Read Khoekhoegowab ǂHanuǂhanu-aogu 3 Bible Online

ǂHanuǂhanu-aogu 3 - Khoekhoegowab bible

ǂHanuǂhanu-aogu 3

¹Tsî nēn ge ǁnā ǀūben ǃKhūb ge hâ kaina, ǁîn ǀkhab nî Israela ǃâitsâse, ǁnān, Kanaanni di torogu hoagu xa xū-e ǂan tama hân hoana;

²Israeli ôan di ǃhaodi nî ǂanga, torobab nî ǁîna ǁkhāǁkhāse, ǁnān, ǁîb xa aibe xū-e ǂan tama ge hâ ina.

³Koro gaosagu Filisteǁîn digu tsî Kanaanǁîn hoan tsî Sidonǁîn, Hiviǁîn, ǃhommi Libanonni ai ǁan hân, ǃhommi Baal-Hermonna xu Hamats tawats ra sīs kōse.

⁴Nēn ge ǁnān, Israeli ǁîn ǀkha nî ǃâitsâhena, khoe-i nî ǂanse, īsen ǃKhūb di mîmādi, Moseb di ǃomma xub ge ǁîn îga mîmāde nî ǁnâuǀnam ǃkhaisa.

⁵Tsî Israeli ôan ge Kanaanǁîn, Hetiǁîn, Amorǁîn, Perisiǁîn, Hiviǁîn tsî Jebusǁîn ǁaegu ǁano,

⁶on ge ǁîn di ôade tarase ge ū, tsîn ge ǁîn di ôade naun di ôaga ge mā; tsîn ge ǁîn di eloga ge ǃoaba.

⁷Tsî Israeli ôan ge ǃKhūb mûǁae a ǂkhabana dī tsî ge ǀuru ǃKhūb, ǁîn Eloba tsîn ge Baalgu tsî haixaǃkhaidi tsîna gere ǃoaba.

⁸ǃNubaib ge ǃKhūb di ǁaiba ge ǂhubi Israeliǀî, ob ge ǁîna ge ǁamaxū Kusan-Risataimmi, Mesopotamiab gao-aob di ǃomǁae; on ge Israeli ôana ǁkhaisa kuriga Kusan-Risataimma gere ǃoaba.

⁹Tsî Israeli ôan ge ǃKhūb ǃoa ǂgaio, ob ge ǃKhūba Israelǁîna ore-aob, ǁîna ge oreba ge ǂkhaiǂkhaiba; Otnieli, Kenab ôab, Kaleb di ǃgâsab ǂkhamma.

¹⁰Tsî ǃKhūb di Gagab ge ǁîb ai ge hâ i, tsîb ge Israela ge ǂhanuǂhanu, tsîb ge torob ǃoa ge ǂoa; tsî ǃKhūb ge Kusan-Risataimmi, Siriab di gao-aoba ǁîb di ǃomǁae ge mā; ob ge ǃommi âba Kusan-Risataimmi ǂama ge ǀgaisa.

¹¹ǃNubaib ge ǃhūba hakadisi kurigu kōse ge ǃnō, tsî Otnieli, Kenab ôab ge ge ǁō.

¹²Tsî Israeli ôan ge ǃaruǀîǀgui ǃKhūb mûǁae a ǂkhabana gere dī; ǃnubaib ge ǃKhūba Eglonni, Moabǁîn di gao-aoba ge ǀgaiǀgai Israeli ǃoagu, ǃKhūb mûǁae a ǂkhabanan ge gere dī amaga.

¹³Ob ge ǁîb tawa Amonni tsî Amaleki ôana ǀhaoǀhao tsî ǃgû tsî Israela sī ge ǂnau, tsîn ge Palmǃāsa ge ūbasen.

¹⁴Tsî Israeli ôan ge Eglonni, Moabǁîn di gao-aoba gere ge ǃoaba, disiǁkhaisaǀa kurigu kōse.

¹⁵ǁGoasin ge Israeli ôana ǃKhūb ǃoa ge ǂgai; ob ge ǃKhūba ore-aoba ǁîna ge ǂkhaiǂkhaiba, Ehudi, Gerab ôab, Benjaminǁîb, aob, ǁare ge iba. Tsî Israeli ôan ge ǁîb ǀkha ǀkhaexū-e Eglonni, Moabǁîn di gao-aoba ge sîba.

¹⁶Tsî Ehudi ge gôaba ge dībasen, hoaǀkhāǀāba, ǀgui ǂhâb kōse a gaxuba; tsîb ge ǁîba saran âb ǃnaga, amǀkhāb ǂnamib âb ai ge ǃgae.

¹⁷Tsîb ge Eglonni Moabǁîn di gao-aoba ǁnā ǀkhaexū-e ge ūsība; tsî Eglonni ge kaise kausa ao ge i.

¹⁸Tsî ǀkhaexū-eb ge māǁnâtoa, o i ge ge ī, ǁaes, ǀkhaexū-e go tanisab ge ǁnū ǃkhaisa.

¹⁹Xawe ǁîb ǂûb ge ǁnā ǃgaohe hâ īgu, Gilgals tawa hâga xu oa tsî ge mî: ǂGanǃgâsa ǃkhai-e ta ge satsa ūba hâ, gao-aotse. Ob ge ǁîba: ǃNō, ti ge mî. On ge ǁîb ǂnamipe mân hoana ǁîba xu ǃaugab ǁga ge ǂoa.

²⁰Tsî Ehudi ge ǁîb tawa ge ǂgâ, karasa ǂamommi, ǁîb ǂûb ǀguri gere hâǃnâb ǃnâb ǂnôa hîa; tsî Ehudi ge ge mî: Eloba xu hâ mî-e ta ge satsa ūba hâ. Ob ge ǂnû-aiǃnaosa xu ge khâima.

²¹Ob ge Ehuda ǁîb di ǁareǀkhāb ǃomma ǀhōǂui tsî gôaba amǀkhāb ǂnamib âba xu ǀkhū tsî ǃnāb ǃnâ ge ǃkhā bi;

²²ǃkhōǃkhais on ǂnūǀurib khaos ai ge ǂgâ tsî kaub ǂnūǀurib ǂnamipe ge ǂganamsens kōse, gôabab ge ǃnāb âba xu ǂgaeǂui tama xui-ao, tsî xaub ge ge ǂoa.

²³ǃNubaib ge Ehuda ai-ommi ǃoa ǂoa tsî ǂamommi di dao-amde ǁîb ǃgâb ai ǂganam tsî ǁîde ge ǂganamǁapoǁapo.

²⁴Tsî ǂoab geo, o gu ge ǁîb ǃgāga hā tsî ge kō, tsî mû, ǂamommi di dao-amdi ge ǂganamǁapoǁapohe ge hâ i; o gu ge ge mî: ǂAnǂansaseb ra ǂaira âba karakara-oms ǃnâ ǃgū-ai.

²⁵Tsî taos kōse gu ge ǃâu hâ i, xaweb ge ǂamommi di dao-amde ǁkhowa-am tama i, ǃnubai gu ge ǁkhowa-amxūba ū tsî ge ǁkhowa-am; tsî mû, ǁîgu di ǀhonkhoeb ge ǁō hâse ǃhūb ai ge ǁgoe i.

²⁶Tsî Ehudi ge ge ûiǂoa, ǁîn ra ǀhawe hîa; ǃgaohe hâ īǀuigab ge ǃgû-īǀkhā tsî Seirats kōse ge sī.

²⁷Tsî i ge ge ī, sīb geo, ob ge xâiǁnâba ge xâi Efraimmi di ǃhommi ai; on ge Israeli ôana ǁîb ǀkha ǃhomma xu ge ǁgôa tsî ǁîb ǂûba ais ân aiǃâ.

²⁸Tsîb ge ǁîn ǃoa ge mî: Sao te, ǃKhūb ge sadu di khākhoen, Moabǁîna sadu ǃomǁae go mā xuige. On ge ge ǁgôa ǁîb khaoǃgâ, tsî Jordanǃāb di ǃgâu-amdi, Moab ǃoa garude-ū tsî khoe-i xare-e ǃgâu kai tama ge i.

²⁹Tsîn ge Moabǁîn xa ge ǂnau ǁnā ǁaeb ai disiǀoadisi khoega, hoatsama kausa tsî ǃkham ǁkhā khoega, ǀguib xareb ge ûi tama is kōse.

³⁰Nētib ge Moaba ǁnātsē Israeli di ǃommi ǃnaga ge ǃgamǃgamhe; tsî ǃhūb ge ǃnōsa ge i ǁkhaisadisi kurigu kōse.

³¹ǁÎb khaoǃgâb ge Samgari, Anati ôaba ge hā; ǁîb ge Filisteǁîga ge ǂnau gomaǃkharihai-i ǀkha; nētib ge ǁîb ona Israela ge ore.