Read Khoekhoegowab ǂHanuǂhanu-aogu 5 Bible Online

ǂHanuǂhanu-aogu 5 - Khoekhoegowab bible

ǂHanuǂhanu-aogu 5

¹Tsî Deboras tsî Baraki, Abinoammi ôab tsîra ge ǁnā tsēs ǁkhās ai ǁnae tsî ge mî:

²ǃKhōǀkhā re ǃKhūba, Israeli ǃnâb go ǀkhao ǀkhaodi ǃaroma ǁaes ge māsenxase ǁgausensa xu.

³ǁNâu re, gao-aogo, î ǁnâuǃā re, gaosabego, tita, ǃKhūba ta ge nî ǁnaeba, tita ge ǃKhūb Israeli di Eloba nî psalmǁnaeba.

⁴ǃKhūtse, Seira xuts ge ǂoao, Edommi ǃauba xuts ge dāhāo, ob ge ǃhūba ge ǀkhū, ob ge ǀhomma ge ǂnâ, o di ge ǀnanude ǁgamma ge ǁhō;

⁵o gu ge ǃhomga ge tsuni ǃKhūb di ais aiǃâ, Sinaib ǂûb ǃKhūb Israeli Elob di ais aiǃâ.

⁶Samgari, Anati ôab di tsēdi ai, Jaels di tsēdi ai gu ge daoga ge ǀari, tsî ǃgûkhoen ge gama daogu ai gere ǃgû.

⁷ǃHaidi ge ǀkhai ge i Israeli ǃnâ, ǁîdi ge ge ǀû; tita, Deborata, ge khâis kōse, Israeli ǃnâ a ǁgû ta.

⁸ǁÎb ge ǀasa eloga ǃkhōǂuibaseno, ob ge toroba ge hā ǁāgu ǃnâ. Khōsikhō-i kas, ǁhâigôa-i kasa mûhe i ge Israeli di hakadisiǀoadisin ǁaegu?

⁹Ti ǂgaob ge ǂhanuǂhanu-aogu Israeli digu ǀkha hâ, māsenxase ǁaes ǃnâ ge ǁgausenga. ǃKhōǀkhā re ǃKhūba!

¹⁰Sago ǃuri eseldi ai ra ǃgapigo, sago, ǂhanub ǃnâ ǂnôago, tsî sadu, daob ai ra ǃgûdo, ǃhoa ǁî ǃkhais xa.

¹¹ǁKhâu-aon ǂkhupib di amǃnâs ai, a di ǁnā ǃkhaidi, ǁîdi ǃnâ i ǁgam-e ra xurihedi tawa ǃhoaǀhao ǃKhūb di ǂhanu-aisigu, Israeli di ǃkhaideb go sîsenūgu xa. ǃNubais ge ǃKhūb di ǁaesa ǁāgu ǃoa ge ǁgôa.

¹²ǂKhai re ǂkhai re, Deborase, ǂkhai re ǂkhai re, îs ǁnaetsana-e dī; khâi re, Baraktse, î ǃkhōsan âtsa ǃkhōsase ūǃgû, Abinoammi ôatse.

¹³ǃNubaib ge ǁîba ǃgau gena ge gao kai ǁaes di ǂkhaisan ǂama; ǃKhūb ge tita ra gao kai ǃgari-aogu ǂama.

¹⁴Efraimma xub ge ǃnomab âna ge i Amaleki ǃoagu. Sats khaoǃgâb ge Benjaminna sa ǁaedi ǃnâ ge hâ i. Maxira xu gu ge ǂhanumā-aoga ge ǃgûǂoa, tsî Sebulonna xu xoa-aob di xoaxūsa ra sîsenūga.

¹⁵Gaosagu Isaskari digu on ge Deboras ǀkha ge hâ i; tsî Isaskari ge īs ǁkhās xaseb ge Baraka ge ī, ǀnūb ǀkhāb ge ǃgoaǃnāb ǃnâ ge sîhe. Rubenni di ǃhūǃâdi ǃnâ di ge ǂgaob di ǂâide ge kai i.

¹⁶Tare xū-i ǃaromats ǃharadi ǁaegu ge ǂnûhâhâ, gūn di āsats nî ǁnâuse? Rubenni di ǃhūǃâdi ge kai ôaǃnâsenaidi ǂgaob dide ge ūhâ i.

¹⁷Gileadi ge Jordanǃāb nauǃanib ai ge hâhâ; tsî Danna, tarexab kha doe-omgu ǃnâ ge hâhâ? Aseri ge huri-ammi tawa ǂnû tsî ge hâhâ ǁîb di sâsa huri-amǃādi ǃnâ.

¹⁸Sebulonni ge a ǁae, ǀoms âsa ǁōb kōse ge ǃharaxūsa, ǁnās ǁkhās xase Naftaliba ǃaub di ǀgapib ai.

¹⁹Gao-aogu ge ǃkham nîse ge hā; ǃnubai gu ge Kanaanni di gao-aoga ge ǃkham Tanaxs, Megidos di ǁgamgu amǃgâ ǁgoes tawa; ǀhaiǀuri-e gu ge hōbasen tama ge i.

²⁰ǀHomma xu di ge ge ǃkham, ǀgamirodi ge ǃgûdaogu âde xu Siserab ǃoagu ge ǃkham.

²¹ǃĀrob Kisonni ge ǁîga ge dâubē, Kedumimǃārob, ǃārob Kisonna; dāǂkhūǂkhū, ti ǀomse, ǁnā ǀgaisaga.

²²ǁNāǃnubai di ge hān di ǂaide ge ǂkhū, ǃkhoes, ā, ǃkhoes ǁîn di ǀgaisagu dis xa.

²³ǀÂxare Merosa, tib ra mî ǀhomǃgāb ǃKhūb diba, ǀâxare ǁîs di ǁansabena hugaǀgui, hā tsîn ge ǃKhūba hui tama, ǃKhūban hui tama ǃkhais ǃaroma, ǀgaisagu ǀkha.

²⁴ǀKhaehesas ge a taradi ǃnâ Jaels, Heberi, Keniǁîb di tarasa; ǀkhaehesas ge a tentomdi di taradi ǃnâ.

²⁵ǁGam-i xab ge ǂgaoǀkhā, xawes ge dai-i xa mā bi; ǃkhūkhoeb di xapa-i ais ge ora ǁnui-i xa ge ūhā.

²⁶ǁAreǀkhāb ǃommi âsas ge ǂnūǀuribǀî ge ǀhōǂui tsî amǀkhāb ǃommi âsa sîsenaon di hamersǀî; tsîs ge Siseraba ǂnau tsî danas âba ge ǂnauǁnâ, danas di ǃnammi âbas ge ǃgâu tsî ǃkhāǃganuo.

²⁷ǂAira âs ǁaegub ge ǃhamisen tsî ge ǁnā; ǁnāb ge ǁgoe, ǂaira âs ǁaegub ge ǃhamisen tsî ge ǁnā; ǃhamisenni nî ge ǃkhai-i ai, ǁnāpab ge ge ǁgoe, hîkākāhe hâse.

²⁸Siserab îs ge mûǂuidaosa-ū ǂui tsî ge ǃau tralisa xu: Tarexasa kunis âb di hās ra ǀhapesa? Tare xū-i ǃaromasa kunidi âb di ǃgûs ǃonkhao hâsa?

²⁹Hoadi xa gā-ai taradi kaidi âs ge ge ǃeream, tsîs ge ǁkhāti aitsama mîdi âsa ge ǃkhōǃgâsen:

³⁰ǁKhâuǁnâsa hō tsî ǀgoran tide? ǀGui ǁâsas kas, ǀgam ǁâsara kasa mâ khoeb hoab dise? ǀGui ǁkhâuǁnâ-i ge Siserab di-e, ǃkharaga angu â-i-e, ǁkhâuǁnâ-i ǃkharaga angu â-i-e ǂom î-îhe hâ-e, ǁkhâuǁnâsa ra tanigu di-e?

³¹Nētin ge sa khākhoen hoana nîra ǀkhai, ǃKhūtse. Xawe ǁîba ǀnam hân, ǁîn ge sores ra ǀgaib âs ǃnâ ǁhai khami nîra ī. Tsî ǃhūb ge hakadisi kuriga ge ǃnōsa i.