Read Khoekhoegowab ǂHanuǂhanu-aogu 4 Bible Online

ǂHanuǂhanu-aogu 4 - Khoekhoegowab bible

ǂHanuǂhanu-aogu 4

¹Tsî Israeli ôan ge ǃaruǀîǀgui ǃKhūb mûǁae a ǂkhaba xūna ge dī, Ehudi ge ǁō-o.

²Ob ge ǃKhūba ǁîna ge ǁamaxū Jabinni, Kanaanǁîn di gao-aob, Hasors tawa ge gaob ǃomǁae; tsî ǁîb di toroǂamkhoeb ge ge Sisera i, tsî ǁîb ge Harosets ǀūben dis tawa ge ǁan.

³ǃNubain ge Israeli ôana ǃKhūb ǃoa ge ǂgai; khoesekaidisi ǂnūǀurikunideb ge ūhâ i xui-ao, tsîb ge Israeli ôana ǀgaib ǀkha ge ǁgâiǀā, ǀgamdisi kurigu kōse.

⁴Tsî Deboras, taras hîa kēbo-ao ge is, Lapidoti di taras, ǁîs ge Israela ǁnā ǁaeb ai gere ǂhanuǂhanu.

⁵Tsîs ge ǁîsa palmhais Deboras dis ǃgao, Ramas tsî Bet-Els tsîra ǁaegu Efraimmi ǃhommi ai ge ǁan; tsî Israeli ôan ge ǁîs ǃoa gere ǃapa, ǂhanuǂhanuhen nîga.

⁶Tsîs ge sî tsî Baraki, Abinoammi ôab, Kedes Naftalib dis diba ǂgai tsî ǁîb ǃoa ge mî: ǃKhūb, Israeli di Eloba mîmā tamab hâ: ǃGû îts Taborǃhommi ai ǃapa îts ūǀhao disiǀoadisi khoegu Naftalib ôan diga tsî Sebulonni ôan diga?

⁷Tsî tita ge ǃārob Kisonni tawa sa ǃoa nî ǂgai Siserab, Jabinni di ǂamtorokhoeba kunidi âb tsî ǂguib âb ǀkha; tsî tita ge ǁîba sa ǃomǁae nîra mā, ti.

⁸ǃNubaib ge Baraka ǁîs ǃoa ge mî: Sas ga tita ǀkha ǃgûo, o ta ge nî ǃgû; xawe sas ga tita ǀkha ǃgû tama io, o ta ge ǃgû tide.

⁹Os ge ge mî: Tita ge ǂanǂansase sa ǀkha nî ǃgû, xawe ǃgôab ge sa tide, nē daob hîats nî ǃgûb ai; ǃKhūb ge Siseraba tara-i ǃomǁae nîra mā amaga. Nētis ge Deborasa khâi tsî Baraki ǀkha ge ǃgû Kedes ǃoa.

¹⁰ǃNubaib ge Baraka Sebulonni tsî Naftalib tsîkha Kedes tawa ge ǂgaiǀhû; tsîb ge ǀnūb ǀkha ge ǃapa disiǀoadisi khoegu ǀkha; tsî Deboras on ge ǁîb ǀkha ge ǃapa.

¹¹Tsî Heberi, Keniǁîb, ge ge khaisen Kainni, Hobab, Moseb ǀuib di ôan diba xu; tsîn ge tentomdi âba ge ǂnûikhâi terpentinhais Saananims dis, Kedes tawa hâs ǃgao.

¹²ǁGoasin ge Siseraba ge ǂanǂan, Baraki, Abinoammi ôab, Taborǃhommi ai go ǃapa ǃkhaisa.

¹³Ob ge Siseraba ǁîb di kunidi hoade ge ǂgaiǀhû, khoesekaidisi ǂnūǀurikunidi tsî ǁaes ǁîb ǀkha hâs hoasa, Harosets ǀūben disa xu ǃārob Kisonni kōse.

¹⁴Os ge Deborasa Baraki ǃoa ge mî: Khâi, nēs ge tsēs ǁîs aib ǃKhūba Siseraba sa ǃomǁae go māsa. ǃKhūba sa ais aiǃâ ǃgûǂoa tamab hâ? Ob ge Baraka Taborǃhomma xu ge ǁgôa tsî disiǀoadisi khoega ǁîb khaoǃgâ.

¹⁵Tsî ǃKhūb ge Siseraba ge ǂnaukākā ǁîb di kunidi hoadi tsî toroǂnubis hoasa gôab di ǀāb ǀkha Baraki di ais aiǃâ, Siserab ge kunisa xu uriǁgôa tsî ǀnūb ǀkha ǁhâs kōse.

¹⁶Tsî Baraki ge kunide ge sauruǃgon tsî toroǂnubisa Harosets ǀūben dis kōse. Tsî toroǂnubis Siserab dis hoas ge gôab di ǀāb ǀkha ge ǁnā, ǀguib xareb ge ǃgau tama is kōse.

¹⁷Xawe Siserab ge ǀnūb ǀkha ge ǃhū Jaels, Heberi, Keniǁîb di taras di tentoms ǃoa; ǂkhîb ge hâ i xui-ao Jabinni, Hasors di gao-aob, tsî Heberi, Keniǁîb di ommi ǁaegu.

¹⁸Tsî Jaels ge ge ǂoa, Siserabas nî ǃoase, tsî ǁîb ǃoa ge mî: ǂGâ re, ǀhonkhoetse, ǂgâ re ti tawa îts tā ǃao! Ob ge ǁîs tawa tentoms ǃnâ ge ǂgâ, tsîs ge ǁîba ǃkhaib ǀkha ge ǃgū-ai.

¹⁹ǁNās khaoǃgâb ge ǁîs ǃoa ge mî: ǁGamro-i xa au te, î ta ā re, ǁgâ ta hâ xuige. ǃNubais ge daixapa-e ǁkhowa-am tsî āsi bi tsî ge ǃgū-ai bi.

²⁰Tsîb ge ǁkhāti ǁîs ǃoa ge mî: Dao-ams tentoms dis ǃnâ mâ, tsî khoe-i ga hā tsî dî si tsî, Khoe-e hâ i a? ti a mî os ge, Khoe-i a ǀkhai, ti nî mî.

²¹ǁNās khaoǃgâs ge Jaels, Heberi di tarasa tentoms di ǂnūǀuridaba ū tsî hamersa ǃomǁae ǃkhō tsî ǃnōsase ǁîb tawa sī ǂgâ tsî ǀuridaba danas âb di ǃnammi ǃnâ ge ǂnauǂgā ǃhūb ǃnâb ge ǁapos kōse; tsî ǁîb ge ǃgam ǂomsi dāhe tsî ge ǀhupu, tsî ge ǁō.

²²Tsî mû, Baraki ge Siseraba ge ǃgôaǃgon, os ge Jaelsa ǁîba ǃgûǃoa tsî ǁîb ǃoa ge mî: Hā î ta ǁnā aob, sats ra ôaba, ǁgau tsi. Tsî ǁîs tawab ge ǂgâsīo, mû, ob ge Siseraba ǁō hâse ǁgoe tsî ǀurib ge danas âb di ǃnammi ǃnā hâ.

²³Nētib ge Eloba ǁnātsē Jabinni, Kanaanni di gao-aoba ge ǃgamǃgam Israeli ôan di ais aiǃâ.

²⁴Tsî Israeli ôan di ǃommi ge ǃaruǀîǀgui ge ǃgom Jabinni, Kanaanni di gao-aoban ge ǃhūǃnomas kōse.