀkha hâǃâ ǀai tsî ǁîba xu ge bē, ǁgûb di ommi Betlehem-Judas dib ǃoa; tsîs ge ǁnāpa ǀnî tsēde ge hâ i, haka ǁkhâgu kōse.

³Ob ge aob âsa khâi tsî ge ǃgûǃgon si, ǂgaob âs ra ǂgao xaseb nî ǃhoase, ǁkhawab nî ǁîsa ūhāga; tsî ǃgāb âb ge ǁîb ǀkha ge hâ tsî ǀnî eseln tsîna. Os ge ǁîba ǁgûb âs di ge i ommi ǃoa ge ūǂgā. Tsî ǂkham taras di îb ge mû bio, ob ge ǃoa bib ge ǃkhais xa ge ǃgâiaǂgao.

⁴Tsî ǀuiǁgûb âb, ǂkham taras di îb ge ǁîba ge ǁkhau, ob ge ǃnona tsēde ge hâ i ǁîb ǀkha; tsî ra ge ǂû tsî ge ā tsî ǁnāpa ge ǁomǂkhai.

⁵Tsî hakaǁî tsēs ai i ge ge ī, ǃnauǁgoaga ra ge khâi ǃkhaisa; ob ge ge khâi, ǃgûb nîga; ǁgoasib ge ǂkham taras di îba ǀuiǀgôab âb ǃoa ge mî: ǂGaob âtsa ǀgaiǀgai perero-i ǀkha î ro ǁnās khaoǃgâ ǃgû.

⁶O ra ge ǂnû tsî ǂû tsî ge ā. ǃNubaib ge ǂkham taras di îba aob ǃoa ge mî: Māsen îts ǁomǂkhai îb ǂgaob âtsa ǃgâiaǂgao.

⁷Tsî aob ge ge khâi, ǃgûb nîga, xawe ǀuiǁgûb âb ge ǁîba ge ǁgūǃgâ, ǁkhawab nî ǁnāpa ǁomǂkhaise.

⁸Tsî koroǁî tsēs aib ge ǃnauǁgoaga khâio, ǃgûb nîga, ob ge ǂkham taras îba ge mî: ǂGaob âtsa ǀgaiǀgai. O ra ge tsēs ra toas kōse ge ǀhawe; tsî ra ge ge ǂû.

⁹ǃNubaib ge aoba ge khâi, ǁîb tsî ǁîb di ǀgamitaras tsî ǃgāb âb tsîna; ob ge ǀuiǁgûb, ǂkham taras îba ge mî: Kō re tsēs go toa, tsî i ge go ǃui, xuige ǁomǂkhai re; mû, tsēs go toa, xuige ǁomǂkhai re nēpa îb ǂgaob âtsa ǃgâiaǂgao re, î ro ǁarikamǁgoa, ǃnauǁgoaga saro di daoba khâiba îts sa tentoms ǃoa ǁaru.

¹⁰Xawe aob ge ǁomǂkhai ǂgao tama ge i, ob ge khâi tsî ǃgû tsî Jebus (ǁnās ge Jerusalemsa) ǃoa-ai ge sī tsî ǀgam ǃgaeǃgâhe hâ eselra ǁîb ǀkha; tsî ǀgamitaras âb ge ǁkhāti ǁîb ǀkha ge hâ i.

¹¹Tsî Jebus ǀgūsen ge sī tsî tsēs ge toao, ob ge ǃgāba ǀhonkhoeb âb ǃoa ge mî: ǃGû î da nē ǃās Jebusǁîn dis ǃnâ ǂgâ î da ǁîs ǃnâ ǁomǂkhai.

¹²Ob ge ǀhonkhoeb âba ǁîb ǃoa ge mî: Tā da nē ǃhao ǃās ǃnâ ǂgâ, Israeli di ǃā tamasa, î da Gibeas kōse ǃgû.

¹³ǃAruǀîb ge ǃgāb âb ǃoa ge mî: ǃGû î da ǁnā ǃādi ǀguisa ǀgū, î da Gibeas tawas kas, Ramas tawas kas hoasa ǁomǂkhai.

¹⁴Nētin ge dāǁnâ tsî ge ǃgû; tsî sores ge ǁîna Gibeas, Benjaminni dis, tawa ge ǂgâxū.

¹⁵On ge ǁnāǀî ge ǂoa, Gibeas tawan nî ǁomǂkhaise. Tsî ǂgâb geo, ob ge ǃās di ǁaegub ǂgās ai ge hâ, khoe-i xare-i ǁîna nî oms ǃnâ ǁom kai-i a ǀkhai amaga.

¹⁶Tsî mû, kaira aob ge sîsenni âb, ǃhanab aib goro dība xu ge hā, ǃui-am ǁaeb ai; tsî aob ge ǁkhāti Efraimmi ǃhommi di ge i, ǃhaokhoese Gibeas tawa hâba, xawe ǃās khoen ge Benjaminni ôa ge i.

¹⁷Tsî ǃgapakhâib geo, ob ge ǃgûkhoeba ǃās di daob ai mûǂnôa; ob ge kaira aoba ge mî: Mâǀîts ra ǃgû? Tsî mapa xuts ra hā?

¹⁸Ob ge ǁîb ǃoa ge mî: Sida ge ra doeǃgâu Betlehem-Judasa xu Efraimmi ǃhommi, ǁîb di ta ab di ǃgâbǀkhāb kōse; tsî ta ge Betlehem-Judas ǃoa ge ǃgû hâ i, tsî ta ge nēsi ǃKhūb ommi ǃoa ra ǃgû, tsî khoe-i tita nî oms ǃnâ ūǂgâ-i xare-i ge a ǀkhai,

¹⁹Sida di eselra ǃhoroǃgaodan kas, ǀnî ǂûǃnôan kas hoasa ūhâ xawe, tsî pereb tsî ǂauxûib on, tita tsî sa ǃgās tsî ǃgāb sa ǃgān tawa hâna hâba xawe; xū-i xare-i tôasi tama hâ.

²⁰ǃNubaib ge kaira aoba ge mî: ǂKhîba ab hâǀkhā tsi, sats ga ǂhâ xūn hoan ge ti tawa hâ; îts ǁnâi ǃganni ai tā ǁomǂkhai.

²¹Ob ge ǁîba oms âb ǃnâ ūsī tsî eselra ge ǂûmā; tsî ǂaidi âna ǁā tsîn ge ǂû tsî ge ā.

²²Tsî ǂgaob ânan ra ǃgâiǃgâi hîa gu ge ǁnā ǃās di khoega (khoegu hîa Beliali ôaga) omsa ge xāǂgā, dao-ams ai ra ǃgubuǃâ; tsî gu ge kaira aob, oms di ǀhonkhoeb ǃoa ǃhoa tsî ge mî: ǁNā aob, sa oms ǃnâ go hāba ūǂoaxa, î ge ǁîba ǂanguǀkhā.

²³Ob ge aob, oms di ǀhonkhoeba ǁîgu ǃoa ǂoa tsî ge mîǀî gu: Hî-î, ti ǃgâsago, tā ǁnāti ǂkhabase dī, nē aob ge ti ommi tawa go hā, xuige tā dī nēti ī gâresi-e.

²⁴Mû, ti ôas, hîa ǂkhamkhoes, tsî ǁîb di ǀgamitaras tsîra a ta ǁîra nēsi ūǂoaxa, î go ǁîra ǁgaidī-ū, î go ǁîra dī-ū, sago mûǁae i a ǃgâi khami; xawe go nē aob tawa nēti ī gâre xū-e tā dī.

²⁵Xawe khoegu ge ǁîba ǁnâu ǂgao tama ge i. ǃNubaib ge aoba ǀgamitaras âba ǃkhō tsî ge ūǂoa si ǁîgu tawa; o gu ge ǁîsa ge ǂanguǀkhā, tsî gu ge tsuxub hoaba ǁîsa ge ǁore-ū, ǁgoas kōse, tsî gu ge ǁîsa ge xū, ǁgoaǂnobos ge tsoatsoa ǃnubai.

²⁶Tsî taras ge, ǁgoas ge ǁgoao, hā tsî aob oms, ǀhonkhoeb âs ǁîs ǃnâ hâs di dao-ams aiǃâ ge ǁnāǁgoe, ǃnâ i ges kōse.

²⁷Tsî ǀhonkhoeb âs ge ǃnauǁgoaga khâi tsî oms di dao-amsa ǁkhowa-am tsî ǂoao, daob âbab nî ǃgûse, mû, os ge taras, ǀgamitaras âba oms ǁāb ai ge ǁgoe i, ǃomkha âs dao-ams di ǀhani-amǃnaob ai ǁgoese.

²⁸Ob ge ǁîs ǃoa ge mî Khâi îm ǃgû; xawe ǃeream-i ge ǀkhī tama ge i. ǃNubaib ge ǁîsa esels ai ūǃapa, tsî ge khâi tsî ge ǃgû ǃās âb ǁga.

²⁹Tsî oms âb ǃnâb ge sīo, ob ge gôasa ū tsî ǀgamitaras âba ǃkhō tsî ǂkhōgu âs ǀkha disiǀgamǀa ǃâdi ǃnâ ge ǀgora; tsîb ge ǁîde Israeli ǃhūb di ǀkharigu hoagu ǃnâ ge sî.

³⁰O i ge ge ī, ǁî-e ge mû-i hoa-i ge mî ǃkhaisa: Nēti ī xū-i ge tātsē ī tama tsî mûhe tama hâ Israeli ôan ge Egipteba xu doeǂoaxa tsēsa xu, nētsēs kōse. ǂGaoba ǁî ǃkhais ai ǂnûi, î du ǀapemā î du ǃhoa.