Read Khoekhoegowab ǂHanuǂhanu-aogu 2 Bible Online

ǂHanuǂhanu-aogu 2 - Khoekhoegowab bible

ǂHanuǂhanu-aogu 2

¹Tsî ǀhomǃgāb ǃKhūb dib ge Gilgalsa xu Boxims ǃoa ge ǃapahā, tsîb ge ǁîba ge mî: Tita ge sado Egipteba xu ǂgaeǂguiǃapa tsî ge ūhā du ǁnā ǃhūb, sadu di îga ta ge nūba tsî: Tita ge ti ǃgaeǀhaosa sadu ǀkha khôa tide ǀamosib kōse, ti mîb ǃnâ.

²Tsî sadu xasa: Sadu ge ǃgaeǀhao-e dī tide nē ǃhūb di ǁansaben ǀkha; ǁîn di altarde du ge nî khôaǁnâ; xawe du ge ti domma ǁnâuǀnam tama ge i. Tare xū-i ǃaroma du ǁîsa ge dī?

³ǁNā-amaga ta ge tita ǁkhāti ge mî: Tita ge ǁîna sadu di ais aiǃâ doeǁgaǂui tide; tsîn ge ǁkhūse nî ība du, tsî elogu ân ge ǁnoase nî ība du.

⁴Tsî i ge ge ī, ǃKhūb di ǀhomǃgāb ge nē mîde Israeli ôan hoan ǃoa ǃhoatoao, os ge ǁaesa dommi âsa ūkhâi tsî gere ā.

⁵ǁNā-amagan ge ǁnā ǃās di ǀonsa Boxim ti ge ǂgai; tsîn ge ǁnāpa ǃKhūba gere ǁguiba.

⁶Tsî Josuab ge ǁaesa ǃgû kaio, on ge Israeli ôana ge ǃgû, mâ-i hoa-e ǁî-i di ǀumi-amǃnâs ǃoa, ǃhūban nî ǀumise ūhâse.

⁷Tsî ǁaes ge ǃKhūba gere ǃoaba Josuab di tsēdi hoadi tsî kaigu, ǂomxase Josuab khaoǃgâ ge ûigu di tsēdi hoadi kōse; ǁîgu ge ǁnā kai sîsenni ǃKhūb dib, Israeli tawab ge dīb hoaba mû xui-ao.

⁸Xawe Josuab Nunni ôab, ǃKhūb di ǃgāb ge ǁō-o, ǀguikaidisi tsî disi kurixab a hîa,

⁹tsî ǁîban ge ǁkhō-o ǀumi-amǃnâs âb di ǀkharib ǃnâ, Timnat-Heres tawa Efraimmi di ǃhommi ai, Gaas di ǃhomma xu ǀapasǀî,

¹⁰tsî ǁnā ǃhaos hoas ge ǁkhāti ǁgûgu tawa ǀhaoǀhaohe hâ io, os ge ǀkhara ǃhaosa ǁîn khaoǃgâ ge khâi, ǃKhūba a ǀūs tsî ǁkhāti ǁnā sîsenni, Israelab ge dī-ūba.

¹¹ǃNubain ge Israeli ôana ǃKhūb mûǁae a ǂkhabana dī tsî Baala gere ǃoaba.

¹²Tsîn ge ǃKhūb, ǁîn îgu di Elob, Egipteǃhūba xu ǁîna ge ǂgaeǂguiǂuiba ǁnāxū tsî ǀkhara eloga ge sao, ǁnā elogu, ǁîn ǂnamipe hâ ǁaedi digu xa, tsîn ge ǁîgu aiǃâ ge ǃhon, tsîn ge ǃKhūba ge ǁaixa kai.

¹³ǃKhūba ǁnāxū tsîn Baali tsî Astarots tsîra gere ǃoaba xui-ao.

¹⁴Ob ge ǃKhūb di ǁaiba ge khâi Israeli ǃoagu, tsî ǁîb ge ǁîna ǁkhâuǁnâ-aon, ǁîna ra ǁkhâuǁnân ǃomǁae ge mā; tsî ǁîb ge ǁîna ǁîn ǂnamipe hâ khākhoen ân ǃomǁae ge mā; on ge ǃaruǀî ge mâ ǁoa i khākhoen ân di ais aiǃâ.

¹⁵ǃGûǂoaǀîn ges hoas tawab ge ǃKhūb di ǃomma ǁîn ǃoagu ge hâ i ǂkhabab ǃoa, ǃKhūb ge ǃhoa xase tsî ǃKhūb ǁîna ge nūba xase; on ge kaise ge ǃao.

¹⁶Ob ge ǃKhūba ǂhanuǂhanu-aoga ǁîna ge ǂkhaiǂkhaiba, ǁîna ge orega ǁnān ǁîna ge ǁkhâuǁnân di ǃomǁaeba xu.

¹⁷Xawen ge ǁkhāti ǁîn di ǂhanuǂhanu-aoga ǁnâu tama i tsî ǀkhara eloga gere ǀaiǃgon; ǃhaesen ge ǁnā daob, ǁîn îgu ǃKhūb di mîmāde ra ǁnâuǀnamǃâ gere ǁîb ai ǃgûba xu ge ǂgō; tsîn ge ǁnāti ge dī tama i.

¹⁸Tsî ǃKhūb ge ǁîna ǂhanuǂhanu-aoga ǂkhaiǂkhaibao, ob ge ǃKhūba ǁnā ǂhanuǂhanu-aob ǀkha ge hâ i tsî ǁîna ge ore khākhoen ân di ǃomǁaeba xu, ǂhanu-ǂhanu-aob di tsēdi hoadi kōse; ǃKhūb ge ge ǃhausen ǁîn di ǀhâimâinǀoms, ǁnān, ǁîna ge ǁgari tsî ǁgâin xan ra ǀhâimâinǀoms ǃaroma.

¹⁹Xawe ǂhanuǂhanu-aob di ǁōb ǀkha i ge ge ī, oa tsîn ge ǁîn di îgu ǃgâ-ai ǁore ǃkhaisa, ǀkhara eloga ra sao tsî ǁîga ǃoaba tsî ǁîgu aiǃâ ra ǃhonse; ǁîn sîsengu xan ge xū-i xare-e ǁnā kai tama tsî karosa daob ân xa.

²⁰ǁNā-amagab ge ǃKhūb di ǁaiba ge khâi Israeli ǃoagu, ob ge ge mî: Nē ǁaes ge ti ǃgaeǀhaos, ǁîn îga ta ge mîmāsa ge ǃûǂam, ti domman ge ǁnâuǀnam tama hâ i amaga.

²¹ǁNā-amaga ta ge tita ǃaruǀî ais ân aiǃâ khoe-e ū i hâ xūna xu doeǁgaǂui tide ǁnā ǀūben, Josuab ge ǁnākhaon xa, ǁōb ge ǃnubai,

²²Israela ta nî ǁîn ǀkha ǃâitsâga, isen ǃKhūb di daoba nî ǃkhōǀgaipe ǃkhaisa, ǁîb ain nî ǃgûga, ǁîn îgu ge ǁîba ǃkhōǀgaipe khami, isen dī tide ǃkhaisa.

²³Nētib ge ǃKhūba nē ǀūbena ge hâ kai, ǃhaesen ūn hâna xu doeǁgaǂuihe tidese, tsîb ge ǁîna Josuab ǃomǁae mā tama ge i.