Read Khoekhoegowab ǂHanuǂhanu-aogu 21 Bible Online

ǂHanuǂhanu-aogu 21 - Khoekhoegowab bible

ǂHanuǂhanu-aogu 21

¹Tsî Israeli aogu ge Mispas tawa nū tsî ge mî: Khoe-i xare-i sida di-i ge ǁî-i di ôasa Benjaminǁîga tarase mâ tide.

²Tsî ǁaes ge Bet-Els tawa sī tsî ǁnāpa ge hâ, ǃuis kōse Elob di ais aiǃâ; tsîn ge dommi âna ūkhâi tsî ǃgarise ge ā.

³Tsîn ge ge mî: ǃKhūtse, Israeli Elotse, tare xū-i ǃaromas kha nē ǃkhaisa go ī Israeli ǃnâ, nētsēs ǀgui ǃhaosa nî ǁkhuihe ǃkhaisa?

⁴Tsî i ge sao ra tsēs ai ge ī, ǁaes ge ǃnauǁgoaga khâi tsî altarsa ǁnāpa ǂnubi ǃkhaisa; tsîn ge khauǁguibadi tsî ganganǁguibadi tsîde gere ǁguiba.

⁵On ge Israeli ôana ge mî: Tari-e hāǃapa tama hâ ǀhûs ǃnâ, Israeli di ǃhaodi hoade xu ǃKhūb ǃoa? Kai nū-i ge nūhe hâ i xui-ao, ǁnā-i ǃKhūb ǃoa Mispas tawa ga hāǃapa tama i-i ǂama mî raǃâ: ǁÎ-i ge amase nî ǃgamhe.

⁶Tsî Israeli ôan ge Benjaminni, ǁîn di ǃgâsab ǃaroma ge ǃhausen, tsîn ge: Nētsēs ge ǀgui ǃhaos Israeli disa go ǃgaoǁnâhe, ti ge mî.

⁷Mati da kha ǁnāgu, hîa ge ǃgauga nî dī-ū taradi xasa? ǃKhūb tawa da kom ge nūo, sida di ôadi xa da ǁîga ǀguis xawesa tarase mā tide ǃkhaisa.

⁸On ge ge mî: Khoe-i Israeli di ǃhaodi di-i hîa ǃKhūb ǃoa Mispas tawa hāǃapa tama-e hâ-e? Tsî mû, Jabes Gileadi disa xu i ge khoe-i xare-e hāǃapa tama ge hâ i, ǁgoeǃkhais ǃnâ ǀhaohâb ǃoa.

⁹ǁAes ge ǃgôaheo, mû, o i ge Jabes Gileadi dis di ǁansaben xa ǀgui-i xare-e hâ tama ge hâ i.

¹⁰ǃNubaib ge ǀhaohâba disiǀgamǀaǀoadisi aogu, hoagu xa ǃkham ǁkhāga ǁnāǀî ge sî; ǁîn ge ǁîga mîmā tsî ge mî: ǃGû, î go Jabes Gileadi dis di ǁansabena gôab di ǀāb ǀkha ǂnau, taradi tsî ǀgôaron tsîna.

¹¹Tsî nēs ge ǃkhais dī go nîsa: Aoreb hoab tsî ǁnā taradi, aob di ǁgoeǀkhāsa a ǂandi hoade go ge nî ǀâxare.

¹²Tsî gu ge Jabes Gileadi dis di ǁansaben ǃnâ hakakaidisi ǀgôade ge hō, ǂkham khoedi, aore khoeb di ǁgoeǀkhāsa ge ǂan tama hâ ide; o gu ge ǁîde ǁgoeǃkhais Silos, Kanaanǃhūb ǃnâ hâs ǃnâ ge sī-ū.

¹³ǃNubaib ge ǀhaohâb hoaragaba sî tsî Benjaminni ôagu, Rimons ǃhaob ai hâgu ǀkha ǃhoa tsî ǂkhîba ge ǂgaiǀî gu.

¹⁴O gu ge Benjaminni ôaga ǁnā ǁaeb ǁkhāb ai ge oa; on ge ǁîga ǁnā taradi, Jabes Gileadi dis di taradi xan ge ûi kaide ge mā; xawe gu ge ǂâubahe tama ge hâ i.

¹⁵ǁGoasis ge ǁaesa Benjaminni ǂama ge ǃhausen, ǃKhūb ge Israeli di ǃhaodi ǂama ǀkhao-e ǀkhao amaga.

¹⁶O gu ge ǀhaohâb di kaiga ge mî: Mati da kha ǁnāgu, hîa go ǃgauga nî dī-ū, taradi xasa? Taradi kom hîkākāhe hâo Benjaminna xuo.

¹⁷ǃAruǀî gu ge ge mî: ǀUmis ǁnāgu, hîa go ǃgaugu dis ge a Benjaminni di, tsî ǃhaos xares ge Israela xu ǃhomǂuihe tide.

¹⁸Xawe sida ge ǁîga sida di ôadi xa tarade a mā ǁoa; Israeli ôan ge ge nū xui-ao, mî raǃâ: A-i ǀâxarexūhesase hâ, Benjaminǁîga tara-e ga mā-i hoa-e.

¹⁹ǃNubai gu ge ge mî: Mû, ǃKhūb di kaitsēs ge kurikorobe Silos tawa hâ, Elob omma xu ǀapasǀî ra dīhe-i, sores ra ǁhai ǀkhāb ai, ǁnā ǀgapi daob, Bet-Elsa xu Sexems ǃoa gaub tawa, tsî Lebonasa xu ǃkhawagasǀî.

²⁰O gu ge Benjaminni ôaga mîmā tsî ge mî: ǃGû î go ǂauxûiǂûǃhanagu ǃnâ sī ǁgoeǃgâ.

²¹Î go ǃgaoǃgâ, tsî mû, Silos di ôadi ga ǀkhō rase ǂoaxao, ǂnā nîse, o go ge sago ǂauxûiǂûǃhanaga xu ǃkhoeǂoaxa tsî mâb hoab âgo taras âba nî ǀâbasen, Silos di ôade xu; î go Benjaminǃhūb ǃoa ǃgû.

²²Tsî i ge nî ī, ǁgûgu âdi kas, ǃgâsagu âdi kas hoas ka hā, sige ǀkha nî ǂnoaguse, o ge ge sige ǁîga nî mîǀî: Sige ǂama ǁîga ǀkhom, sige ge nē torob ǃnâ mâb hoab ǁîgu diba tara-e ūba tama. Sago kom ǁîde ǁîga mā tamao, ǁnās ga io, o go ga nēsi ǀhapixa hâ.

²³O gu ge Benjaminni ôaga ǁnāti dī tsî ǁîgu di ǀgaus īs kōse tarade ge ū, ǁnā ǂnā ra ǀgôadi hîa gu go ǀâbasendi xa; tsî gu ge ǃgû tsî ǁîgu di ǀumis ǃoa ge ǁaru; tsî gu ge ǃāde ǁkhawa ǂnubi tsî ǁîdi ǃnâ ge ǁan.

²⁴Tsî Israeli ôan ge ǁkhāti ǁnā ǁaeb ǁkhāb ai ǁnāpa xu ge ǃgû, mâ-i hoa-e ǁî-i di ǃhaoǃnās ǃoa tsî ǀǀî-i di ǃhaos ǃoa; nētin ge ǁnāpa xu ge ǂoa, mâ-i hoa-e ǁî-i di ǀumis ǃoa.

²⁵ǁNā tsēdi ǃnâ i ge gao-ao-e Israeli ǃnâ hâ tama ge hâ i, mâ-i hoa-i ge ǁî-i mûǁae a ǂhanu xū-e gere dī.